REGİONLAR
Emin Şıxəliyev: Bu gün hər kəs Qələbə arzusu ilə yaşayır və haqq işimizdə qalib gələcəyimizə tam inanır
Naxçıvan, 3 oktyabr, AZƏRTAC
Artıq uzun illərdir ki, Ermənistan-Azərbaycan Dağlıq Qarabağ münaqişəsi öz siyasi, hüquqi həllini tapmır. Bu da birbaşa rəsmi İrəvanın qeyri-konstruktiv mövqedən çıxış etməsi, danışıqlar prosesini müntəzəm olaraq pozması ilə bağlıdır. Ümumiyyətlə, münaqişə Ermənistanın aqressiv və işğalçı siyasətinin nəticəsidir və buna mütləq son qoyulmalıdır. Təcavüzkarın bu torpaqlardan xoşluqla çıxacağı isə məntiqə uyğun deyil. Ona görə güc tətbiqi zərurətə çevrilib.
AZƏRTAC-ın Naxçıvan bürosuna müsahibəsində bu fikirləri AMEA Naxçıvan Bölməsinin Tarix, Etnoqrafiya və Arxeologiya İnstitutunun Qafqaz tarixi şöbəsinin müdiri, tarix üzrə fəlsəfə doktoru, dosent Emin Arif Şıxəliyev deyib.
Emin Şıxəliyev bildirib ki, 1994-cü ildən ATƏT-in Minsk qrupu Dağlıq Qarabağ münaqişəsinin sülh yolu ilə həllində Azərbaycan ilə Ermənistan arasında vasitəçilik etməyi öz üzərinə götürüb. Lakin 30 ilə yaxındır davam edən danışıqlara baxmayaraq, Minsk qrupunun regionda sülh yaratmaq cəhdləri iflasa uğrayıb. Əlbəttə ki, ATƏT münaqişələrin həlli üçün müəyyən səylər göstərib, lakin bu səylərdə ciddi çatışmazlıqlar var. BMT Təhlükəsizlik Şurasının 822, 853, 874 və 884 saylı qətnamələrinə əsasən Ermənistan silahlı qüvvələri işğal edilmiş ərazilərdən qeyd-şərtsiz çıxarılmalıdır. Buna baxmayaraq, ATƏT-in Minsk qrupunun həmsədr ölkələri Dağlıq Qarabağ münaqişəsi haqda dəqiq mövqelərini bəyan etməkdən çəkinirlər. Bu qurum çox vaxt ümumi və qeyri-müəyyən bəyanatlar verir və bir-birinə zidd olan fikirlər səsləndirir. Onlar Dağlıq Qarabağ münaqişəsinin həlli ilə bağlı təkliflər verdiklərini iddia edirlər, lakin münaqişənin həlli ilə bağlı güclü mövqeyin nümayiş etdirilməsi lazım olduqda, Minsk qrupu Azərbaycan ilə Ermənistanın bu problemi öz aralarında həll etməli olduğunu və qəbul ediləcək bütün qərarların qurum tərəfindən dəstəklənəcəyini bildirirdi. Məsələyə belə münasibət qurumun fəaliyyətinin iflasa uğraması demək idi və Azərbaycanda haqlı olaraq ATƏT-in Minsk qrupunun fəaliyyətinə inamsızlıq yaratdı.
“Həm beynəlxalq təşkilatların, həm ATƏT-in Minsk qrupu üzvlərinin, həm də digər dövlətlərin yeritdikləri ikili standart siyasətinin nəticəsidir ki, Ermənistan tərəfi problemin real həllinə yanaşmaq istəmir. Üstəlik, atəşkəs rejimini sıx-sıx pozur, mülki əhalini atəşə tutmaqdan, qətlə yetirməkdən çəkinmir. Olduqca səriştəsiz bir siyasətçi olan Ermənistanın baş naziri Nikol Paşinyanın “Qarabağ Ermənistandır. Nöqtə” kimi özündən razı və beynəlxalq hüquqa zidd olan ağılsız bəyanatlar səsləndirməsi və yeni bir macəra həvəsi ilə atdığı yanlış addımlar Azərbaycanı konkret cavab addımları atmağa məcbur etdi”, - deyən Emin Şıxəliyev vurğulayıb ki, 27 sentyabr 2020-ci il tarixində Ermənistan tərəfindən atəşkəsin pozularaq Azərbaycan torpaqlarına edilən hücum genişmiqyaslı əks-hücumu zərurətə çevirdi. Nəticədə Azərbaycan Ordusu işğal altındakı mühüm yerləri, strateji əraziləri və yüksəklikləri ələ keçirdi. “Qarabağ Ermənistandır” deyən, Şuşada yallı oynayıb andiçmə mərasimlərində iştirak edən, işğal altındakı torpaqlarda məskunlaşma aparan və bura terrorist qruplar yerləşdirən, danışıqlarda əldə olunmuş razılıqları alt-üst edən və dünənə qədər ağzından pafos tökülən siyasi demaqoq Nikol Paşinyan bir neçə gündür, məzlum vəziyyətə düşərək dünya liderlərindən imdad diləməkdədir. Çünki o, yaxşı bilir ki, məhz onun 2018-ci ildən sonra apardığı siyasət nəticəsində regionda müharibə başlayıb, sabah erməni cəmiyyəti torpaq və insan itkisini bu ağılsıza bağışlamayacaq.
Tarix, Etnoqrafiya və Arxeologiya İnstitutunun Qafqaz tarixi şöbəsinin müdiri qeyd edib ki, Azərbaycan qarşısında məğlub olduğunu anlayan Ermənistan tərəfi çarəni saxta xəbərlər yaymaqda görür. Reallıq budur ki, Azərbaycan tərəfi hərbi əməliyyatları yalnız işğal altında olan öz torpaqlarında aparır və bu müharibədə haqlı tərəf olduğunu sübut etməyi də bacarır. Əgər beynəlxalq təşkilatlar və dövlətlər həqiqətən müharibədən narahatdırlarsa, insan ölümünə səbəb olan bu vəziyyətdən gərgin hisslər keçirirlərsə, ədalətin bərqərar olmasını istəyirlərsə, işğalçı tərəf olan Ermənistanın BMT Təhlükəsizlik Şurasının qətnamələrinə əməl edərək dərhal işğal etdiyi əraziləri boşaltmasını təmin etməli, lazım gələrsə təzyiq göstərməlidirlər. Qeyd olunduğu kimi, Azərbaycan heç bir dövlətin ərazisinə hücum etməyib, hərbi əməliyyatları öz işğal olunmuş torpaqlarında aparır. Bu məsələdə Azərbaycan haqlıdır. İnanırıq ki, ölkəmiz bu haqq işində qalib gələcək. Azərbaycanda dövlət-ordu-xalq birliyi sarsılmazdır. Məhz Azərbaycan Respublikasının Prezidenti, Ali Baş Komandan İlham Əliyevin uzaqgörən siyasəti, qətiyyətli strateji addımları, zəfərə səsləyən çıxışları, ordumuzun cəbhədə əldə etdiyi böyük uğurlar Azərbaycan xalqında ruh yüksəkliyi yaradıb. Ona görə də bu gün hər kəs Qələbə arzusu ilə yaşayır və haqq işimizdə qalib gələcəyimizə tam inanır.