ELM VƏ TƏHSİL
“MİS” KİTABINDA MƏDƏNİ İRSİMİZİN QİYMƏTLİ NÜMUNƏLƏRİ TOPLANMIŞDIR
Bakı, 18 iyun (AZƏRTAC). İyunun 18-də Azərbaycan Milli Elmlər Akademiyası (AMEA) Rəyasət Heyətinin binasında “Regionların İnkişafı” İctimai Birliyinin xüsusi layihəsi əsasında çap edilmiş “Mis” kitabının təqdimat mərasimi keçirilmişdir.
Tədbirdən əvvəl kitabın müəllifi Şəfəq Qurbanovanın mis məmulatları kolleksiyasını əks etdirən sərgisi açılmışdır.
AMEA-nın prezidenti, akademik Mahmud Kərimov bildirmişdir ki, Azərbaycan xalqının minilliklər boyu yaratdığı yüksək maddi və mənəvi dəyərlər dünya mədəniyyətini daha da zənginləşdirmişdir.
Vurğulanmışdır ki, misgərlik sənəti Azərbaycanda geniş təşəkkül tapmış və mis qab-qacaq əhalinin bütün sosial zümrələrinin məişətində geniş işlədilmişdir.
Akademik diqqətə çatdırmışdır ki, belə kitabların nəşri Azərbaycan xalqının mədəni irsinin qiymətli nümunələrinin daha geniş şəkildə tanıdılmasına təkan verəcək və misgərlik sənətinin yaxından öyrənilməsinə dəyərli töhfə olacaqdır.
Tədbirdə çıxış edən AMEA Arxeologiya və Etnoqrafiya İnstitutunun direktoru, tarix elmləri doktoru Maisə Rəhimova, A.A.Bakıxanov adına Tarix İnstitutunun direktoru, akademiyanın müxbir üzvü, Milli Məclisin deputatı Yaqub Mahmudov, tarix elmləri doktoru Kərim Şükürov və “Regionların İnkişafı” İctimai Birliyi sədrinin müavini Taleh Həmid kitabın məziyyətlərindən danışmış və müəllifin mis qabların toplanılması, tədqiqi və gələcək nəsillərə çatdırılması istiqamətində gördüyü işi yüksək qiymətləndirmişlər.
Bildirilmişdir ki, AMEA-nın Arxeologiya və Etnoqrafiya İnstitutu elmi şurasının qərarı ilə çap edilmiş bu kitabda maddi-mədəni irsimiz, xalqımızın maddiləşmiş yaddaşı, onun keçmişi, məişəti, həyat tərzi, dünyagörüşü, estetik təsəvvürləri haqqında qiymətli informasiyalar toplanmışdır.
Natiqlər demişlər ki, bədnam qonşularımızın maddi irsimizə də təcavüz etdiyi, onu özününküləşdirməyə cəhdlər göstərdiyi bir vaxtda nəsildən-nəslə ötürülərək günümüzədək gəlib çatmış maddi-mədəniyyət qalıqlarının, bədii sənət əsərlərinin qorunmasına və təbliğinə diqqət və qayğı göstərmək vacib məsələdir. Bu mənada Şəfəq Qurbanovanın uzun illər ərzində topladığı Azərbaycan sənətkarlarının hazırladığı mis məmulatlarının kolleksiyası böyük maraq doğurur. Həmin kolleksiya əsasında tərtib olunmuş kataloq keçmişdə xalqımızın məişətində istifadə olunmuş 40 növdən artıq mis avadanlığı özündə əks etdirir. Bu kataloqa salınmış mis məmulatlarının təsnifatı və tipoloji zənginliyi mis qab-qacağın xalqımızın məişətində geniş yayıldığını göstərir.
Arxeoloji qazıntılar sübut edir ki, Azərbaycanda mislə tanışlıq eramızdan əvvəl VI minilliyin sonunda baş vermişdir. Gədəbəy, Daşkəsən və Balakən rayonları ərazilərində zəngin mis yataqlarının mövcudluğu, onların istismarına hələ çox qədimdən başlanılması metallurgiya və metalişləmənin təşəkkül və inkişafı üçün əlverişli zəmin yaratmışdır.
Xüsusi olaraq diqqətə çatdırılmışdır ki, mis məmulat üzərindəki qrafika və təsviri sənət ornamentlərinin mürəkkəb kompozisiyası tamamlanmış əsər olmaqla Azərbaycan ustalarının istedadından və onların sənətinin özünəməxsusluğundan xəbər verir.
Mərasimin iştirakçılarına minnətdarlığını bildirən müəllif Şəfəq Qurbanova uşaq yaşlarından onda mis qablara böyük maraq yarandığını və son 20 ildə ölkəmizin müxtəlif bölgələrini gəzərək 700-dən çox mis məmulatı öz kolleksiyasına topladığını diqqətə çatdırmışdır.
“Çaşıoğlu” mətbəəsində yüksək dizayn və xüsusi zövqlə çap edilmiş 256 səhifəlik bu kitab-kataloq geniş oxucu kütləsi üçün nəzərdə tutulmuşdur.
######