MACARISTANDA AZƏRBAYCAN GÜNLƏRİ BAŞA ÇATMIŞDIR
Azərbaycanın Macarıstandakı səfiri Həsən Həsənov salona toplaşanları salamlayaraq demişdir ki, görüş əlamətdar hadisə - Respublika gününün 88-ci ildönümü münasibətilə keçirilir. Səfir bu hadisənin Azərbaycan tarixindəki əhəmiyyətini xüsusi vurğulamışdır. Maraqlıdır ki, Azərbaycan Xalq Cümhuriyyəti hökumətinin ilk dekretlərindən biri o vaxt ölkəmizdə saxlanılan Birinci dünya müharibəsi əsirlərinin azadlığa buraxılmasına həsr olunmuşdu. Bakıda çıxan “Kaspi” qəzetində macar dilində dərc olunan müraciətə əsasən, macarlara vətənə qayıtmağa icazə verilirdi.
Həsən Həsənov müstəqil Azərbaycanın bu günündən danışarkən torpaqlarımızın 20 faizinin işğalı, doğma yurdlarından qovulan 1 milyon azərbaycanlının qaçqına çevrilməsi ilə nəticələnən Ermənistanın görünməmiş təcavüzünü xüsusi vurğulamışdır. Bu çətinliklərə baxmayaraq, ümummilli liderimiz Heydər Əliyevin böyük səyləri sayəsində Azərbaycan iqtisadiyyatın, sosial sahənin və mədəniyyətin inkişafında böyük nailiyyətlər qazanmış, dünya birliyinin bərabərhüquqlu və etibarlı tərəfdaşına çevrilmişdir. Bu gün ölkəmiz Prezident İlham Əliyevin başçılığı altında insan hüquq və azadlıqlarına riayət olunan demokratik və sivil dövlət qurur.
Həmin gün salonda səslənən Azərbaycan musiqisi macarlara xalqımızın ruhunu duymaq imkanı vermişdir. Tarzən Firuz Əliyevin və kamançaçalan İsmayıl Həmidovun virtuoz müşayiəti ilə xalq artistləri Ağaxan Abdullayev, Nəzakət Teymurova yüksək məharət nümayiş etdirərək, auditoriyanı heyran qoymuşlar. Onların çıxışları sürəkli alqışlarla qarşılanmışdır. Məsumə İsrafilzadə və Vaqif Məmmədov Azərbaycan xalq rəqslərini böyük şövqlə ifa etmişlər.
Sonra Emin Məmmədov, Vaqif Əliyev və Emil Həsənovun ifasında bir neçə caz-muğam kompozisiyası səslənmişdir. Sonda gənc ifaçı Afaq Bədəlbəyli Səməd Vurğunun “Azərbaycan” şeirini oxumuşdur.
Konsert Macarıstanda Azərbaycan Günlərini başa çatdırmışdır. Yekdil rəyə əsasən, Günlər xalqlarımız arasında dostluq və əməkdaşlıq münasibətlərinin möhkəmlənməsinə və inkişafına böyük töhfə vermişdir.
Bölmənin digər xəbərləri
