Mbappe Mao Tszedunla bağlı sözlərinə görə Çindən üzr istəyib
Bakı, 27 oktyabr, AZƏRTAC
Futbol üzrə Fransa millisinin kapitanı Kilian Mbappe Mao Tszedunun təsvir olunduğu memlə bağlı açıqlamalarına görə üzr istəyib. Çin tərəfinin mənfi reaksiyasından sonra bir neçə yerli brend futbolçu ilə əməkdaşlığın dayandırıldığı elan edib. Bu hadisə beynəlxalq səviyyədə tanınan şəxslər üçün Çin bazarının nə dərəcədə həssas ola biləcəyini bir daha göstərib.
AZƏRTAC xəbər verir ki, yayılan videoda Mbappe ən çox bəyəndiyi mem kimi üzünün Mao Tszedunun fotosuna montaj edildiyi şəkli göstərir.
27 yaşlı futbolçu daha sonra “X” sosial şəbəkəsində vəziyyətlə bağlı açıqlama verərək sözlərini düşünmədən söylədiyini, bunun Çindəki bir çox insanın, eləcə də dünyanın müxtəlif ölkələrində yaşayan Çin icmalarının nümayəndələrinin hisslərinə toxuna biləcəyini etiraf edib.
“Sözlərimdən inciyən hər kəsdən üzr istəyirəm. Məqsədim bu deyildi. Çin xalqına və onun tarixinə dərin hörmət bəsləyirəm və baş verənlərə görə səmimi qəlbdən təəssüflənirəm”, – deyə Mbappe yazıb.
“China Daily” nəşrinin məlumatına görə, futbolçunun açıqlaması onun çinli azarkeşləri arasında narazılıq yaradıb və yerli şirkətlərlə kommersiya müqavilələrini təhlükə altına salıb.
Süd məhsulları istehsalçısı “Mengniu”, “Shanghai Milkground Food Tech” şirkəti və “Eastroc Beverage” içki istehsalçısı da daxil olmaqla, bir neçə Çin brendi Mbappe ilə əməkdaşlığı dayandırdığını elan edib. Şirkət nümayəndələri “Çin xalqının hisslərini təhqir edən hər hansı sözə və ya hərəkətə qarşı sıfır dözümlülük” nümayiş etdirdiklərini bildiriblər.
“The Paper” nəşrinin çərşənbə axşamı yaydığı məlumata görə, Çinin dövlət televiziyası Mbappenin iştirak etdiyi İspaniya futbol çempionatı – La Liqanın oyunlarının və tədbirlərinin yayımlarını dayandırıb. Bundan başqa, futbolçunun çəkildiyi reklam çarxları da efirdən çıxarılıb.
La Liqanın prezidenti Xavyer Tebas da “X” sosial şəbəkəsində məsələ ilə bağlı açıqlama verərək futbolçunun sözlərinə görə təəssüfləndiyini bildirib və üzr istəyib.
Bölmənin digər xəbərləri
