SİYASƏT
Bolqarıstanın “Trud” qəzeti Azərbaycan səfirinin müsahibəsini dərc etmişdir
Sofiya , 29 may (AZƏRTAC). Azərbaycanın Bolqarıstandakı səfiri Emil Kərimov bu ölkənin “Trud” qəzetinə müsahibə vermişdir. O, müsahibəsində Naxçıvan Muxtar Respublikasının yaradılmasının 90 illiyi, 28 May - Respublika Gününün tarixi, Azərbaycanın müstəqilliyinin bərpası, Ermənistan-Azərbaycan, Dağlıq Qarabağ münaqişəsi, ölkəmizin sürətli inkişafı və s. məsələlərdən danışmışdır. E.Kərimov Azərbaycanın ən qədim və gözəl məkanlarından biri olan Naxçıvan Muxtar Respublikası barədə məlumat vermiş, bu il muxtar respublikanın 90 illik yubileyinin qeyd edildiyini bildirmişdir. O, Naxçıvan Muxtar Respublikasının, ümumiyyətlə, Azərbaycanın qədim tarixi, görkəmli xadimləri, zəngin mədəniyyəti, gözəl təbiəti, tarixi abidələri, şəhərləri və mətbəxi barədə söhbət açmışdır. Səfir Azərbaycan xalqının ümummilli lideri Heydər Əliyevin Naxçıvan Muxtar Respublikasının paytaxtı qədim Naxçıvan şəhərində anadan olduğunu qeyd etmiş və bolqar turistləri muxtar respublikaya səfərə dəvət etmişdir.
Diplomat 1918-ci il mayın 28-də müsəlman Şərqində ilk demokratik dövlət olan Azərbaycan Xalq Cümhuriyyətinin yaranmasından bəhs etmiş, bu müstəqilliyin cəmi iki il sürdüyünü, buna baxmayaraq, həmin illər ərzində dövlət rəmzlərinin təsdiq edildiyini, xarici dövlətlərlə diplomatik əlaqələrin qurulduğunu, məhz 1918-ci ildə ölkədə parlamentin, ilk ali təhsil müəssisəsi olan Bakı Dövlət Universitetinin yarandığını qeyd etmişdir. Səfir 1991-ci il oktyabrın 18-də Azərbaycanın öz müstəqilliyini bərpa etdiyini bildirmiş, ötən 23 ildə qazanılan nailiyyətlərdən bəhs etmiş, müstəqilliyimizin ilk illərində yaranmış ağır siyasi, iqtisadi vəziyyət barədə danışmışdır. O, Ermənistanın Azərbaycan torpaqlarına hərbi təcavüzü nəticəsində ərazimizin 20 faizinin işğal edildiyini, bir milyondan çox azərbaycanlının doğma yurdlarından didərgin düşdüyünü də diqqətə çatdırmışdır. Diplomat bu çətin dövrdə xalqımızın müraciəti ilə ulu öndər Heydər Əliyevin hakimiyyətə qayıtması, onun müdrik siyasəti sayəsində ölkənin ağır vəziyyətdən çıxması, Dağlıq Qarabağ münaqişəsində Azərbaycan və Ermənistan arasında atəşkəs haqda razılığa gəlinməsi, problemin sülh yolu ilə həlli istiqamətində danışıqlara başlanılması, ölkədə sabit siyasi və iqtisadi vəziyyətin yaradılması, iqtisadiyyatın dirçəldilməsi barədə söhbət açmışdır. Heydər Əliyevin siyasi kursunun davamçısı, Azərbaycan Respublikasının Prezidenti İlham Əliyev tərəfindən bütün sahələrdə aparılmış uğurlu islahatlar nəticəsində iqtisadiyyatımızın sürətlə inkişaf etməsi, dövlət başçısının uğurlu neft strategiyası ilə ölkəmizin Avropanın enerji təhlükəsizliyinin təminində regionda mühüm rol oynaması, Cənubi Qafqazda lider dövlətə çevrilməsi diqqətə çatdırılmışdır.
Səfir BMT Təhlükəsizlik Şurası tərəfindən Dağlıq Qarabağ münaqişəsi ilə bağlı qəbul olunmuş dörd qətnaməyə Ermənistanın əməl etməməsinin və torpaqlarımızı işğal altında saxlamasının regionda böyük təhlükə yaratdığını bildirmişdir. E.Kərimov yeni tariximizin ən önəmli hadisələrindən biri olan Azərbaycan Respublikasının ilk telekommunikasiya peyki “Azərspace-1”in uğurla orbitə buraxılması barədə məlumat vermişdir. Həmçinin ölkəmizin son illər ərzində bir çox beynəlxalq əhəmiyyət daşıyan tədbirlərə ev sahibliyi etdiyini vurğulamış, 2015-ci ildə Birinci Avropa Oyunlarının Azərbaycanda keçiriləcəyini söyləmişdir. Diplomat, həmçinin Azərbaycan ilə Bolqarıstan arasındakı münasibətlərin mövcud vəziyyəti, əlaqələrin daha da genişləndirilməsi perspektivləri barədə ətraflı məlumat vermişdir.
İqbal Hacıyev
AZƏRTAC-ın xüsusi müxbiri
Sofiya