İCTİMAİ RƏY BELƏ QAZANILIR
Murmansk, 3 fevral (AZƏRTAC). Murmansk vilayətindəki Azərbaycan diasporu şimal diyarının ictimai-siyasi və iqtisadi həyatında fəal iştirak edir. Ümumrusiya Azərbaycan Konqresi (ÜAK) Murmansk bölməsinin rəhbəri Afil Hüseynov əslən Şərur rayonundan olsa da, artıq özünü bu qütb regionunun yerli sakini hesab edir. İşləri uğurla gedən biznesmen diasporun fəaliyyətini istiqamətləndirir, tarixi Vətənlə əlaqələri qoruyub saxlamağa kömək edir. Afil Hüseynov deyir:
- Təxmini hesablamalara görə, hazırda Murmansk vilayətində 25 minə yaxın azərbaycanlı, o cümlədən vilayət mərkəzində 15 min soydaşımız yaşayır. Onların əsas məşğuliyyəti ticarət biznesidir. Deyə bilərəm ki, tanıdığım həmvətənlərimiz arasında, sözün həqiqi mənasında, kasıb yoxdur, yəni hamı özünə az-çox güzəran qurmuşdur.
Vilayətdə Azərbaycan diasporunun bir qurum kimi formalaşması bir neçə il bundan əvvəl başlanmışdır. ÜAK-ın Murmansk bölməsi 2004-cü ildən fəaliyyət göstərir. Bu müddət ərzində təşkilatımız həm azərbaycanlılar arasında, həm də vilayətin və şəhər rəhbərliyinin nümayəndələri arasında etimad qazanmağa nail olmuşdur. İşin təşkili məsələsinə gəldikdə isə, burada biz əsasən həmvətənlərimizin müraciətlərinə münasibət bildiririk. Bu və ya digər çətinliklər qarşıya çıxanda onlar dərhal ÜAK-a gəlirlər.
Diasporun ən önəmli vəzifəsi vilayət rəhbərliyinin müxtəlif səviyyəli nümayəndələri ilə davamlı dostluq münasibətləri yaratmaqdan ibarətdir. Axı, həmvətənlərimizin qarşılaşdığı problemləri, necə deyərlər, hakimiyyət dəhlizlərində həll etməliyik. Bu cür əlaqələr isə işə çox kömək edir. Təvazökarlıqdan uzaq da olsa, deyə bilərəm ki, qubernatordan başlamış bələdiyyə məclislərinin nümayəndələrinə qədər hamı bizi tanıyır. Mən diasporun nümayəndəsi olmaqla, Murmansk vilayət hökuməti yanında Məşvərət Şurasına seçilmişəm, vilayətin İctimai Palatasının üzvüyəm, buna görə də istənilən vaxt hər hansı məsələ barədə hər bir məmura müraciət edə bilirəm.
Burada ilk növbədə miqrasiya xidməti və milislə bağlı məsələlərdən söhbət gedir. Hüquq mühafizə orqanları tərəfindən Murmanskdakı həmvətənlərimizə qarşı hər hansı təcavüz və ya qərəzli münasibət halları olmamışdır və yoxdur. Biz yalnız qanun üzrə hərəkət edirik və həmişə müvafiq münasibət görürük. Vilayət Federal Miqrasiya Xidməti İdarəsi yanında Məşvərət Şurasının tərkibinə daxil edilmişəm, bu yaxınlarda isə Daxili İşlər İdarəsi yanında İctimai Şuraya seçilmişəm. Bir sözlə, bu strukturlarla qarşılıqlı münasibətlərimiz çox möhkəmdir.
Bizim gənc oğlan və qızların çoxu burada doğulmuşlar. Bütün həyatları Murmansk vilayəti, şimalın sərt təbiəti ilə ayrılmaz şəkildə bağlı olan bu gənclər burada özlərini doğma adamlar arasında olduğu kimi hiss edirlər. Buna baxmayaraq, hər bir ailə öz övladlarını mütəmadi olaraq Vətənə, Azərbaycana göndərməyə çalışır. Ona görə də onlar Azərbaycan haqqında, necə deyərlər, ilk mənbədən məlumat alır, Vətənimizdə baş verən hadisələri diqqətlə izləyir, bu proseslərlə yaşayırlar.
Bu yaxınlarda Murmansk Azərbaycan Konqresi yanında gənclər klubu təşkil edilmişdir. Həmin hərəkatın əlaqələndiriciləri Vüsal İbrahimov və Tamara Osmanovadır. Gənclərin ilk təşəbbüsü Murmansk diasporunun həyatından bəhs edən sayt yaratmaq və həmin saytda Azərbaycanda baş verən hadisələr haqqında məlumat vermək təklifi olmuşdur.
Artıq cari ilin sentyabrında Murmanskdakı 9 nömrəli gimnaziya bazasında axşam məktəbi açılacağına ümid edirik. Burada Azərbaycanın tarixinı və mədəniyyətini öyrənəcəklər. Azərbaycanın Sankt-Peterburqdakı baş konsulluğunun xətti üzrə zəruri ədəbiyyat əldə etmişik. Hazırda həmin məktəbin kitablar və dərsliklərlə təmin edilməsi məsələsi ilə məşğuluq. Onu da deyim ki, bu məktəbdə uşaqlar Azərbaycan dilində savadlı yazıb-oxumağı öyrənəcəklər, çünki onların demək olar ki, hamısı bizim dildə danışmağı bilsələr də, qrammatikanı bilənlər azdır. Məktəbdə, həmçinin Azərbaycan ədəbiyyatı, doğma diyarımızın tarixi və mədəniyyəti barədə məlumatlar verən başqa fənlər də tədris ediləcəkdir.
Bölmənin digər xəbərləri
