İSTEDADA VƏ GÖZƏLLİYƏ HİMN
Gələn il istedadlı şərqşünas alim, XX əsrin görkəmli qadınlarından biri olmuş Aida İmanquliyevanın yubileyi qeyd ediləcəkdir.
Zənnimcə, bu əlamətdar hadisəyə həsr edilmiş layihənin həyata keçirilməsi, Azərbaycan mədəniyyətini, onun incəsənətini və elmini dünyada daha da məşhurlaşdıracaq, xalqımızı Şərqin və Qərbin ən yaxşı mədəni-mənəvi ənənələrinin inteqratoru kimi nəcib bir missiyanın həqiqi daşıyıcısı kimi təqdim edəcəkdir. Bu möhtəşəm layihənin həyata keçirilməsində əsas rolu Kanadada yaradılmış və dünya mədəniyyətinin inkişafına, müxtəlif xalqların mədəniyyətlərinin yaxınlaşmasına xidmət edən Aida İmanquliyeva adına Beynəlxalq Universal Mədəni Dəyərlər Mərkəzi oynayır. “Dünyanın qızılgülü” adlı sənədli filmin çəkilməsini, eyniadlı baletin göstərilməsini, Cenevrədə, BMT-nin mərkəzi konsert salonunda yubiley şənliyi keçirilməsini nəzərdə tutan layihənin müəllifləri Torontoda yaşayan həmvətənlərimiz, Mərkəzin prezidenti, dirijor və bəstəkar İsmayıl Hacıyev, onun qardaşı və həmkarı Mikayıl Hacıyevdir.
Onların nəzərdə tutduğu sənədli film (onun üzərində iş artıq başlanmışdır), təəssüf ki, dünyasını vaxtsız dəyişmiz görkəmli müasirimizin həyatı və elmi fəaliyyəti barədə çox maraqlı, artıq hazır olan filmin, müəyyən mənada davamı olacaqdır. Əvvəlki film kimi, onun davamı da bir sıra müsahibələr əsasında qurulacaqdır. Bu filmdə tamaşaçılar haqlı olaraq bəşər cəmiyyətinin liderləri sayılan insanları görəcəklər. Onların arasında Mayya Plisetskaya və Rodion Şedrin, Valeri Gergiyev və Yo Yo Ma, Nina Koqan, Atis Bankas və başqa görkəmli elm və mədəniyyət xadimləri olacaqdır. Aida İmanquliyevanın özünün şəxsiyyəti Şərqdə, xüsusən Azərbaycanda mütərəqqi beynəlmiləlçilik ideyalarının carçılarından biri kimi təqdim ediləcəkdir.
Layihənin ikinci hissəsini təşkil edəcək baletə gəldikdə isə, onun libretto və musiqisi artıq hazırdır. Bəstəkar İsmayıl Hacıyev öz baletini əbədi və əzəli qadın gözəlliyinə himn kimi düşünmüşdür. Bu gözəllik insanı ruhən saflaşdırır, onu ucaldır. Bu, “Gözəllər gözəli” adlandırılan dünyanın mühafizəçisi obrazının tərənnümüdür. Dünyanın qızılgülü kimi də çıxış edən bu obraz bəşər mədəniyyətlərini və sivilizasiyalarını yaxınlaşdırır, öz sevgisi ilə incəsənətin bütün növlərini və bəşəriyyətin yaratdığı böyük dəyərləri qoruyur.
Müəllif baletin quruluşunu hazırda Torontoda yaşayan, əsərin librettosu və musiqisi ilə artıq tanış olmuş əfsanəvi baletmeystr və rəqqasə N.Veselovaya təklif etmək niyyətindədir. Müəllif böyük sənətkar Mayya Plisetskayanın və görkəmli bəstəkar Rodion Şedrinin köməyinə də çox ümid bəsləyir, onları “Dünyanın qızılgülü” baletinin bədii rəhbəri, musiqi məsləhətçisi kimi görmək istəyir. Hazırda Sankt-Peterburqun Mariya Opera və Balet Teatrı ilə yanaşı, London Simfonik Orkestrinə və Nyu-Yorkdakı Metropoliten-Opera Orkestrinə də rəhbərlik edən böyük sənətkar Valeri Gergiyev də bu layihəyə böyük ümid bəsləyir.
Aida İmanquliyevanın xatirəsinə həsr edilmiş, bütövlükdə İstedad və Gözəlliyə Himn olan layihənin üçüncü hissəsi Cenevrədə, BMT-nin konsert salonunda reallaşdırılacaqdır.
Bölmənin digər xəbərləri
