CƏMİYYƏT
Hacı Zeynalabdin Tağıyevin heykəlinə zərər vuran şəxslərlə bağlı iki ay müddətinə həbs qətimkan tədbiri seçilib
Bakı, 25 yanvar, AZƏRTAC
Paytaxtın Səbail rayonunda Hacı Zeynalabdin Tağıyevin heykəlinə zərər vuran şəxslər barəsində məhkəmə tərəfindən qərar qəbul edilib.
Daxili İşlər Nazirliyinin mətbuat xidmətindən AZƏRTAC-a bildiriblər ki, bu əməli törətməkdə təqsirləndirilən şəxslər – 1991-ci il təvəllüdlü Vüqar Tağızadə və 1996-cı il təvəllüdlü Allahverdi Məmmədli barələrində Səbail Rayon Məhkəməsinin qərarı ilə iki ay müddətinə həbs qətimkan tədbiri seçilib.
Səbail Rayon Polis İdarəsinin istintaq şöbəsində Cinayət Məcəlləsinin 221-ci (Xuliqanlıq) və 246-cı (Tarix və mədəniyyət abidələrini qəsdən məhv etmə və ya korlama) maddələri ilə istintaq hərəkətləri davam etdirilir. İstintaqın yekununda toplanmış materiallar baxılması üçün məhkəməyə göndəriləcək.