Böyük Britaniyada Xocalı həftəsi davam edir
London, 28 fevral (AZƏRTAC). London Universitetində fəaliyyət göstərən Azərbaycan Cəmiyyətinin təşkilatçılığı və ölkəmizin Böyük Britaniyadakı səfirliyinin dəstəyi ilə Xocalı soyqırımının 21-ci ildönümünə həsr olunmuş tədbir keçirilmişdir.
AZƏRTAC xəbər verir ki, tədbirdə səfirliyin əməkdaşları, bu ölkədə fəaliyyət göstərən Azərbaycan diaspor təşkilatlarının təmsilçiləri Britaniyanın və ölkəmizin ictimaiyyətinin nümayəndələri, müxtəlif universitetlərdən tələbələr iştirak etmişlər.
Universitetin Azərbaycan Cəmiyyətinin sədri Şahin Abbasov tədbirin məqsədindən danışmış, Xocalı faciəsi haqqında iştirakçılara ətraflı məlumat vermişdir.
Azərbaycanın Böyük Britaniyadakı səfiri Fəxrəddin Qurbanov Xocalı soyqırımı qurbanlarının xatirəsini anmağın və dünya ictimaiyyətinə çatdırmağın əhəmiyyətini vurğulamışdır. Bildirmişdir ki, Böyük Britaniyanın ayrı-ayrı şəhərlərində və dünyanın müxtəlif ölkələrində Xocalı soyqırımı yad edilməkdədir və ildən-ilə tədbirlərin sayı artmaqda davam edir.
Bu uğurda tələbələrin fəal rolunu qeyd edən səfir Heydər Əliyev Fondunun vitse-prezidenti, İslam Əməkdaşlıq Təşkilatı Gənclər Forumunun mədəniyyətlərarası dialoq üzrə baş əlaqələndiricisi Leyla xanım Əliyevanın təşəbbüsü ilə elan edilmiş “Xocalıya ədalət!” beynəlxalq məlumat və təşviqat kampaniyasının xüsusi rolunu vurğulamışdır.
Londonda fəaliyyət göstərən “Azərbaycan Evi”nin nümayəndəsi
Fəridə Pənahova törədilmiş hadisələrin beynəlxalq hüququn normalarına və prinsiplərinə əsasən məhz soyqırımı olduğunu bildirmişdir. Tarixə nəzər salan F.Pənahova dünyada törədilən bir çox soyqırımı aktlarından bəhs etmiş, Xocalı qətliamı və Azərbaycan həqiqətləri haqqında ətraflı məlumat vermiş, işğalçı Ermənistan hərbi qüvvələrinin xalqımıza qarşı törətdikləri vəhşiliklərdən danışmışdır.
Xocalı soyqırımını törədənlərin cəzalandırılacağına əminliyini ifadə edən “Azərbaycan Evi”nin nümayəndəsi, bu cür ədalətsizliklərin bir daha baş verməməsini arzulamışdır.
London, Oxford və Leeds universitetlərinin müəllimi, Ermənistan-Azərbaycan, Dağlıq Qarabağ münaqişəsi üzrə ekspert Tamara Draqadze tarixi faktlara əsaslanaraq dünyada və Qafqaz bölgəsində törədilmiş soyqırımı aktları haqqında məlumat vermişdir. Faciədən sonra Xocalını ziyarət edən Qərb jurnalistlərinin burada törədilmiş soyqırımının nə dərəcədə dəhşətli olduğunu sübut etdiyini diqqətə çatdırmışdır. O, təkzibedilməz faktların Xocalıda baş verənlərin həqiqətən də soyqırımı olduğunu isbat etdiyini vurğulamışdır.
Anqlo-Azərbaycan teatrının qurucusu və direktoru Devid Perri Xocalıda baş verənlərin dəhşətli soyqırımı və bəşəri faciə olduğunu diqqətə çatdırmışdır. O, Xocalı faciəsinin necə baş verdiyini, şəhərə giriş və dinc əhalinin vəhşicəsinə öldürülməsinin necə planlaşdırıldığını tarixi faktlarla izah etmişdir. Gələcəkdə bu cür hadisələrin bir daha təkrarlanmaması üçün dünya ictimaiyyətinin Xocalıda baş verənləri unutmamasının vacibliyini vurğulamışdır.
Daha sonra Heydər Əliyev Fondu tərəfindən hazırlanmış və Xocalı həqiqətlərini əks etdirən videomaterial nümayiş etdirilmiş, iştirakçılara bukletlər paylanılmışdır.
Orxan İsmayılov
AZƏRTAC-ın xüsusi müxbiri
London
Bölmənin digər xəbərləri
