Bakı, 30 may (AZƏRTAC). Prezident İlham Əliyevin tapşırıq və tövsiyəsinə əsasən, mərkəzi icra hakimiyyəti orqanlarının rəhbərləri bölgələrdə vətəndaşların qəbulunu keçirir, onların müxtəlif məsələlərlə bağlı müraciətlərinin, ərizə və şikayətlərinin müsbət həll olunması üçün müvafiq tədbirlər görürlər.

Mədəniyyət və turizm naziri Əbülfəs Qarayevin vətəndaşlarla növbəti görüşü Şəmkir şəhərində keçirilmişdir.

Nazirliyin mətbuat xidmətindən AZƏRTAC-a bildirmişlər ki, mayın 30-da Əbülfəs Qarayev Şəmkir şəhərindəki "Zəka" Gənclərin İntellektual İnkişaf və Yaradıcılıq Mərkəzində Gəncə şəhərindən, Şəmkir, Ağstafa, Gədəbəy, Qazax, Tovuz və Kəlbəcər rayonlarından olan vətəndaşları qəbul etmişdir.

Nazirliyin " [email protected]" elektron poçt ünvanı, "e-services." , " mct.gov.az" elektron xidmətlər saytı, telefon məlumat sistemi (qaynar xətt: 147) vasitəsilə, eləcə də müvafiq mədəniyyət və turizm şöbələrinə müraciət etməklə qəbula yazılmış 30-dək vətəndaş müxtəlif məsələlərlə bağlı xahiş və təkliflərini nazirə ünvanlamışdır.

Müraciətlər əsas etibarilə yerlərdə müasir kitabxanaların yaradılması, tarixi abidələrin bərpası, sərhədyanı kəndlərində yeni mədəniyyət ocaqlarının açılması, mədəniyyət müəssisələrində ştatların artırılması, turizmin inkişaf etdirilməsi, habelə mədəniyyət işçilərinə fəxri adların verilməsi, işlə təminat və digər sosial məsələlərlə bağlı olmuşdur.

Nazir jurnalistlərə müsahibəsində vətəndaşların bölgələrdə mədəniyyət və turizmlə bağlı əhəmiyyətli mövzulara diqqət ayırmalarını təqdirəlayiq hal kimi qiymətləndirmişdir. Qeyd etmişdir ki, bütün xahiş, təklif və təşəbbüslərlə bağlı müvafiq tədbirlər görüləcəkdir. Ə.Qarayev demişdir: "Sevindirici haldır ki, bu gün vətəndaşlarımızın qaldırdıqları məsələlər günün tələblərindən irəli gəlir. Bu isə onu göstərir ki, bölgələrimiz öz inkişaf dövrünü yaşayır, sakinlər mədəniyyət ocaqlarımızın müasir səviyyədə xidmət göstərməsini, yerlərdə turizmin daha da inkişaf etdirilməsini istəyirlər. Biz də nazirlik olaraq əsas diqqətimizi bu sahəyə yönəldirik ki, mövcud tələbləri qarşılayaq, əhaliyə yüksək səviyyəli mədəni xidmət göstərək".

Əbülfəs Qarayev qəbul zamanı səslənən konkret təşəbbüslərin diqqətdə saxlanılacağını bildirmişdir. Şəmkir şəhərində tolerantlıq mövzusunda, bölgədəki alman abidələri və tarixi-mədəni irsi ilə bağlı beynəlxalq tədbirlərin təşkili barədə təşəbbüsü müsbət qarşılayan nazir bu məsələlərin nəzərdən keçiriləcəyini diqqətə çatdırmışdır.

Nazir sosial məsələlərlə bağlı xahiş və müraciətlərə də baxılacağını, imkan daxilində onların həllinə köməklik göstəriləcəyini qeyd etmişdir.

Qəbuldan sonra Əbülfəs Qarayevin və nazirliyin məsul işçilərinin iştirakı ilə zona müşavirəsi keçirilmişdir.