“ÇOXMİLLƏTLİ MURMAN”
Murmansk, 17 fevral (AZƏRTAC). Rusiyanın qəhrəman Murmansk şəhərində bu vilayətdə fəaliyyət göstərən 17 milli birlik tərəfindən hazırlanmış “Çoxmillətli Murman” sərgisi açılmışdır.
Ruslar, azərbaycanlılar, ukraynalılar, belaruslar, litvalılar, yəhudilər, almanlar... - sərt iqlimli bu şimal diyarı onların hamısı üçün doğma olmuşdur. Lakin öz tarixi vətənlərinin hüdudlarından kənarda yaşayan milli azlıqların nümayəndələri öz adətlərini və mədəniyyətlərini qayğı ilə qoruyurlar.
Vilayət hökumətinin ictimai əlaqələr idarəsinin rəisi Svetlana Parşkova sərgini açaraq oraya toplaşanları vilayət qubernatoru Yuri Yevdakimovun adından salamlamış, diyarın sosial-iqtisadi inkişafına layiqli töhfə verən bütün millətlərin nümayəndələrinə təşəkkür etmişdir.
Ekspozisiyanın böyük bir bölməsi Ümumrusiya Azərbaycanlılar Konqresinin Murmansk vilayət bölməsinə məxsusdur. Nəfis tərtibatlı stendlərdə Azərbaycan milli geyimləri, poliqrafiya məhsulları, sənətkarlıq məmulatları, milli çalğı alətləri və bir sıra başqa eksponatlar nümayiş etdirilir. Viktor Andriyanovun və Hüseynbala Mirələmovun Azərbaycan Prezidenti İlham Əliyevə həsr edilmiş, “Görkəmli adamların həyatı” seriyasından Moskvada nəşr olunmuş kitab ekspozisiyada xüsusi yer tutur.
Azərbaycan diasporunun köhnə dostu, “Çoxmillətli Murman” sərgisində ölkəmizə aid bölmənin hazırlanmasında çox böyük köməyi olmuş Murmansk diyarşünaslıq muzeyinin elmi işçisi İrina Kolodka bildirmişdir: “Çoxmillətli Murman” sərgisi vilayətin ictimai və mədəni həyatında əlamətdar hadisədir.
Sərginin işlədiyi dövrdə milli-mədəni cəmiyyətlərin nümayəndələri ilə görüşlər, yaradıcılıq gecələri, ustad dərsləri keçiriləcəkdir.
Sərgiyə gələnlər rəy kitabında təşəkkürlə dolu ürək sözlərini yazırlar.
Bölmənin digər xəbərləri
