ELM VƏ TƏHSİL
Biologiya və Tibb Elmləri Bölməsinin büro iclası keçirilib
Bakı, 21 oktyabr, AZƏRTAC
Oktyabrın 21-də AMEA-nın Biologiya və Tibb Elmləri Bölməsinin (BTEB) növbəti büro iclası keçirilib.
AMEA-dan AZƏRTAC-a bildirilib ki, iclası bölmənin akademik-katibi, akademik Əhliman Əmiraslanov açaraq tədbirin gündəliyi barədə iştirakçılara məlumat verib.
Sonra YT Parkla BTEB-in elmi təşkilatları arasında tədqiqat planları, tətbiqi xarakterli işlərin ölkə iqtisadiyyatının real ehtiyaclarına uyğunluğu və kommersiyalaşdırılması perspektivləri müzakirə olunub. Əhliman Əmiraslanov institutların patentlərinin tətbiqi ilə bağlı tapşırıq və tövsiyələrini verib.
İclasda, həmçinin “Azərbaycan faunasının taksonomik spektri (onurğalılar)” toplusu üzrə işçi qrupunun tərkibinin təsdiq edilməsi haqqında məsələ müzakirə edilib. Ə.Əmiraslanov oktyabrın 8-də Nazirlər Kabineti yanında Terminologiya Komissiyasının strukturunda fəaliyyət göstərən Biologiya və Tibb Elmləri Bölməsinin iclasının keçirildiyini xatırladıb, bu tədbirdə işçi qrupun yaradılmasının məqsədəuyğun hesab edildiyini bildirib.
Daha sonra büro qeyd edilən qrupun tərkibi haqqında müvafiq qərar qəbul edib.
Tədbirdə Zoologiya İnstitutunun direktoru, fizika üzrə fəlsəfə doktoru, dosent Elman Yusifovun 60 illik yubileyi haqqında məlumat verilib, alimə BTEB-in Fəxri fərmanının verilməsi qərara alınıb.
İclasda bir sıra kadr məsələləri ilə bağlı müvafiq qərarlar da qəbul edilib.
Sonda akademik Əhliman Əmiraslanov bölmənin elmi müəssisə və təşkilatlarının 2019-cu il üzrə hesabatlarının hazırlanması ilə bağlı tapşırıq verib.