Müstəqilliyə aparan yolun əvvəli 20 Yanvardan başlanır
Bakı, 17 yanvar, AZƏRTAC
Qanlı 20 Yanvar hadisələrindən 30 il keçsə də, xalqımız həmin müdhiş gecəni daim xatırlayır, faciəni törədənlərin mənfur və bədxah əməllərini pisləyir. XX əsr tarixində totalitarizmin törətdiyi ən qanlı terror aktlarından biri olan 20 Yanvar faciəsində Azərbaycan xalqına qarşı işlədilmiş cinayət, əslində, bəşəriyyətə, humanizmə, insanlığa qarşı həyata keçirilmiş dəhşətli bir əməldir.
Səhiyyə Nazirliyinin mətbuat xidmətindən AZƏRTAC-a verilən məlumata görə, Əziz Əliyev adına Azərbaycan Dövlət Həkimləri Təkmilləşdirmə İnstitutunun Elmi Şurasının 20 Yanvar faciəsinin ildönümünə həsr olunmuş yığıncağında bu barədə danışılıb.
Şəhidlərin xatirəsi bir dəqiqəlik sükutla yad ediləndən sonra institutun rektoru, professor Nazim Qasımov qanlı 20 Yanvar gecəsi baş verənləri insanlığa qarşı törədilmiş ən ağır cinayətlərdən biri kimi dəyərləndirib: “Bu, keçmiş sovet hərb maşınının böyük bir millətə tuşlanmış amansız terror aktı idi. Yanvarın 21-də ümummilli lider Heydər Əliyev üzləşdiyi təzyiqlərə baxmayaraq cəsarətli bəyanatı ilə xalqımıza sədaqətini bir daha göstərdi. O, mənsub olduğu xalqın faciəsinə məsuliyyət daşıyanları Kremlin bir addımlığında, həm də bütün dünyanın gözü qarşısında ittiham etdi”.
Rektor 20 Yanvar faciəsinə tam siyasi-hüquqi qiymət verilməsi məsələsinin də məhz Ümummilli Liderin ölkəmizdə hakimiyyətə qayıdışından sonra olduğunu qeyd edib və bildirib ki, 20 Yanvar iştirakçıları və şəhid ailələri dövlətin daim diqqət mərkəzindədir. Prezident İlham Əliyev şəhidlərin adının uca tutulmasına, onların ailələrinin sosial məsələlərinin yoluna qoyulmasına xüsusi qayğı göstərir və daim nəzarətdə saxlayır. Xalqımızın qan yaddaşında silinməz iz qoyan bu hadisə müstəqilliyə qovuşmaq yolunda aparılan mübarizənin ilk addımlarından biri kimi həmişə xatırlanacaq və heç vaxt unudulmayacaq.
İnstitutun hematologiya kafedrasının müdiri, dosent Elmira Qədimova canlı şahidi olduğu hadisələri xatırlayaraq deyib ki, Azərbaycan xalqı 1990-cı ilin Qanlı Yanvarını həm faciə, həm də qəhrəmanlıq səhifəsi kimi yaşayıb.
Terapiya fakültəsinin dekanı, tibb elmləri doktoru Zemfira Quliyeva bildirib ki, həmin gün dinc sakinlərin xüsusi qəddarlıqla qətlə yetirilməsi, 1000-ə yaxın vətəndaşın yaralanması xalqımız üçün çox böyük faciə idi. Lakin bu hadisə, eyni zamanda, xalqımızın milli azadlıq və müstəqillik uğrunda mübarizəsinin kulminasiya, dönüş nöqtəsinə çevrilib.
Sonra Qanlı 20 Yanvar hadisələrindən bəhs edən videoçarx nümayiş olunub.
Bölmənin digər xəbərləri
