Bakı, 28 fevral, Nihad Budaqov, AZƏRTAC

Rusiya təbii qazının Türkiyə və Avropaya nəqlini nəzərdə tutan “Türk axını” qaz boru kəmərinin (Turkish Stream) dəniz hissəsinin tikintisinə yaxın aylarda başlanılacaq.

AZƏRTAC Rusiyanın enerji nəhəngi “Gazprom”a istinadla xəbər verir ki, bunu şirkətin idarə heyəti üzvü Oleq Aksyutin deyib. O bildirib ki, tikinti prosesi 2017-ci ilin ikinci yarısında başlayacaq.

Xatırladaq ki, “Gazprom” “Türk axını”nın dəniz hissəsində inşa ediləcək iki boru kəmərinin tikintisi üzrə müqavilələri İsveçrənin “Allseas” şirkəti ilə imzalayıb.

Qeyd edək ki, “Türk axını” ilə Rusiya təbii qazının Türkiyədən keçməklə Avropaya çatdırılması nəzərdə tutulur. Kəmərlə ümumilikdə 31,5 milyard kubmetr qazın Avropanın, qalan hissəsinin isə Türkiyənin daxili tələbatının ödənilməsi üçün istifadə edilməsi planlaşdırılır. Layihə üzrə hər biri 15,75 milyard kubmetr tutuma malik iki boru kəmərinin inşa edilməsi nəzərdə tutulur. İlk boru kəmərinin Türkiyəyə, ikinci kəmərin isə zəruri zəmanət təmin olunacağı təqdirdə Avropaya çatdırılması planlaşdırılır.

“Gazprom” “Türk axını” layihəsinə bu il ərzində 42 milyard rubl (təxminən 704 milyon dollar) sərf etməyi nəzərdə tutur. Şirkət layihə üzrə keçən il 23,5 milyard rubl sərmayə qoyuluşu həyata keçirib.