Almaniyanın 5 əyaləti nüvə tullantılarının basdırılması üçün ərazi seçimindən imtina edib
Berlin, 27 oktyabr, AZƏRTAC
Almaniyada radioaktiv nüvə tullantılarının uzunmüddətli saxlanılması üçün uyğun ərazinin müəyyənləşdirilməsi prosesində beş əyalət namizədlər siyahısından çıxarılıb.
AZƏRTAC yerli mediaya istinadla xəbər verir ki, Reynland-Pfalts, Hessen, Berlin, Saksoniya və Saarland əyalətləri ərazi seçimindən imtina edib.
Əvvəlki mərhələdə Almaniya ərazisinin təxminən 25 faizi mümkün saxlanc yeri kimi nəzərdən keçirilsə də, son qiymətləndirmədən sonra seçim üçün ölkə ərazisinin 5 faizindən az hissəsi uyğun hesab edilib. Lakin ərazi seçimi barədə yekun qərar Bundestaq tərəfindən qəbil olunacaq.
Almaniya parlamenti yeni seçim prosesinə başlanması barədə 2013-cü ildə qərar qəbul edib. Məqsəd ölkədə 60 ildən artıq müddətdə nüvə enerjisindən istifadə nəticəsində yaranmış təxminən 27 min kubmetr yüksək radioaktiv tullantının daimi saxlanılması üçün uyğun yerin 2050-ci ilədək müəyyənləşdirilməsidir.
Elvin Mövsüm
Bölmənin digər xəbərləri
