DÜNYA
Çinin daha bir şəhəri “omikron”la mübarizə aparır
Pekin, 31 yanvar, AZƏRTAC
Çinin Cıcian vilayətinin paytaxtı Hancou şəhəri COVID-19 virusunun “omikron” ştamı ilə mübarizə aparır.
AZƏRTAC vilayət hökumətinin məlumatına istinadla xəbər verir ki, son günlər şəhərdə “omikron” ştamına 80-ə yaxın yoluxma aşkarlanıb. Bütün xəstələr təcrid olunaraq, xəstəxanalara yerləşdirilib. Onlarla təmasda olmuş minlərlə sakin hazırda karantindədir.
Şəhərdə yoluxma zəncirini tapmaq və dayandırmaq üçün Bincian rayonunda kütləvi test prosesi həyata keçirilir. Bunun üçün bir neçə səyyar test məntəqəsi quraşdırılıb. Şəhərdə hazırda bir yüksək riskli zona, 10 orta riskli zona müəyyən edilib. Həmin zonaların sakinlərinə evlərini tərk etməmək tövsiyə olunub.
Səhiyyə qurumlarının mütəxəssisləri virusa ilk yoluxan şəxsin və onun 57 iş yoldaşının Çinin 4 vilayətinə səfər etdiyini, nəticədə virusun həmin vilayətlərə də yayıldığını bildirirlər. Həmin şəxslərin bir neçə toy mərasimində də iştirak etməsi yoluxanların sayının çox olması ehtimalını yaradıb. Güman olunur ki, “omikron” ştamı şəhərdə ilk yoluxan şəxsin çalışdığı şirkətin xaricdən idxal etdiyi bəzi mallar vasitəsilə yayılıb. Belə ki, həmin malların səthindən götürülmüş nümunələrin test cavabı müsbət olub. Səlahiyyətli qurumlar xaricdən gələn məhsullara nəzarəti gücləndirib. Bundan başqa, şəhərə girən və çıxan hər bir şəxs 48 saat ərzində PZR testi verməlidir.
Qeyd edək ki, Çində ilk dəfə Tiencin şəhərində “omikron” yoluxmaları qeydə alınmışdı. Ardından paytaxt Pekin də daxil olmaqla bir neçə şəhərdə də “omikron” yoluxmaları aşkarlanmışdı. COVID-19 virusuna, eləcə də “omikron” ştamına yoluxmalar başqa ölkələrlə müqayisədə xeyli az olsa da, pandemiyaya qalib gəldiyini elan etmiş, habelə ölkəyə xaricdən virus axınının qarşısını almaq üçün əcnəbilərin girişini xeyli dərəcədə məhdudlaşdıran və bununla da virusa qarşı “Sıfır dözümlülük” siyasəti tətbiq edən Çin üçün bu yoluxmalar narahatlıq doğurur.
Şahin Cəfərov
AZƏRTAC-ın xüsusi müxbiri
Pekin