“Məriz” filminə baxış keçirilib
Bakı, 25 fevral, AZƏRTAC
Fevralın 25-də Nizami Kino Mərkəzində gənc rejissor Elvin Abdullayevin quruluş verdiyi “Məriz” filminə baxış keçirilib.
AZƏRTAC xəbər verir ki, yaradıcı heyətin adından Samirə Ərəstun film haqqında məlumat verib.
Bildirilib ki, “Nano Film Production” studiyasının istehsalı olan film xüsusi olaraq, Xocalı soyqırımının 23-cü ildönümünə həsr edilib. Filmdə 13 yaşlı Xocalı sakini Qeyrət adlı bir yeniyetmənin yaddaşında bu faciənin necə ağır psixoloji izlər buraxmasından, düşmənlərimizin amansız vəhşiliyindən bəhs edilir.
Filmin ssenari müəllifi və quruluşçu rejissoru Elvin Abdullayev bildirib ki, on bir dəqiqəlik bu ekran əsərinin əsas qayəsi Dağlıq Qarabağda baş verən hadisələrin Qeyrət kimi neçə-neçə Xocalı sakininin qayğısız həyatını darmadağın etməsini diqqətə çatdırmaqdır.
Erməni barbarlarının vəhşicəsinə qətlə yetirdiyi ata-anasının son baxışlarını, amansızlığın, cəlladlığın son həddini görmüş yeniyetmə Qeyrət uzun illər sonra da bu psixoloji zədədən qurtara bilmir.
Xatirələr ona hər gün, hər an eyni əzabı verir, amma bunları daha Xocalıda deyil, düşdüyü ruhi-əsəb dispanserində yaşayır...
Filmdə baş rolları xalq artisti Ramiz Novruzov, əməkdar artist Aybəniz Haşımova, aktyorlar Səmimi Fərhad, Zarina Qurbanova və digərləri ifa ediblər.
Bölmənin digər xəbərləri
