MƏDƏNİYYƏT
Beynəlxalq Türk Mədəniyyəti və İrsi Fondunun prezidenti Batumi şəhərinin meri ilə görüşüb
Bakı, 2 iyun, AZƏRTAC
Gürcüstanda işgüzar səfərdə olan Beynəlxalq Türk Mədəniyyəti və İrsi Fondunun prezidenti Günay Əfəndiyeva Batumi şəhərinin meri Giorgi Ermakov ilə görüşüb.
AZƏRTAC xəbər verir ki, Günay Əfəndiyeva merə Fondun məqsədləri, fəaliyyət istiqamətləri və həyata keçirdiyi tədbirləri barədə məlumat verib.
Görüşdə tarixboyu türkdilli və gürcü xalqlarının birgə yaşamasına, oxşar mədəni dəyər və ənənələrə malik olmasına dair fikir mübadiləsi aparılıb, mədəni irsin qorunması və təbliği üzrə bir sıra məsələlər müzakirə edilib. Eyni zamanda, gələcəkdə əməkdaşlıq çərçivəsində birgə tədbirlərin reallaşdırılmasına dair razılıq əldə edilib.
Görüşdə Azərbaycanın Batumi şəhərindəki baş konsulu Rəşad İsmayılov da iştirak edib.