İfşa edən Xocalı
Bakı, 25 fevral, P.İmanova, AZƏRTAC
Fevralın 25-də Azərbaycan Milli Elmlər Akademiyasının (AMEA) Nizami Gəncəvi adına Milli Azərbaycan Ədəbiyyatı Muzeyində xalqımızın qan yaddaşı Xocalı faciəsinin 27-ci ildönümünə həsr olunan elmi sessiya keçirilib.
AZƏRTAC xəbər verir ki, tədbirdə muzeyin direktoru, akademik Rafael Hüseynov “İfşa edən Xocalı” mövzusunda məruzə ilə çıxış edib.
Rafael Hüseynov zaman-zaman xalqımıza qarşı həyata keçirilən soyqırımı və deportasiya siyasətindən, müxtəlif illərdə ermənilər tərəfindən xalqımızın başına gətirilən faciələrdən, Xocalı hadisələrinin acı nəticələrindən söz açıb.
O, Azərbaycanın bu qədim şəhərində dinc əhaliyə qarşı törədilmiş cinayətə beynəlxalq səviyyədə siyasi-hüquqi qiymət verilməsinin və cinayətkarların cəzalandırılmasının vacibliyini vurğulayıb. Bildirib ki, 1992-ci il fevralın 25-dən 26-na keçən gecə Xocalıda həyata keçirilən soyqırımı xalqımızın yaddaşına qara hərflərlə yazılıb. Xocalı faciəsi qan yaddaşımızın ən kədərli və ağrılı səhifələrindəndir. Bu misli görünməmiş vəhşilik aktı təkcə xalqımıza deyil, bütün bəşəriyyətə qarşı törədilmiş cinayət kimi XX əsrin tarixinə düşüb. Xocalıda yüzlərlə əliyalın insan - qoca, cavan, uşaq, qadın görünməmiş amansızlıqla qətlə yetirilib, evlər yandırılıb, şəhər yerlə-yeksan edilib.
Rafael Hüseynov Xocalı soyqırımı və bu qəddar aktın günahkarlarına beynəlxalq səviyyədə siyasi-hüquqi qiymət verilməsi istiqamətində görülən işlərdən söz açıb.
Diqqətə çatdırılıb ki, Heydər Əliyev Fondunun vitse-prezidenti Leyla Əliyevanın təşəbbüsü ilə başlanan “Xocalıya ədalət!” beynəlxalq təbliğat-təşviqat kampaniyası çərçivəsində görülən işlərin miqyası günü-gündən genişlənir, Azərbaycan reallıqlarının dünya ictimaiyyətinə çatdırılması istiqamətində mühüm işlər görülür.
Qeyd edilib ki, arxiv sənədləri, faktlar və istintaq materialları əsasında XX əsrin əvvəllərindən bəri bolşevik-erməni silahlı dəstələrinin doğma torpaqlarımızda törətdikləri kütləvi qırğınlar nəticəsində həlak olan on minlərlə soydaşımızın xatirəsini əbədiləşdirmək məqsədilə Azərbaycan Respublikası Hərbi Prokurorluğunun inzibati binasında Memorial Soyqırımı Muzeyi yaradılıb. Muzeyin soyqırımı və terror bölmələrində erməni silahlı birləşmələri və keçmiş sovet ordusunun 366-cı alayının 1992-ci il fevralın 26-da Xocalı şəhərinə birgə hücumunu əks etdirən maket və fotolar, habelə digər eksponatlar yerləşdirilib.
Rafael Hüseynov Xocalı faciəsinin acı nəticələrinin gələcək nəsillərə çatdırılması və unudulmaması üçün daha çox kitab və əsərlərin yazılmasının, filmlərin lentə alınmasının vacibliyini vurğulayıb. O, bu faciənin yaddaşlardan heç vaxt silinməyəcəyini bildirib, Xocalı qətliamının təqsirkarlarının haqlı cəzalarını alacaqlarına və ölkəmizin ərazi bütövlüyünün bərpa olunacağına əminliyini ifadə edib.
Tədbirdə Milli Azərbaycan Ədəbiyyatı Muzeyinin Xurşidbanu Natəvan adına Qarabağ filialının əməkdaşlarının dünya muzeylərinə müraciəti oxunub.
Bölmənin digər xəbərləri
