Bakı, 28 sentyabr, AZƏRTAC

Azərbaycan daha bir mötəbər tədbirə - Gənc Liderlərin 20-ci Qlobal Forumuna yüksək səviyyədə ev sahibliyi etdi. Xüsusi Olimpiya Hərəkatının 50 illiyinə həsr olunmuş tədbirin qonaqları bu misilsiz layihə üçün Bakını mükəmməl məkan kimi dəyərləndirdilər. AZƏRTAC idman jurnalisti Leyla Qurbanovanın forumun yekunları barədə qeydlərini təqdim edir.

Bakı - misilsiz layihə üçün mükəmməl məkan

Xüsusi Olimpiya Hərəkatının 50 illiyinə həsr olunmuş əsas tədbirlərdən birinin - Gənc Liderlərin 20-ci Qlobal Forumunun ev sahibi kimi Bakının seçilməsi qürurverici hadisədir. Avropa və Avrasiya Xüsusi Olimpiya Hərəkatının prezidenti Devid Evangelistanın Bakını bu misilsiz layihə üçün mükəmməl məkan adlandırması da bu baxımdan təsadüfi deyil. Məhz Azərbaycan - Qərblə Şərqin qovuşuğunda yerləşən, tolerantlığın beşiyi sayılan və minillər boyu sülhə, millətlər və dinlər arasında dostluq, qardaşlıq ideallarına sadiq qalan ölkəmiz bu cür həssas dönəmdə inklüziv cəmiyyət yaratmaq istəyən 45 ölkədən 200-dək gənc lideri öz ocağının istisinə cəmləyərək arzularına qovuşdura bilərdi.

Forumun açılışında çıxış edən gənclər və idman naziri Azad Rəhimov Azərbaycanın dünyada idman dövləti və öz gənclərinə böyük dəyər verən ölkə kimi tanınmasından qürur duyduğunu bildirərək “Xüsusi Olimpiya Hərəkatı Qlobal Gənc Liderlər Forumuna ev sahibliyi etməklə biz hər bir gəncimizə - əqli məhdudiyyətləri olan və olmayanlara verdiyimiz dəyəri nümayiş etdiririk. Bu forum cəmiyyətdən təcrid olunduğunu hiss edən hər kəs üçün daha inklüziv dünyaya yeni körpü, ümid mayakı olacaq”, - deyə tədbirin bəşəriyyət üçün böyük əhəmiyyət daşıdığını qeyd etdi.

Bu mötəbər tədbirin ev sahibi kimi Bakının seçilməsi, həm də ölkəmizin dünyanın idman mərkəzlərindən birinə çevrilərək irimiqyaslı idman tədbirlərini yüksək səviyyədə keçirməsi ilə bağlıdır. Azərbaycan buna qədər dünya əhəmiyyətli bir sıra idman yarışlarına - ilk Avropa Oyunlarına, İslam Həmrəyliyi Oyunlarına, Ümumdünya Şahmat Olimpiadasına, “Formula-1” yarışlarına və müxtəlif idman növləri üzrə dünya, Avropa çempionatlarına uğurla ev sahibliyi edib.

Bununla yanaşı, Azərbaycan Xüsusi Olimpiya Komitəsinin beynəlxalq xüsusi olimpiya ailəsinin fəal üzvlərindən biri olduğunu, dünya xüsusi olimpiya hərəkatına qiymətli töhfələr verdiyini də xüsusi qeyd etməliyik.

Bu il Azərbaycan Xüsusi Olimpiya Komitəsi də öz yubileyini - 25 illiyini qeyd edəcək. Hazırlığına start verilən və 11 idman növü üzrə 1000-ə yaxın atletin iştirak edəcəyi III Milli Oyunlar dünya və Azərbaycan xüsusi olimpiya hərəkatının yubileylərinə həsr olunacaq. İlboyu isə xüsusi olimpiya proqramına daxil olan növlər üzrə təlim-məşqlərin keçirilməsi, idmançıların müəyyən layihələr üzrə tədbirlərdə iştirakı onların mütəmadi nəzarətdə olmasını təmin edir.

Bu baxımdan regional proqramların da böyük əhəmiyyəti var. Azərbaycan Xüsusi Olimpiya Komitəsinin Bakı və Abşeron yarımadasından əlavə Gəncə, Şəki, Sumqayıt, Quba, Lənkəran, Göyçay, Salyan regional proqramları çərçivəsində uşaq və yeniyetmələrin idman vasitəsilə bacarıqlarının inkişafı üçün görülən işlər təqdirəlayiqdir. Regional proqramlarda xüsusi, yardımçı məktəb və internatların nəzdində komitənin ilkin təşkilatları olan adaptiv fiziki tərbiyə və idman klubları fəaliyyət göstərir. Yerlərdə regional yarışlar keçirilir, yığma komandalar formalaşdırılır və onların yarışlarda iştirakı təmin olunur.

Hələ 1995-ci ildən başlayaraq ailə proqramı layihəsi vasitəsilə ailələrdən atletlərin xüsusi olimpiya hərəkatına cəlb olunmasını görülən işlər arasında xüsusi qeyd etmək lazımdır. İndiyə qədər 440 ailənin bu hərəkata cəlb olunması, proqramın tərkibində 3-7 yaşlı atletləri əhatə edən digər bir layihə - “Gənc atletlər” əqli imkanları məhdud olan uşaqlar üçün yaradılan daha bir şansdır. Onların bu cür fiziki və adaptiv məşqlərə vaxtında cəlb edilməsi, təkcə ehtiyat qüvvələrinin yaradılması baxımından yox, sağlamlıqlarının qorunması və möhkəmləndirilməsi baxımından da çox önəmlidir. Onu da qeyd edək ki, beynəlxalq qanunlara uyğun olaraq, xüsusi olimpiya oyunlarında yalnız 8 yaşı tamam olmuş atletlər iştirak edə bilərlər.

Bundan başqa, yeniyetmə atlet proqramı, adaptiv fiziki tərbiyə proqramı, könüllülük məktəbinin qurulması kimi layihələr özünü həyatda doğruldub. Avropa futbol və basketbol federasiyaları, o cümlədən ölkənin müvafiq idman federasiyaları, idarə və nazirliklərlə sıx əməkdaşlıq şəraitində hər il 8 idman növü üzrə respublika seçmə yarışları da təşkil olunur. Bu cür yarışlar zamanı əqli cəhətdən qüsurlu idmançıların bərpası və cəmiyyətə inteqrasiyası ilə yanaşı, onların həm də sağlam idmançılarla ünsiyyəti də diqqət mərkəzində saxlanılır. Belə ki, yarışlarda sağlamlıq imkanları məhdud uşaqlarla yanaşı, həm də uşaq-gənclər idman məktəblərinin, müxtəlif klubların idmançıları da iştirak edirlər. Bunlar Azərbaycan Xüsusi Olimpiya Komitəsinin dünya xüsusi olimpiya hərəkatının inkişafına böyük töhfələr verdiyini demək üçün yetərlidir.

Avropa-Avrasiya Xüsusi Olimpiya Komitəsinin prezidenti və icraçı direktoru Devid Evangelista xüsusi olimpiya hərəkatı çərçivəsində ölkəmizlə əməkdaşlıqdan məmnunluğunu ifadə edərək deyib: "Azərbaycan Xüsusi Olimpiya Komitəsi inkişaf edən bir təşkilatdır. Biz burada həm Gənclər və İdman, həm də Əmək və Əhalinin Sosial Müdafiəsi nazirliklərinin bu komitəyə dəstək verdiyinin şahidi olduq. Düşünürəm ki, komitə gələcəkdə də inkişaf edəcək".

Dünyanın müxtəlif yerlərindən böyük ümid və arzularla ölkəmizə təşrif buyurmuş gənc liderlər forum çərçivəsində həm də bu sahədə əldə etdiyimiz zəngin təcrübədən bəhrələniblər. Onların Bakıda olduqları bir həftə ərzində əxz etdikləri ən qiymətli dəyər isə milli, dini, irqi, sosial və digər ayrı-seçkiliyin olmadığı tolerant, çoxkonfessiyalı unikal bir ölkədə bütün millətlərin, dinlərin nümayəndələrinin dostluq, qardaşlıq şəraitində rahat şəkildə yaşayış nümunəsi idi. İnsanların mənəvi və fiziki sağlamlığında mühüm rol oynamaqla yanaşı, sülh, əmin-amanlıq, dostluq və birliyin qarantına çevrilməkdə olan idmanın inkişafına ölkəmizdə çox böyük önəm verilməsi, Azərbaycanın dünyanın idman dövlətlərindən biri kimi diqqəti cəlb etməsi də gənc liderlərin inklüziv idman və liderlik vasitəsilə yeni zirvələr fəth etmələri üçün əlavə stimul oldu.

Xüsusi Olimpiya Komitəsinin sədri Timoti Şrayver forumun Bakıda keçirilməsindən qürur duyduğunu və əsas məqsədin gənclərin səsini dünyaya çatdırmaq olduğunu dedi. O, tədbirin açılış mərasimində forum iştirakçılarının Azərbaycanda gördükləri təcrübəni öz ölkələrində bölüşəcəklərini xüsusi vurğuladı.

Forum bir sıra maraqlı tədbirlərlə də diqqət çəkdi. Braziliyalı futbolçu ikiqat dünya çempionu Kafu Xüsusi Olimpiya Hərəkatının səfiri elan edildi. Olimpiya, dünya çempionlarımızın da heyətində yer aldığı tanınmış idmançılarımızdan ibarət futbol komandamızın dünya, Avropa kollektivlərinə qarşı futbol matçı tədbirə xüsusi rəng qatdı. Forum çərçivəsində olimpiya çempionu Vladimir Qribiçin voleybol üzrə ustad dərsi, Azərbaycan Milli Gimnastika Federasiyası ilə idman gimnastikası çoxnövçülüyü üzrə olimpiya çempionu Nadia Komaneçinin birgə dərsləri xüsusi maraq doğurdu.

İnklüziv idman və liderlik vasitəsilə “Vahid nəsil” proqramı hazırlanacaq

Azərbaycan Xüsusi Olimpiya Komitəsinin prezidenti Şahin Əliyev yüksək səviyyədə keçən Xüsusi Olimpiya Hərəkatı Gənc Liderlərin 20-ci Qlobal Forumuna ölkəmizin qiymətli töhfələr verdiyini qeyd edərək, bu tədbirin gənclərin aparıcı rol oynayacağı sosial layihələrin yeni erasının əsasını qoyacağına əminliyini bildirdi.

Tədbir zamanı dünyanın müxtəlif ölkələrindən gəlmiş gənc liderlər, əlavə olaraq, daha yaşlı 100 liderin iştirakı ilə öz ölkələrində inklüziv cəmiyyətlər formalaşdırmaq məqsədilə qrup layihələrini də hazırlamışdılar. Bakı forumundan sonra gənc liderlər öz ölkələrində həyata keçirəcəkləri layihələri tərtib etməyi planlaşdırırlar. Bu layihələrin Beynəlxalq Xüsusi Olimpiya Fondunun qrantları ilə dəstəklənməsi nəzərdə tutulub. Çünki Xüsusi Olimpiya Hərəkatının növbəti 50 il üçün əsas məqsədlərindən biri dünya miqyasında “Vahid məktəblər” adlanan məktəb proqramları vasitəsilə gənclərin bir araya gəlməsini təşviq etməkdir. Bununla da əqli imkanları məhdud olan və olmayan gənclərin inklüziv idman və liderlik vasitəsilə bir araya gəlməsini təmin edən “Vahid nəsil” proqramı hazırlanacaq. Bu isə Vahid İdman Platformasından istifadə etməklə daha inklüziv dünyanı təşviq etməyə yardımçı olacaq.

Beləliklə, sentyabrın 24-dən 27-dək davam edən Bakı Forumu dünyanın hər tərəfindən daha inklüziv dünya arzusunda olan yüz milyonların, eləcə də 200 milyona yaxın əqli imkanları məhdud insanların arzularına ümid işığı yandırdı. Bakı Forumunda gənc liderlər üçün yaradılmış geniş imkanlar onlara öz vətənlərində, yaşadıqları şəhərlərdə, təhsil aldıqları müəssisələrdə və üzv olduqları icmalarda sosial inklüzivliyə nailolma sahəsində biliklərini inkişaf etdirmək və onu daha da genişləndirmək üçün bacarıqlarından maksimum istifadə etməyə şərait yaratdı.