ELM VƏ TƏHSİL
Bilik günü münasibətilə Suraxanı rayonunda silsilə tədbirlər keçirilmişdir
Bakı, 16 sentyabr (AZƏRTAC). Bilik günü münasibətilə Suraxanı rayonu ərazisində yerləşən bütün təhsil ocaqlarında tədbirlər təşkil olunmuşdur.
Suraxanı Rayon İcra Hakimiyyətindən AZƏRTAC-a bildirmişlər ki, belə tədbirlərdən biri rayonun Hövsan qəsəbəsində əsaslı təmirdən sonra istifadəyə verilmiş 76 nömrəli tam orta məktəbdə keçirilmişdir.
Tədbirdə məktəbin direktoru Tehranə Tağıyeva demişdir ki, məktəbin kollektivi yeni tədris ilinə hazırdır. Çox sevindirici haldır ki, 2013-2014-cü tədris ilində şagirdlər əsaslı təmir edilmiş, müasir avadanlıqla təchiz olunmuş məktəbdə oxuyacaqlar. Təhsilə göstərilən diqqət və qayğıya görə məktəbim kollektivi Prezident İlham Əliyevə təşəkkür edir.
Rayon icra hakimiyyətinin başçısı İlqar Abbasov bildirmişdir ki, son illərdə Azərbaycanın ictimai-siyasi həyatının bütün sahələrində olduğu kimi, təhsil sistemində də çox ciddi irəliləyişlər, uğurlar əldə olunmuşdur. Bu illər ərzində yaradılmış baza Azərbaycan təhsilinin inkişafına uzun müddət xidmət edəcəkdir.
Azərbaycan xalqının ümummilli lideri Heydər Əliyev tərəfindən əsası qoyulmuş təhsil strategiyası bu gün Prezident İlham Əliyev tərəfindən uğurla davam etdirilir.
İ.Abbasov dövlətimizin başçısının Azərbaycan təhsilinə diqqət və qayğısını xüsusi vurğulayaraq tədbir iştirakçılarının diqqətinə bir daha çatdırmışdır ki, Prezident İlham Əliyev 2011-ci ilin aprelində Bakı şəhəri qəsəbələrinin sosial-iqtisadi inkişafı istiqamətində görülən işlərlə tanışlıq məqsədilə Bülbülədə olarkən keçirdiyi görüş zamanı qəsəbə sakinləri burada yeni məktəbə ehtiyac olduğunu bildirmişdilər. Dövlətimizin başçısı elə həmin gün Bülbülə qəsəbəsində 640 yerlik ümumtəhsil məktəbi binasının tikintisinə başlamaq haqqında sərəncam imzalamışdı. Sərəncama uyğun olaraq dövlət büdcəsində Azərbaycan Respublikası Prezidentinin Ehtiyat Fondundan ayrılmış vəsait hesabına yeni məktəb binasının inşasına başlanılmış və tapşırığa uyğun olaraq 327 nömrəli tam orta məktəbin yeni binası qısa vaxtda yüksək standartlara uyğun tikilmiş və keçən tədris ilində - 2012-ci il sentyabrın 15-də şagirdlərin istifadəsinə verilmişdir.
“2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı” çərçivəsində rayonda həyata keçirilən tədbirlər nəticəsində 12 məktəb binası əsaslı təmir olunmuşdur. Dövlət Proqramı çərçivəsində həyata keçiriləcək tədbirlər planına əsasən 2013-cü ildə 5 təhsil müəssisəsində əsaslı təmir işləri aparılmış, onlardan 76, 270, 275, 281 nömrəli məktəblərdə əsaslı təmir işləri başa çatdırılmışdır.
Qeyd edilmişdir ki, təhsil müəssisələrində çalışan işçilərin əmək haqlarının və tələbələrin təqaüdlərinin artırılması haqqında Azərbaycan Prezidentinin sərəncamları, Bakıətrafı qəsəbələrin sosial-iqtisadi inkişafı ilə bağlı Dövlət Proqramı və Heydər Əliyev Fondunun prezidenti, UNESKO-nun və İSESCO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə həyata keçirilən “Yeniləşən Azərbaycana yeni məktəb proqramı” və digər irimiqyaslı layihələr qarşıya qoyulan vəzifələrin icrasına, tədris müəssisələrinin maddi-texniki bazasının möhkəmlənməsinə yönəldilmişdir.
Bildirilmişdir ki, ötən tədris ilində Suraxanı rayonu təhsil işçiləri bir sıra nailiyyətlər qazanmışlar. Belə ki, 2012-2013-cü tədris ilində keçirilmiş “Ən yaxşı ümumi təhsil müəssisəsi” müsabiqəsinin qalibləri arasında 275 nömrəli tam orta məktəb də olmuşdur. 2012-2013-cü tədris ilində rayon ərazisində yerləşən 34 orta ümumtəhsil məktəbini və Xarici Dillər Təmayüllü Gimnaziyanı (XDTG) 1.899 şagird bitirmiş, onlardan 1.631 nəfəri ali məktəblərə qəbul olunmaq üçün sənəd vermiş və 992 nəfər tələbə adını qazanmışdır.
Abituriyentlərdən 49 nəfəri 600-dən yuxarı bal toplamışdır. Yüksək balla ali məktəbə daxil olmuş 5 məzun isə Azərbaycan Respublikasının Prezidenti İlham Əliyevin müvafiq sərəncamı ilə Prezident təqaüdçüsü adına layiq görülmüşdür. 278 nömrəli məktəbin 9 məzunu, 275 nömrəli məktəbin 6 məzunu, XDTG-nin 5 məzunu, 270 nömrəli məktəbin 4 məzunu 600-dən yuxarı bal toplamışdır.
Tədbirdə çıxış edənlər göstərilən diqqət və qayğıya görə dövlətimizin başçısına minnətdarlıqlarını bildirmişlər. Sonra ilk zəng şagirdləri dərsə səsləmişdir.
Rayonun bütün məktəblərində VIII-XI siniflərdə ilk dərs “Mənim ölkəm, mənim şəhərim, mənim rayonum” mövzusunda vətənpərvərlik dərsi olmuşdur. Şagirdlərə son illərdə ölkəmizdə, şəhərimizdə, rayonumuzda aparılan genişmiqyaslı abadlıq-quruculuq işlərindən, o cümlədən Azərbaycan təhsilinə göstərilən diqqət və qayğıdan ətraflı danışılmışdır. V-XI sinif şagirdlərinin hər birinə bu uğurlardan bəhs edən xüsusi kitab hədiyyə edilmişdir.
İlk dərsdə rayon rəhbərliyi, rayondan Milli Məclisə seçilmiş deputatlar iştirak etmişlər.