DÜNYA
Gürcüstanda aviataksilər istifadəyə veriləcək
Tbilisi, 8 sentyabr, AZƏRTAC
Gürcüstanda “Aviator” brendi altında yeni hava taksisinin (aviataksi) istifadəyə verilməsi nəzərdə tutulub.
Layihənin təşəbbüskarı olan “Adjara Group” şirkətinin baş direktoru Valeri Çexeriya jurnalistlərə bildirib ki, artıq ABŞ-dan 8 yerlik “Beechcraft” tipli kiçik təyyarələr də alınıb. Hazırda şirkət aviataksi üçün lisenziyanın alınması məsələsini həll edir.
O, aviataksidə sərnişin biletlərinin qiyməti barədə məlumat verməyib. Bildirib ki, aviataksilər Tbilisidən Batumi, Kazbeqi və Svaneti istiqamətlərində uçacaq. Gələcəkdə şirkət ölkənin digər turizm bölgələrinə də belə reysləri açmağı planlaşdırır.
Avitataksilərin sərnişinləri digər təyyarə reyslərində olduğu kimi, saatlarla qeydiyyat üçün növbədə dayanmayacaqlar. Onlar uçuşa 10-15 dəqiqə qalmış dayanacağa gələrək qısa gömrük baxışından keçməklə istədikləri məntəqəyə uça biləcəklər.
Valeri Çexeriyanın sözlərinə görə, aviataksilər noyabrın 15-dən ilk uçuşları həyata keçirəcəklər.
Xətayi Əzizov
AZƏRTAC-ın xüsusi müxbiri
Tbilisi