İsmayıllı, 26 iyul, AZƏRTAC 

Bu ildən başlayaraq İsmayıllı rayon büdcəsi özünümaliyyələşdirmə qaydasında, yəni respublika büdcəsindən dotasiya almadan icra edilir. Ötən altı ayda rayon büdcəsinin gəlirlər hissəsi 2 milyon 813 min manata qarşı 2 milyon 826 min manat icra olunub. İlin birinci yarısında rayonda ümumi məhsul buraxılışı faktiki qiymətlərlə 72 milyon 485 min manat olub ki, bu da ötən ilin müvafiq dövrü ilə müqayisədə 3 milyon 882 min manat və ya 5,7 faiz çoxdur.

AZƏRTAC xəbər verir ki, bu rəqəmlər İsmayıllıda 2017-ci ilin altı ayında sosial-iqtisadi inkişafın yekunları və qarşıda duran vəzifələrə həsr olunan hesabat yığıncağında səsləndirilib.

Hesabat məruzəsi ilə çıxış edən rayon icra hakimiyyətinin başçısı Mirdaməd Sadıqov, eləcə də digərləri yarım ildə İsmayıllıda xeyli tikinti-quruculuq və abadlıq işlərinin görüldüyünü diqqətə çatdırıblar. Bildirilib ki, Yenikənd kəndində modul tipli məktəb binasının, mərkəzi xəstəxananın yaxınlığında aptekin tikintisi başa çatdırılıb, bazar yaxınlığındakı saat meydanı ətrafında vaxtilə köhnə və primitiv tikilən dəmirçi sexləri və digər obyektlərin köçürülməsi üçün təzə yerlərin inşası davam etdirilib. Dövlətimizin başçısının müvafiq Sərəncamı ilə ayrılan 3 milyon manat vəsait hesabına İsmayıllı şəhərində 30 ictimai yaşayış binasında əsaslı təmir işləri görülür. Keyvəndi kəndində iri heyvandarlıq təsərrüfatının, Kürdmaşı kəndində “Buta” şirkətlər qrupu tərəfindən 2200 ton tutumu olan soyuducu kameranın, şəhərin M.F.Axundzadə küçəsində 2 doqquzmərtəbəli yaşayış binasının, S.Ə.Şirvani küçəsində “Azərxalça” ASC tərəfindən 170 nəfər toxucunun işləyə biləcəyi xalçaçılıq müəssisəsinin, Heydər Əliyev prospektində beşmərtəbəli üçulduzlu otelin, Tircan kəndi yaxınlığında “Bədo” istirahət, müalicə və sanatoriya mərkəzinin tikintisi davam etdirilib. Bu ilin sentyabr-oktyabr aylarında həmin obyektlərin bir hissəsinin açılışı nəzərdə tutulub.

Məruzə və çıxışlarda aqrar sektorda görülən işlər də geniş təhlil edilib. Vurğulanıb ki, bu il 137 hektarı çovdar olmaqla, 28 min 386 hektarda taxıl yetişdirilib. Ümumilikdə orta məhsuldarlıq 37,1 sentner təşkil edib. Hələlik 74 min 399 ton taxıl biçilib.

Bu ilin məhsulu üçün 4347 hektar sahədə yazlıq bitkilər əkilib ki, bu da keçən illə müqayisədə 1351 hektar çoxdur. Ölkəmizdə həyata keçirilən aqrar islahatlar, o cümlədən ixracyönümlü məhsulların istehsalına maraq rayonda baramaçılığın, tütünçülüyün, habelə fındıqçılığın inkişafına güclü təkan verib. Cari mövsümdə 2849 kiloqram barama istehsal olunub. Qurbanəfəndi, Topçu, Qalınçaq, Təzəkənd, Diyallı kəndlərində əkilən 15 hektar tütün sahələrində yarpaq dərimi aparılır. Rayon ərazisində 601,2 hektar sahədə yeni fındıq bağları salınıb ki, bunun da 142,5 hektarı bu ilin yaz mövsümündə əkilib.

Rayonda heyvandarlığın inkişafı, mal-qaranın cins tərkibinin yaxşılaşdırılması istiqamətində də ardıcıl tədbirlər görülür. Yarım ildə bütün göstəricilər üzrə məhsul istehsalı ötən ilin müvafiq dövrü ilə müqayisədə artıb.

Məruzə və çıxışlarda təhsil, səhiyyə, mədəniyyət sahələrində görülən işlər, qazanılan nailiyyətlər, turizmin inkişafı ilə bağlı həyata keçirilən tədbirlər, habelə əhalinin elektrik enerjisi, təbii qazla təminatı, yol infrastrukturunun yaxşılaşdırılması ilə bağlı məsələlər ətraflı təhlil olunub, qarşıda duran vəzifələrdən danışılıb.