Azərbaycan ədəbiyyatı və publisistikasında Xocalı soyqırımı mövzusu
Bakı, 27 fevral, AZƏRTAC
AMEA Nizami Gəncəvi adına Ədəbiyyat İnstitutunda Xocalı soyqırımının 34-cü ildönümünə həsr olunmuş tədbir keçirilib. Tədbir Xocalı faciəsi qurbanlarının əziz xatirəsinin bir dəqiqəlik sükutla yad edilməsi ilə başlayıb.
İnstitutdan AZƏRTAC-a bildirilib ki, tədbirdə çıxış edən elmi katib dosent Aygün Bağırlı 1992-ci il fevralın 26-da Xocalıda baş vermiş hadisələr, erməni silahlı qüvvələri tərəfindən Azərbaycan xalqına qarşı törədilmiş vəhşiliklər və insanlıq əleyhinə cinayətlər barədə ətraflı məlumat verib. O, Xocalı soyqırımının milli yaddaşımızda qara səhifə olduğunu vurğulayıb.
Filologiya elmləri doktoru Mərziyyə Nəcəfova çıxışında Xocalı faciəsinin Azərbaycan ədəbiyyatında, xüsusilə poeziyada geniş əks olunduğunu qeyd edib. Bildirib ki, Nurəngiz Gün, Zəlimxan Yaqub, Nüsrət Kəsəmənli, Sabir Rüstəmxanlı, Bəxtiyar Vahabzadə, Xəlil Rza Ulutürk kimi görkəmli söz ustadlarının yaradıcılığında Xocalı mövzusu mühüm yer tutur. Xüsusilə Nurəngiz Günün “Xocalı simfoniyası” poemasının bir neçə xarici dilə tərcümə olunması və əsər əsasında filmin çəkilməsi faciənin beynəlxalq miqyasda tanıdılması baxımından əhəmiyyətli hadisə kimi dəyərləndirilib. Qeyd edilib ki, Xocalı şəhidlərinə həsr olunmuş yüzlərlə kitab nəşr edilib, publisistik və bədii ədəbiyyatda mövzu geniş şəkildə işlənilib.
Sonra filologiya elmləri doktoru, dosent Gülbəniz Babayevanın “Azərbaycan publisistikasında Xocalı soyqırımı” mövzusunda məruzəsi dinlənilib.
Tədbir iştirakçıları Xocalı soyqırımının tarixi həqiqətlərinin elmi müstəvidə araşdırılmasının, ədəbiyyat və publisistika vasitəsilə gələcək nəsillərə çatdırılmasının vacibliyini bir daha vurğulayıblar.
Bölmənin digər xəbərləri
