Bakı, 25 iyun (AZƏRTAC). Ulu Qarabağ, əzəmətli Şuşa qalası, Üzeyir bəyin ocağı, Ağdam, Cəbrayıl, Qubadlı, Laçın, Zəngilan, Füzuli, Kəlbəcər... Ümidimiz sənədi, Azərbaycan əsgəri!

Köksüz, torpaqsız, tarixsiz, dəyərlərsiz, ənənələrsiz xalq millət ola bilməz. Xalqımızın da dərin köklərə söykənən dəyərlərindən biri torpaq təəssübü, ordu quruculuğudur. 1918-ci may ayının 26-da Azərbaycan Xalq Cümhuriyyətinin parlamenti Azərbaycan Silahlı Qüvvələrinin yaradılması haqqında qərar qəbul etdi. Artilleriya general-leytenantı Səməd bəy Mehmandarov Azərbaycanın hərbi naziri, artilleriya general-leytenantı Əliağa Şıxlinski isə hərbi nazirin müavini təyin edildilər. Bu iki şəxsiyyətin gərgin səyi nəticəsində qısa zamanda Azərbaycan ordusu yaradıldı, cəbbəxana formalaşdırıldı.

1920-ci il aprelin 27-də imperiya ordusu müqavimətsiz təslim olması üçün gənc respublikaya Azərbaycan ordusunun ləğv olunmayacağını vəd etdi. İşğaldan sonra imperiya verdiyi vədə əməl etmədi, Azərbaycan ordusu hissə-hissə dağıdıldı.

XX əsrin sonlarında Vətənimizin yeni təhlükə - erməni təcavüzü ilə üzləşməsi, Ermənistan-Azərbaycan, Dağlıq Qarabağ münaqişəsi, minlərlə soydaşımızın ev-eşiyindən didərgin düşməsi, torpaqlarımızın işğal olunması qüdrətli ordu quruculuğu məsələsini ön plana çəkdi. Azərbaycan xalqı torpaqlarının müdafiəsinə qalxdı, minlərlə qeyrətli, namuslu, vətənpərvər oğul və qızlarımız şəhid oldu. Lakin nizami ordumuzun olmaması, hakimiyyət davası, hərc-mərclik ərazilərimizin bir hissəsinin işğal olunması ilə nəticələndi. Ümummilli lider Heydər Əliyevin xalqın təkidli tələbi ilə yenidən hakimiyyətə qayıdışından sonra məhz ulu öndərin rəhbərliyi altında həyata keçirilən islahatlar nəticəsində qısa müddətdə vahid komandanlığa tabe olan nizami ordu formalaşdırıldı.

1993-cü il noyabrın 1-də Müdafiə Şurası yaradıldı, noyabrın 2-də isə ulu öndər Heydər Əliyev Ermənistan silahlı qüvvələrinin Azərbaycan Respublikasının ərazisinə yeni hücumları və təcavüzü ilə bağlı televiziya və radio ilə xalqa müraciət etdi. Bu müraciət Azərbaycanın ordu quruculuğunda yeni bir mərhələnin başlanğıcı - Heydər Əliyev mərhələsinin başlanğıcı oldu. Dahi rəhbərimiz 1998-ci il mayın 22-də imzaladığı Fərmanla tarixi həqiqətin və Milli Ordu quruculuğunda varislik ənənələrinin bərpası ilə bağlı çox böyük əhəmiyyətə malik bir addım atdı. Həmin vaxtdan ölkəmizdə hər il iyunun 26-sı Azərbaycan Silahlı Qüvvələri Günü kimi qeyd edilir.

Tarixin dönəmində bu, böyük müddət deyildir. Lakin ötən illər ərzində Azərbaycan Silahlı Qüvvələrinin yaranması sahəsində görülən işlər zaman ölçüsü çərçivəsinə sığmır.

Xalqımızın ümummilli lideri Heydər Əliyev demişdir: “Azərbaycan Ordusu dövlət müstəqilliyimizin ən dəyərli töhfələrindən biridir. Azərbaycan dövlətinin ən böyük dayağı, onun sütunu Azərbaycan Silahlı Qüvvələridir. Azərbaycanın dövlət müstəqilliyinin ən dəyərli nəticələrindən biri Azərbaycanın Milli Ordusunun yaranması, təşkil olunması və onun müasir tələblərə uyğun hazırlanmasıdır”.

Hazırda Quru Qoşunlarından, Hərbi Hava Qüvvələrindən və Hərbi Dəniz Qüvvələrindən ibarət Azərbaycan Milli Ordusu - Azərbaycan Respublikasının Silahlı Qüvvələri Cənubi Qafqazda ən güclü və hazırlıqlı ordu hesab olunur. Silahlı Qüvvələrin şəxsi heyətinin mənəvi - psixoloji, hərbi və əxlaqi tərbiyəsi ən vacib məsələlərdir. Şəxsi heyətin Vətənə sədaqət ruhunda tərbiyə olunması, hərbi-siyasi təzyiqlərə müqavimət göstərmək bacarığı ordunun döyüş qabiliyyətini şərtləndirən əsas amillərdəndir. Bu istiqamətdə görülən işlər son illər daha da gücləndirilmişdir.

Son 7 ildə Azərbaycanın hərbi xərcləri 13 dəfədən çox artmışdır. 2010-cu ilin hərbi büdcəsi 2 milyard 150 milyon dollara bərabərdir ki, bu da Ermənistanın bütün dövlət büdcəsindən çoxdur. Azərbaycan Prezidenti, Silahlı Qüvvələrin Ali Baş Komandanı İlham Əliyev qüdrətli, peşəkar, hərbi, psixoloji cəhətdən hazırlıqlı silahlı qüvvələrimizin yaradılması və inkişaf etdirilməsini, işğal altında olan torpaqlarımızın azad edilməsi, köçkünlərin yurd-yuvasına qayıtması üçün vətənpərvər, xalqına, torpağına sadiq zabitlərin və əsgərlərin xidmət etdiyi, dövlətin və hər bir vətəndaşın arxalana biləcəyi bir ordu yaradılması məsələsini qarşıya məqsəd qoymuşdur.

Azərbaycanın maddi imkanları artdıqca ordu quruculuğuna daha çox qayğı göstərilir. Hərbçilərin sosial-məişət məsələlərinin həlli daim diqqət mərkəzində saxlanılır. Son bir neçə ildə Azərbaycanda müasir və çox güclü hərbi sənaye kompleksi yaradılmışdır. Respublikada 21 hərbi müəssisə, hərbi zavod, 30 istehsal sahəsi fəaliyyət göstərir. İstehsal olunan məhsullar ən yüksək dünya standartlarına cavab verir, beynəlxalq bazarlara çıxarılır. Azərbaycana lazım olan hərbi texnika və silah-sursatın Azərbaycanda istehsal olunması üçün əlbəttə, ölkəyə yeni texnologiyalar gətirilməli, peşəkar mütəxəssislər hazırlanmalı və maliyyə imkanları ayrılmalıdır. Bütün bu amillər bu gün Azərbaycanda mövcuddur. İlbəil artan hərbi xərclərin tərkib hissəsi olan müdafiə sənayesinə ayrılan xərclər də artır.

2008-ci il mayın 26-da Azərbaycan Silahlı Qüvvələrinin 90 illik yubileyi münasibətilə təntənəli hərbi parad keçirilmişdir. Hərbi paradda Silahlı Qüvvələrin bütün qoşun növlərinin, hərbi birlik və birləşmələrin, hərbi tədris müəssisələrinin, həmçinin qanunvericilikdə nəzərdə tutulan başqa silahlı birləşmələrin 4510 nəfərlik şəxsi heyəti, 210 modernləşdirilmiş hərbi texnika, döyüş vertolyotları, təyyarələri, gəmiləri iştirak etmişdir. Bu möhtəşəm tədbir Azərbaycan xalqının ümummilli lideri Heydər Əliyev ideyalarına sədaqət və ehtiramının təntənəsi olmaqla yanaşı, Silahlı Qüvvələrimizin güc və qüdrətinin nümayişi idi. Dövlətimizin başçısı İlham Əliyev hərbi paraddakı nitqində demişdir: “Azərbaycan öz torpaqlarının bir hissəsini müvəqqəti olaraq itiribdir. Belə olan halda, ordu quruculuğu, müdafiə potensialının möhkəmlənməsi və güclü ordunun yaranması dövlət üçün, hökumət üçün, hər bir vətəndaş üçün bir nömrəli vəzifədir. Biz bu istiqamətdə öz səylərimizi davam etdirəcəyik”.

Bu günlər, Azərbaycan Silahlı Qüvvələrinin 92-ci ildönümü ərəfəsində Bakı ətrafında top səsləri eşidilirdi. Müdafiə Nazirliyinin, Dövlət Sərhəd Xidmətinin və Daxili İşlər Nazirliyinin Daxili Qoşunlarının birləşmə və hissələrinin irimiqyaslı birgə əməliyyat-taktiki təlim keçirdi. Azərbaycan Prezidenti İlham Əliyev bölmələrin, hissələrin və silah sistemlərinin taktiki döyüş tətbiqini əhatə edən təlimin əsas mərhələsini izləmişdir. Dövlətimizin başçısı demişdir: “Biz hərbi gücümüzü artırmalıyıq və artırırıq. Bu gün Azərbaycan Ordusu qarşıda duran bütün vəzifələri şərəflə yerinə yetirməyə hazırdır. Bir daha demək istəyirəm ki, döyüş qabiliyyəti, peşəkarlıq, vətənpərvərlik ruhu, maddi-texniki bazanın möhkəmlənməsi, orduya dövlət tərəfindən göstərilən diqqət və hörmət - bütün bu amillər bizə imkan verəcək ki, doğma torpaqlarımızı işğalçılardan azad edək”.

Azərbaycan Prezidenti, Silahlı Qüvvələrin Ali Baş Komandanı ölkəmizin müstəqilliyinin, ərazi bütövlüyünün qorunub saxlanılmasında xüsusi xidmətlərinə, öz xidməti vəzifələrini və hərbi hissənin qarşısında qoyulmuş tapşırıqları yerinə yetirərkən fərqləndiklərinə görə Silahlı Qüvvələrin bir qrup hərbi qulluqçusunun təltif edilməsi haqqında Sərəncam imzalamışdır.

Sərəncamla 11 nəfər “Vətən uğrunda”, 6 nəfər “İgidliyə görə”, 53 nəfər isə “Hərbi xidmətlərə görə” medalları ilə təltif olunmuşdur.

Ulu Qarabağ, əzəmətli Şuşa qalası, dahi Üzeyir bəyin ocağı, Ağdam, Cəbrayıl, Qubadlı, Laçın, Zəngilan, Füzuli, Kəlbəcər... Ümidimiz sənədir, Azərbaycan əsgəri!

Fəridə Abdullayeva

AZƏRTAC-ın müxbiri