Vətən uğrunda yazılan qəhrəmanlıq dastanı - Azad Hümbətov
Bakı, 27 oktyabr, AZƏRTAC
Vətən torpağının azadlığı uğrunda canından keçən igidlərin adı xalqın yaddaşında əbədi yaşayır. İkinci Qarabağ müharibəsində qəhrəmanlığı və fədakarlığı ilə seçilən belə igidlərimizdən biri də Azərbaycan Silahlı Qüvvələrinin baş leytenantı, Vətən Müharibəsi Qəhrəmanı Azad Arif oğlu Hümbətovdur.
AZƏRTAC Azad Hümbətovun Vətən uğrunda yazılan qəhrəmanlıq dastanını təqdim edir.
Azad Hümbətov 1996-cı il yanvarın 24-də Bakı şəhərində ziyalı ailəsində anadan olub. 291 nömrəli Ekologiya liseyini bitirdikdən sonra 2013-cü ildə Heydər Əliyev adına Hərbi İnstituta daxil olub. “Tank bölmə, hissə və birləşmələrin döyüşə tətbiqi” ixtisası üzrə təhsilini 2017-ci ildə leytenant rütbəsi ilə başa vuraraq Füzuli rayonunun Horadiz şəhərində yerləşən hərbi hissədə tank taqımının komandiri kimi xidmətə başlayıb.
Onun Vətənə bağlılığı hələ kursantlıq illərindən özünü göstərib. 2016-cı ilin Aprel döyüşləri zamanı cəbhəyə getmək istəyən Azad anasına “Poqonlarımızı versinlər, gedək Vətənimizin müdafiəsinə” deyib. Bu sözlər gənc zabitin Vətənə xidmət amalını və hərbi andına sədaqətini ifadə edirdi.
Azad Hümbətov hərbi xidmətlə yanaşı, şəhid ailələrinə göstərdiyi diqqət və qayğı ilə də seçilirdi. O, döyüş yoldaşları ilə birlikdə bayram günlərində şəhid ailələrini ziyarət edir, onların övladlarına hədiyyələr aparırdı.
2018-ci ildə Azərbaycan Silahlı Qüvvələrinin 100 illik yubileyinə həsr olunmuş hərbi paradda bayraqdar kimi iştirak edən Azad “Azərbaycan Ordusunun 100 illiyi (1918–2018)” yubiley medalı ilə təltif olunub. 2020-ci ilin əvvəlində Zabit heyətini təkmilləşdirmə kursunu bitirib, həmin il iyunun 26-da baş leytenant rütbəsi alıb.
Vətən müharibəsi başlayanda Azad Hümbətov tank taqımının komandiri kimi Füzuli istiqamətində döyüşlərə qatılıb. Düşmənin müdafiə xətlərinin yarılmasında, canlı qüvvə və texnikasının məhv edilməsində fəallıq göstərib. Tank bölüyünün komandiri yaralandıqdan sonra bölüyə rəhbərlik etmək də ona həvalə olunub. Füzuli, Xocalı, Xocavənd, Qubadlı və Laçın istiqamətlərində döyüş əməliyyatlarında iştirak edən zabit düşmənin beş tankını ələ keçirərək öz mövqelərimizə gətirməyə nail olub, dəfələrlə yaralı silahdaşlarını təhlükəli ərazilərdən çıxarıb.
Onun qəhrəmanlığını göstərən ən təsirli hadisələrdən biri yaralı döyüş yoldaşını xilas etməsi olub. Döyüş zamanı komandanlıq etdiyi tank minaya düşüb, Azad ayağından yaralanıb. Tankın mexaniki daha ağır xəsarət aldığından zabit öz yarasına baxmayaraq, onu xilas etmək qərarına gəlib. Silahdaşını belində daşıyaraq meşəlik əraziyə aparıb və çətin şəraitdə iki gün ərzində onu tək buraxmadan öz döyüş postlarına çatmağa nail olub.
Vəziyyəti ağırlaşdığı üçün Beyləqanda müalicəyə göndərilən Azad sağalmasını gözləmədən yenidən cəbhəyə qayıdıb. Ailəsi onun yaralandığını və müalicəsini yarımçıq qoyaraq döyüşə döndüyünü yalnız şəhid olmasından sonra öyrənib.
Anası Leyla Hümbətova oğlunun torpaqlarımızın azadlığı uğrunda canından keçməyə hazır olduğunu bildirib: “Azad həmişə deyirdi ki, torpaqlarımızı işğaldan azad edib üçrəngli Bayrağımızı orada dalğalandıracağam. Bu arzu oğluma canı bahasına başa gəldi, amma Azad verdiyi sözü tutdu, arzusuna çatdı”.
2020-ci il oktyabrın 27-də Azad Hümbətov Füzuli istiqamətində gedən döyüşlərdə qəhrəmancasına şəhid olub. O, Hərbi Memorial Məzarlıqda dəfn edilib.
Azərbaycan Prezidenti İlham Əliyevin müvafiq Sərəncamı ilə Azad Hümbətova ölümündən sonra “Vətən Müharibəsi Qəhrəmanı” adı verilib. O, həmçinin “Vətən uğrunda”, “Füzulinin azad olunmasına görə” və “Xocavəndin azad olunmasına görə” medalları ilə təltif edilib.
Qəhrəmanın xatirəsi əbədiləşdirilərək təhsil aldığı 291 nömrəli Ekologiya liseyinə və Bakı şəhərinin Nərimanov rayonundakı küçələrdən birinə onun adı verilib.
Azad Hümbətovun cəmi 24 il davam edən ömrü Vətənə sədaqətin, silahdaşına bağlılığın və fədakarlığın nümunəsidir. O, şəxsi həyatından və arzularından əvvəl Vətənin azadlığını seçdi. Bu gün onun adı uğrunda canından keçdiyi torpaqlarda dalğalanan üçrəngli Bayrağımızla, xalqımızın yaddaşında və gələcək nəsillərə ötürülən qəhrəmanlıq salnaməsində yaşayır.
Müxbir - Göyçək Mahmudlu
Bölmənin digər xəbərləri
