Roma, 24 sentyabr, AZƏRTAC

İtaliya Senatında keçmiş Prezident Corcio Napolitano üçün cənazə otağı açılıb.

AZƏRTAC xəbər verir ki, mərasimdə İtaliya Prezidenti Sercio Mattarella, Senatın sədri İqnazio Benito Maria La Russa, mərhumun ailə üzvləri və digər rəsmi şəxslər iştirak ediblər. Cənazə otağı bu gün saat 11:00-dan 19:00-dək, sentyabrın 25-də isə 10:00-dan 16:00-dək hər kəs üçün açıq olacaq.

Xatırladaq ki, 98 yaşında vəfat edən İtaliyanın 11-ci Prezidenti Corcio Napolitano ilə dövlət səviyyəsində vida mərasimi sentyabrın 26-da keçiriləcək.

Görkəmli dövlət xadimi Corcio Napolitano İtaliya tarixində iki dəfə prezident seçilən yeganə dövlət başçısı idi. O, ilk dəfə 2006-cı ildə, ikinci dəfə isə 2013-cü ildə prezident seçilib və 7 illik səlahiyyət müddətini başa vurmadan 2015-ci il yanvarın 14-də istefa verib. Corcio Napolitano İtaliyanın fəxri Prezidenti, 2015-ci ildən isə ömürlük senator idi.

Nihad Budaqov

AZƏRTAC-ın xüsusi müxbiri

Roma