Bakı, 22 noyabr, P.İmanova, AZƏRTAC

Noyabrın 22-də Azərbaycan Turizm və Menecment Universitetinin (ATMU) təşkilatçılığı ilə “Müasir dövrdə effektiv idarəetmənin problemləri” mövzusunda V respublika elmi-praktik konfransı keçirilib.

AZƏRTAC xəbər verir ki, tədbirdə çıxış edən ATMU-nun rektoru İlham Mədətov ənənəvi keçirilən konfransın əsas məqsədinin müasir dövrümüzdə idarəetmə sistemində təzahür edən modernləşmə və yeni idarəetmə modellərinin, müasir vətəndaşı məmnun edən idarəetmənin qurulmasının zəruriliyini üzə çıxarmaqdan ibarət olduğunu söyləyib.

O bildirib ki, idarəetmə cəmiyyətin bütün sahələrini əhatə edən müxtəlif istiqamətli prosesdir. Cəmiyyətdəki bütün fəaliyyət dairələri ilə əlaqəlidir. Nəticə etibarilə insanların fəaliyyətinin nizamlanması, qaydaya salınması, kiçik və böyük kollektivlərin istiqamətləndirilməsi, istehsal, təhsil, mədəniyyət, səhiyyə sahələrinin və əmək kooperasiyasının həyata keçirilməsi, habelə canlı əməklə istehsal vasitələrinin müəyyən qaydada əlaqələndirilməsi ilə bağlıdır. Hər bir elmin predmeti olduğu kimi idarəetmənin də öz predmeti var. Elmin məzmunu da onun predmetindən daha genişdir. İdarəetmə elminin məzmununa idarəetmə nəzəriyyəsi, idarəetmə üsulları və metodları, idarəetmənin təşkili, idarəetmə texnikası daxildir. Bu bölmələrin hər biri öz növbəsində bir sıra idarəetmə amillərindən asılıdır.

Rektor qeyd edib ki, bu sahədə ali təhsil müəssisələrində aparılan elmi tədqiqatların səviyyəsinin yüksəldilməsi və intensivləşdirilməsi üçün şəraitin yaradılması təhsili idarəetmə orqanlarının səmərəli fəaliyyətindən asılıdır. Bu mənada, Prezident İlham Əliyevin 2014-cü il 22 dekabr tarixli müvafiq Sərəncamı ilə Azərbaycan Turizm İnstitutunun bazasında Azərbaycan Turizm və Menecment Universitetinin yaradılması idarəetmə sahələrində kadr hazırlığı ilə əlaqəli təhsil xidmətləri sıralarına qədəm qoyan ali təhsil ocağının üzərinə böyük vəzifələr qoyub. ATMU bu vəzifənin yüksək səviyyədə icra edilməsi üçün bütün potensialını səfərbər edib.

İlham Mədətov bugünkü konfransın müasir dövrdə effektiv idarəetmə mexanizminin daha da təkmilləşdirilməsi istiqamətində qarşıya çıxan bir sıra problemlərin uğurlu həllinə müsbət təsir göstərəcəyinə əminliyini bildirib.

Universitetin elm və inkişaf məsələləri üzrə prorektoru, professor İranə Əliyeva konfransa hazırlıq işləri barədə məlumat verib. O, müasir dövrdə konfransın mövzusunun aktuallığını qeyd edib, bu cür tədbirlərin keçirilməsinin vacibliyini vurğulayıb. Qeyd edib ki, konfransda ölkənin müxtəlif ali təhsil müəssisələrindən tədqiqatçı, alim və mütəxəssislər, doktorant və magistrantlar iştirak edirlər.

Konfransın plenar iclasında Elm və innovasiya şöbəsinin müdiri Nəsirulla Nəsirlinin “Ali təhsildə innovasiya fəaliyyəti” mövzusunda məruzəsi dinlənilib. O bildirib ki, ali təhsil müəssisəsinin innovativ fəaliyyətinin uğuru onun qarşıya qoyduğu innovativ layihələrin həyata keçirilməsi, yeniliklərin tətbiqi, tələbə və müəllim-professor heyətinin təhsilə fərqli, daha yaradıcı yanaşması ilə müəyyən edilir. İnnovasiya fəaliyyətinin əsas məqsədi təhsil müəssisəsinin səmərəli inkişafı və təhsil bazarında rəqabətqabiliyyətliliyi təmin etmək üçün müvafiq şərait yaratmaqdan ibarətdir.

Sonra ATMU-nun Karyera və kommunikasiya şöbəsinin müdiri Anar Eminov “Sosial sahələrin inkişaf etdirilməsində yeni investisiya modelləri”, Bakı Mühəndislik Universitetinin elmi işlər üzrə prorektoru Elçin Süleymanov “Azərbaycanda turizm bazarının formalaşması və inkişafının problemləri” mövzularında məruzələrlə çıxış ediblər. Məruzələrdə əsas diqqət müasir dövrdə idarəetmədə yol verilən nöqsanların müəyyənləşdirilməsi və aradan qaldırılması, idarəetmə sahəsində yeniliklərin tətbiqi imkanlarının araşdırılması və digər məsələlərə yönəlib.

Sonra konfrans işini “Tarixi-mədəni abidələrin tanıdılmasında turizmin rolu”, “Turizm və xidmət sahələrinin idarə edilməsi”, “İdarəetmə mədəniyyəti və idarəetməyə innovativ yanaşma”, “Etnik münasibətlər və dillər”, “İqtisadi inkişaf proseslərinin idarə edilməsi” bölmələri üzrə davam etdirib. Bölmə iclaslarında ümumilikdə 90-dan çox məruzə dinlənilib.