Tbilisi, 25 fevral (AZƏRTAC). Tbilisidə Xocalı soyqırımı qurbanlarının xatirəsinə həsr olunmuş tədbir keçirilmişdir.

Azərbaycanın Gürcüstandakı səfirliyinin təşəbbüsü ilə keçirilən mərasim ulu öndər Heydər Əliyevin Tbilisidəki abidəsi önünə əklillər qoyulması ilə başlanmışdır.

Mərasim Heydər Əliyev Fondunun Tbilisidəki sərgi salonunda davam etdirilmişdir.

Səfir Namiq Əliyev mərasim iştirakçılarına Xocalı soyqırımı barədə ətraflı məlumat vermişdir. Bildirmişdir ki, hadisənin soyqırımı olması, ermənilərin Xocalı şəhəri sakinlərini tamamilə məhv etmək məqsədləri sənədlərlə təsdiqlənmişdir. Azərbaycan xalqı bu tarixi heç vaxt yaddan çıxarmayacaq və onun bir daha təkrarlanmasına yol verilməməsinə çalışacaqdır.

Diplomat demişdir ki, Azərbaycan Prezidenti İlham Əliyev Dağlıq Qarabağ münaqişəsinin sülh yolu ilə tənzimlənəcəyini vurğulamaqla yanaşı, ölkəmizin öz ərazi bütövlüyünü təmin etmək üçün beynəlxalq normalarda nəzərdə tutulan digər vasitələrə əl atmaq hüququnu da dəfələrlə bəyan etmişdir. Ötən əsrin ən dəhşətli faciəsi olan Xocalı soyqırımı haqqında həqiqətlər yalnız ümummilli liderimiz Heydər Əliyevin cəsarəti, prinsipiallığı sayəsində dünyaya çatdırılmışdır. Bu gün Prezident İlham Əliyev, Heydər Əliyev Fondunun prezidenti, Milli Məclisin deputatı Mehriban xanım Əliyeva Azərbaycan həqiqətlərinin dünyaya yayılmasında varisliyə əsl sədaqət nümunəsi göstərirlər.

Səfir bu tədbirin təşkilinə, belə bir gözəl salonda keçirilməsinə, Xocalı həqiqətləri barədə kitablarla, fotoşəkillər və sənədlərlə təmin olunmasına göstərdiyi dəstəyə görə Heydər Əliyev Fondunun prezidenti Mehriban xanım Əliyevaya minnətdarlığını bildirmişdir.

Mərasimdə iştirak edən diplomatik korpusun nümayəndələri üçün səfirin çıxışı ingilis dilinə tərcümə olunmuşdur. İştirakçılar Heydər Əliyev Fondunun dəstəyi ilə nəşr olunmuş kitablar və 50-dək fotoşəkillə, Xocalı soyqırımı barədə xarici mətbuat səhifələrində nəşr edilmiş məqalələrdən parçalarla tanış olmuşlar.

Gürcüstanın Azərbaycanlı Gənclər Təşəbbüs Qrupunun Xocalı soyqırımı ilə əlaqədar tarixi faktlar əsasında çəkdiyi qısametrajlı film nümayiş etdirilmişdir.

Mərasimdə Azərbaycan-Gürcüstan parlamentlərarası dostluq qrupunun rəhbəri Qənirə Paşayeva, Gürcüstanın reinteqrasiya məsələləri üzrə dövlət naziri Temur Yakobaşvili, ölkə parlamentinin vitse-spikeri Paata Davitaya, deputatlar, Tbilisidə akkreditə olunmuş diplomatik korpusun, Gürcüstan azərbaycanlılarının, gürcü ictimaiyyətinin nümayəndələri iştirak etmişlər.

Tədbirin sonunda Qənirə Paşayeva AZƏRTAC-ın xüsusi müxbiri ilə söhbətində demişdir: “Xocalı faciəsi öz parametrləri və beynəlxalq qiymətləndirmə ilə soyqırımıdır, insanların milli mənsubiyyətinə görə vəhşicəsinə qətlə yetirilməsidir. Ermənistan rəhbərliyi, düşmən ölkənin ziyalıları da etiraf edirlər ki, bu qətl hadisəsi əvvəlcədən planlaşdırılmış, düşünülmüş şəkildə həyata keçirilmişdir. Hətta, ermənilər ən yüksək tribunalardan bununla fəxr etdiklərini bildirmişlər.

Azərbaycan rəhbəriyi Xocalı soyqırımı həqqətlərinin dünyanın bütün ölkələrində təbliğinə çalışır və beynəlxalq ictimaiyyət tərəfindən bu faktın soyqırımı kimi tanınması istiqamətində fəal iş aparır. Bu işdə xaricdə yaşayan soydaşlarımızın fəaliyyətinin gücləndirilməsi də mühüm rol oynayır. Son vaxtlar onlar yaşadıqları ölkələrdə Xocalı soyqırımı faktının təbliği sahəsində işi gücləndirmiş, müxtəlif dövlət və qeyri-hökumət strukturları ilə əlaqələr yaratmışlar.

Azərbaycan Prezidenti İlham Əliyev Xocalı soyqırımının təbliği, xaricdə tanınması ilə bağlı aidiyyəti təşkilatlara konkret tapşırıqlar vermişdir. Yeri gəlmişkən, Heydər Əliyev Fondunun, onun prezidenti Mehriban xanım Əliyevanın bu istiqamətdə gördüyü işlər getdikcə daha çox səmərə verir. Bu il Fondun təşəbbüs və dəstəyi ilə dünyanın 50-dən artıq ölkəsində Xocalı soyqırımının tanınması üçün ciddi tədbirlər həyata keçirilmişdir. Xarici ölkələrdəki Azərbaycan diasporu lazımi vəsaitlərlə təmin olunmuşdur.

Biz yalnız birliyimizlə həqiqətlərimizi dünyaya çatdıra, Xocalıda törədilən qətliamın soyqırımı kimi tanınmasına nail olub, erməni qəddarlığını, saxtakarlığını ifşa edə bilərik”.

Gürcüstanlı reinteqrasiya məsələləri üzrə dövlət naziri Temur Yakobaşvilinin dediklərindən: “Sərgi ilə tanışlıq göstərir ki, bizim Cənubi Osetiyada olduğu kimi, Dağlıq Qarabağda, o cümlədən Xocalıda da etnik təmizləmə aparılmışdır. Biz birləşib özgələrin işimizə qarışmasına yol verməməliyik”.

İslam Əliyev

AZƏRTAC-ın xüsusi müxbiri

Tbilisi