MURMANSKDA UNUDULMAYAN AZƏRBAYCAN...
Murmansk, 26 noyabr (AZƏRTAC). Kola yarımadasında yaşayan azərbaycanlılar Ümumrusiya Azərbaycan Konqresinin Murmansk bölməsinin Sverdlovsk küçəsində yerləşən ofisinə gedən yolu yaxşı tanıyırlar. İndi çox vaxt buraya Azərbaycan və Rusiya xalqlarının dostluğu muzeyi kimi baş çəkirlər. Ofisin divarları qəzet və jurnal səhifələrindən kəsilib götürülmüş və Murmansk vilayətində yaşayan 25 min azərbaycanlının həyatından bəhs edən məqalə və məlumatlarla bəzədilmişdir. Gözəl çərçivəyə alınmış nə az, nə çox 200 məqalə! Murmans azırbaycanlıları “Mubrmanski vestnik”, “Bakinski raboçi”, “Komsomolskaya pravda”, “Komsomolets Zapolyarya”, “Azərbaycan”, “Respublika”, “Xalq qəzeti”, “Azerbaydjanski konqres” qəzetlərində yer almış məqalələri, informasiya agentliklərinin və Azərbaycan Dövlət Teleqraf Agentliyinin (AZƏRTAC), “Azerbaydjanskiye novosti”nin məlumatlarını, “Murmansk sity”, “Street Club Murmansk” jurnallarındakı rəngarəng fotoreportajları sevə-sevə toplamışlar.
Azərbaycan jurnalisti və Azərbaycan diasporunun fəal nümayəndəsi Əlihüseyn Şükürov xəbər verir ki, buraya gələn hər bir qonaq həmvətənlərimizin uzaq Şimalın iqtisadiyyatına, elm və mədəniyyətinə verdikləri töhfə, onların Qırmızı Bayraqlı Şimal Donanması gəmilərində çətin xidmətləri, idman və yaradıcılıq nailiyyətləri barədə jurnalistlərin səmimi söhbətlərini yaddaşlarında təzələmək imkanı əldə edirlər. Günəşli Azərbaycanın təmsilçilərinin öz bayramlarını və ənənələrini sərt təbii iqlim şəraitində necə qoruyub saxladıqları barədə oxuyanda təsirlənməmək olmur.
Ayrıca stenddə ana dilində kitablar və dərsliklər, Murmansk vilayəti qubernatorunun Rusiyanın şimal-qərb regionunun inkişafına həımvətənlərimizin verdikləri töhfələrə görə fəxri fərmanları və diplomları nümayiş etdirilir.
Əlbəttə, ən görünən yerdə Rusiya Federasiyasının və Azərbaycan Respublikasının prezidentləri Dmitri Medvedevin və İlham Əliyevin, habelə mürəkkəb postsovet dövründə iki xalq arasında qarşılıqlı münasibətlərin təməlini qoymuş ümummilli lider Heydər Əliyevin portretləri asılmışdır. Murmanskda unudulmayan Azərbaycanın və uzaq Şimal diyarının rəngarəng fotomənzərələri ekspozisiyaya lirik bir ab-hava gətirir.
Murmansk
Bölmənin digər xəbərləri
