REGİONLAR
Göyçayda yay şumunun çıxarılmasına 25-dək traktor cəlb edilib
Göyçay, 24 iyul, AZƏRTAC
Göyçayda payızlıq əkinlər üçün mühüm aqrotexniki tədbir olan yay şumu çıxarılır.
Rayon kənd təsərrüfatı idarəsindən AZƏRTAC-ın bölgə müxbirinə bildirilib ki, gələcək yüksək məhsuldarlıqda yay şumunun əhəmiyyətini xüsusi qiymətləndirən fermerlər və fiziki şəxslər hazırda bu işin vaxtında və keyfiyyətlə başa çatdırılması üçün ciddi səy göstərirlər. Hər gün sahələrə 25-dək şum traktoru çıxarılır. Artıq 455 hektar sahədə şum qaldırılıb. Rayonun əksər ərazilərində, xüsusilə daha çox payızlıq əkin aparılacaq Qaraməryəm, Ləkçıplaq, Mırtı, Molla Şıxlı və bir sıra digər ərazi vahidlərində iş daha mütəşəkkil təşkil olunub.
Qeyd edək ki, qarşıdakı payızda rayonda 15 min hektardan çox sahədə əkin aparılacağı gözlənilir.