Bakı, 14 aprel, AZƏRTAC

Fövqəladə Hallar Nazirliyi (FHN) Sənayedə İşlərin Təhlükəsiz Görülməsi və Dağ-mədən Nəzarəti Dövlət Agentliyi sənayedə və dağ-mədən işlərində təhlükəsizliyin təmin olunması istiqamətində fəaliyyətini davam etdirir.

FHN-in mətbuat xidmətindən AZƏRTAC-a bildirilib ki, bu çərçivədə, Agentliyin müfəttişləri tərəfindən Abşeron rayonunun Güzdək qəsəbəsində fərdi sahibkar Abdullayev İlqar Yadulla oğluna məxsus daş karxanasında plan üzrə yoxlama aparılıb. Yoxlama zamanı karxanada insan həyatı və sağlamlığı üçün təhlükə yarada biləcək pozuntular aşkarlanıb.

Daşkəsən maşının təcili dayanma avadanlığının olmadığı, üst arabacığı hərəkət etdirən mühərrikin sıradan çıxması səbəbindən əməliyyatın ling vasitəsilə aparıldığı müəyyənləşdirilib. Həmçinin daşkəsən maşını elektrik enerjisi ilə təmin edən ötürücü naqillərin birləşmə yerlərinin izolyasiyasız olması, naqillərin isə elastik olmaması nöqsan kimi qeyd edilib. Bundan əlavə müfəttişlərin əraziyə baxışı zamanı daşkəsən maşının hərəkəti üçün nəzərdə tutulmuş rels yolunun sonunda dayaqların olmadığı aşkarlanıb. Eləcə də karxananın kənarında yerləşən paylayıcı yarımstansiyanın ətrafında qoruyucu çəpərin olmaması da nöqsan olaraq müfəttişlər tərəfindən qeydə alınıb.

Qeyd olunanlarla əlaqədar Agentliyin müfəttişləri tərəfindən karxana rəhbərliyi və işçilərlə profilaktik söhbət aparılıb, aşkarlanmış texniki təhlükəsizliklə bağlı pozuntuların aradan qaldırılması üçün müvafiq tövsiyələr verilib.

Aşkarlanmış pozuntular barədə akt tərtib olunaraq, pozuntuların qısa müddətdə aradan qaldırılması üçün sahibkara təqdim edilib.