Bakı, 24 avqust, AZƏRTAC

Azərbaycan Respublikasının Gənclər və İdman Nazirliyinin dəstəyi, Azərbaycan Respublikası Gənclər Təşkilatları Milli Şurasının (NAYORA) təşkilatçılığı ilə gənclər təşkilatlarının rəhbər və nümayəndələri üçün avqustun 17-dən 22-dək keçirilmiş altı günlük yay təcrübə məktəbi düşərgəsi uğurla yekunlaşıb.

NAYORA-dan AZƏRTAC-a bildirilib ki, 100 nəfər gəncin iştirak etdiyi düşərgənin əsas məqsədi gənclər təşkilatlarının rəhbər və fəal nümayəndələrini bir araya gətirməklə, dövlət qurumlarının təmsilçiləri ilə birlikdə gənclərlə bağlı bir sıra məsələləri müzakirə etmək, həmçinin təhsil və qeyri-formal təhsil, karyera və məşğulluq, özünü inkişaf, liderlik mövzularında görüş və təlimlərin keçirilməsidir. Gənclər təşkilatlarının rəhbər və nümayəndələrinin, həmçinin fəal üzvlərinin şəbəkələşməsinin təmin edilməsi, aktual və zəruri istiqamətlərdə bilik və bacarıqlarının artırılması, o cümlədən gənclərlə iş sahəsində təcrübə mübadilələrinin və yeni təkliflərin verilməsi də əsas hədəflər sırasına daxildir.

Proqram çərçivəsində ilk günlərdə düşərgə iştirakçılarının şəbəkələşməsi məqsədi ilə proqramın moderatoru Fəxri Məhəmmədzadə tərəfindən komanda quruculuğu oyunları, müxtəlif vörkşop və enercayzerlər keçirilib. Düşərgənin ikinci günü gənclər və idman nazirinin müavini İndira Hacıyeva, Göygöl Rayon İcra Hakimiyyətinin başçısı Elvin Paşayev və Milli Məclisin deputatı Pərvin Kərimzadə ilə yay məktəbi iştirakçılarının görüşü olub, “Gənclərin inkişafında gənclər təşkilatlarının rolu” mövzusuna dair ətraflı müzakirələr aparılıb.

Düşərgənin sonrakı günlərində Milli Məclisin deputatı Naqif Həmzəyev, Gənclərin İnkişaf və Karyera Mərkəzinin baş direktoru Ramtiq Alızadə, Qeyri-Hökumət Təşkilatlarına Dövlət Dəstəyi Agentliyin icraçı direktoru Aygün Əliyeva, NAYORA-nın sədr müavini Ülviyyə Axundova, təşkilatın Baş katibi Ramin Həbibzadə, Azərbaycan Dövlət Aqrar Universitetinin rektoru İbrahim Cəfərov, Milli Məclisin deputatı Elşad Mirbəşiroğlu, YAP Göygöl rayon təşkilatının sədri Vüqar İsayev və Azərbaycan Skautlar Assosiasiyası İctimai Birliyinin sədri İlyas İsmayıllının iştirakı ilə müxtəlif mövzular ətrafında görüşlər və Mərkəzi Nəzarət Təftiş Komissiyasının üzvü Rəsul Quliyevin moderatorluğu ilə panel müzakirələri keçirilib.

Qeyd edək ki, asudə vaxtın səmərəli dəyərləndirilməsi məqsədi ilə idarə heyətinin üzvü Azad Manaflının moderatorluğu ilə intellektual oyun keçirilib, Göygöl Gənclər Evi və Göygöl Milli parkına infotur təşkil olunub. Sonra gənclər təşkilatlarının sərgisi və infosessiya baş tutub. Təşkilat nümayəndələri təmsil etdikləri qurumları digər təşkilatlara ətraflı tanıtmaq imkanı qazanıblar.

Düşərgənin sonuncu günü keçirilmiş qala gecədə qalib komandalar müəyyən olunub. Onlara kubok və medallar, fəallıq nümayiş etdirən iştirakçılara isə hədiyyələr verilib.