Bakı, 3 may (AZƏRTAC). Mayın 4-5-də Naxçıvan Olimpiya İdman Kompleksində ümummilli lider Heydər Əliyevin anadan olmasının 90 illiyi münasibətilə gənclər arasında yunan-Roma güləşi üzrə “Naxçıvan kuboku” uğrunda ənənəvi Beynəlxalq turnir keçiriləcəkdir.

Azərbaycan Güləş Federasiyasından AZƏRTAC-a bildirmişlər ki, mayın 3-də turnirin püşkatma mərasimi keçirilmişdir.

Püşkatmanın nəticəsinə əsasən, Azərbaycan, Şərur, Özbəkistan və Rusiya komandaları A yarımqrupunda, Naxçıvan, Ukrayna, Gürcüstan və Türkiyə kollektivləri B yarımqrupunda mübarizə aparacaqlar.

Turnirin proqramına əsasən, mayın 4-də qrup görüşləri, mayın 5-də isə final və 3-4-cü yerlər uğrunda qarşılaşmalar keçiriləcəkdir.

Yarımqruplarda ilk yeri tutan komandalar finalda qarşılaşacaqlar.

İlk üç yeri tutan komandalar Azərbaycan Güləş Federasiyası tərəfindən medal, diplom və pul mükafatı ilə təltif olunacaqlar.