Bakı, 7 iyun, AZƏRTAC

Bu gün Azərbaycan dünyada idman ölkəsi kimi tanınır. Respublikamızda mötəbər beynəlxalq turnirlər, o cümlədən Avropa və dünya çempionatları yüksək səviyyədə təşkil olunur. Beynəlxalq idman qurumları artıq mötəbər yarışların təşkilini tərəddüd etmədən ölkəmizə həvalə edirlər. Bu mötəbər yarışlardan biri də mayın 25-dən iyunun 4-dək keçirilən və tanınmış şahmatçı, qrossmeyster Vüqar Həşimovun xatirəsinə həsr olunan “Shamkir Chess 2016” beynəlxalq şahmat turniridir. Yarışda dünyanın güclü 10 zəka sahibi birincilik uğrunda mübarizə aparıb.

“Synergy Group” ASC-nin Müşahidə Şurasının sədr müavini, “Shamkir Chess 2016” turnirinin direktoru Fərid Hüseynov Vüqar Həşimov memorialının başa çatmasından sonra jurnalistlərin suallarına cavablandırıb.

- Vüqar Həşimovun xatirəsinə həsr olunan superturnir başa çatdı. Yarışın yekunu olaraq təəssüratlarınızı bilmək istərdik?

- “Shamkir Chess 2016” turniri 10 gün ərzində şahmat həvəskarları üçün əsl bayram əhval-ruhiyyəsi yaşatdı. Şəmkirdə qələbə uğrunda dünyanın aparıcı şahmatçıları mübarizə apardı. Təşkilatçı kimi, qonaqların, iştirakçıların turnirdən razı qalmasını bizim işimizə verilən ən yüksək qiymət hesab edirəm. Yarış baxımından maraqlı mübarizənin şahidi olduq. Həm Azərbaycan təmsilçiləri, həm də əcnəbi şahmatçılar qələbə uğrunda sonadək mübarizə apardılar. Bu amil yarışı daha da maraqlı etdi. Ən əsası isə Azərbaycan yığmasının lideri Şəhriyar Məmmədyarovun uğur qazanması bizə böyük sevinc bəxş etdi.

- Ümumilikdə əsas mübarizənin ABŞ təmsilçisi Fabiano Karuana ilə Hollandiya şahmatçısı Aniş Giri arasında gedəcəyi gözlənilirdi. Amma Şəhriyar Məmmədyarov son üç turda uğur qazanmaqla yarışın qalibi oldu. Yəqin, Məmmədyarovun qələbəsi sizin üçün də gözlənilməz oldu?

- Azərbaycan şahmatçılarına daim inanmışıq. Turnirdən əvvəl də söyləmişdim ki, Şəmkirdə Azərbaycan şahmatçısının çempion olmasını arzulayırıq. Əvvəlki iki yarışda norveçli Maqnus Karlsen birinci yeri tutmuşdu. Bu dəfə isə biz Şəmkirdə sözün əsl mənasında triller izlədik. Fabiano Karuana ilk turdan çox yüksək səviyyədə oyun nümayiş etdirirdi. Bütün rəqiblərlə görüşdə güzəştsiz mübarizə sərgiləyirdi. Aniş Giriylə yanaşı, dünya çempionluğuna iddialı Sergey Karyakin də Karuanaya rəqabət yaratmağa çalışırdı. Şəhriyar 7-ci turda Eltac Səfərlini məğlub edəndən sonra yekun haqda danışaraq bildirdi ki, nəticə haqda sonda fikir bildirmək olar. Bu sözlərdən sonra bizim hər birimizin ona inamı daha da artmışdı. Lakin əsas işi şahmatçı görür. Şəhriyar əvvəlcə Fabiano Karuananı və Aniş Girini məğlub etdi, sonra tay-brekdə ABŞ-ı təmsil edən şahmatçını üstələdi. Bütün Şəmkir son partiyada ona dəstək olurdu. Təsəvvür edin, Heydər Əliyev Mərkəzində mühafizəçidən başlayaraq, hər bir rəsmi qonaq, yeniyetmə şahmatsevərlər Məmmədyarova görə həyəcan keçirirdi. Son gedişi edəndən sonra zalda sevinc göz yaşlarını da görmək olardı.

- “Shamkir Chess 2016” nəticəsinə görə də tarixə düşəcək. Çünki bu yarışda ilk dəfə Azərbaycan şahmatçısı qələbə qazandı.

- Azərbaycanda şahmatın olduqca güclü ənənələri var. Kişi şahmatçılarımız iki dəfə Avropa çempionu olublar. Fərdi yarışlarda da çoxlu sayda uğurlar əldə edilib. Amma indiyədək 20-ci kateqoriyalı yarışda heç bir şahmatçımız çempionluq sevinci yaşamayıb. Şəhriyar bu mənada da ilkə imza atdı. Məmmədyarov sübut etdi ki, şahmatçılarımız ciddi rəqibdirlər. Bu qələbə Ümumdünya Şahmat Olimpiadası ərəfəsində Azərbaycan millisinə böyük ruh yüksəkliyi verəcək. Ən vacib məqamlardan biri isə xatirə turnirinin Azərbaycanın istedadlı şahmatçısı Vüqar Həşimovla bağlı olmasıdır. Vüqar Həşimov hər zaman şahmatımızın qələbəsini istəyib. Ona görə Şəhriyarın uğuru ikiqat əhəmiyyətlidir.

- Şəmkirdə ilk dəfə xanım şahmatçı da mübarizə apardı. Hou Yifanın turnirə qatılması nəyi dəyişdi?

- Qadınlar arasında dünya çempionu Hou Yifanın Şəmkirdə yarışması maraqlı anlarla yadda qaldı. Turnir ərzində çoxlu sayda şahmat həvəskarları partiyaları canlı izləmək üçün Heydər Əliyev Mərkəzinə gəlməklə şahmata olan diqqəti göstərdi. Məktəblilər üçün Hou Yifanı canlı görmək xüsusən maraqlı idi. Hər zaman adını eşitdikləri xanım dünya çempionu onların yaşadığı şəhərdə yarışırdı. İstirahət günündə şahmatçılar yeniyetmələr üçün seans keçdilər. 2014-cü ildə seansda Sergey Karyakinlə heç-heçə oynayan şəmkirli yeniyetmə Xəyalə Nağıyeva bu dəfə Hou Yifanla yarışdı. Qeyd edim ki, Xəyalə ötən il həmyaşıdları arasında məktəblilərin turnirində çempion olub. Ardınca isə Azərbaycan birinciliyində ikinci yeri tutub. Əsas məqsədimiz Şəmkirdə şahmata marağı artırmaq və yeniyetmələrin inkişafına kömək olmaqdır. Çox istərdik ki, gələcəkdə belə superturnirlərdə Şəmkir də öz şahmatçıları ilə təmsil olunsun.

- Azərbaycan şahmatçılarının Şəmkirdəki çıxışını necə qiymətləndirirsiniz?

- Ölkənin dörd ən güclü şahmatçısı Şəmkirdə iştirakçılar arasında idi. Teymur Rəcəbov, Şəhriyar Məmmədyarov, Rauf Məmmədov və Eltac Səfərlini hər dəfə eyni yarışda izləmək imkanı olmur. Fikrimcə, Şəmkir turniri Bakı Şahmat Olimpiadası ərəfəsində onlar üçün əsl sınaq oldu. Biz şahmatçılarımıza və Azərbaycan yığmasına olimpiadada uğurlar arzu edirik.

- Şəmkir turniri artıq dünya şahmat yarışları arasında özünəməxsus yer tutub. Təşkilatçı kimi yəqin bu amil sizi sevindirir.

- Əsas məqsədimiz Azərbaycanın istedadlı şahmatçısı Vüqar Həşimovun adına layiq turnir təşkil etmək idi. Hədəfimizə nail olduq. Ardıcıl üçüncü dəfə təşkil olunan superturnir yüksək təşkilatçılıq səviyyəsi ilə yeni standartlar müəyyən etdi. Həm iştirakçılar, həm də qonaqlar Şəmkirdə Vüqarın xatirəsinə toplaşmışdılar. Bu mənada fəxr edirik ki, Vüqar Həşimov memorialını onun adına layiq səviyyədə keçirə bildik. Bu işdə bizə dəstək olan yerli mətbuata təşəkkür edirik.

“Synergy Group” özünün korporativ sosial məsuliyyət siyasətinin tərkib hissəsi olaraq, ölkəmizdə təhsilin və idmanın inkişafına, eyni zamanda, dünyada tanınmasına investisiya yatırır. Azərbaycan idmanının inkişafına töhfə vermək üçün gələcəkdə də fəal çalışacağıq.