REGİONLAR
Muxtar respublika müəllimləri hərtərəfli dövlət qayğısı ilə əhatə olunub
Naxçıvan, 5 oktyabr, AZƏRTAC
Müstəqillik illərində 200-dən çox təhsil müəssisəsi üçün yeni tədris korpusları tikilib istifadəyə verilib
Bu gün Azərbaycanda və onun Naxçıvan Muxtar Respublikasında təhsil sahəsində ardıcıl tədbirlər görülür. Bunun nəticəsidir ki, müstəqillik illərində muxtar respublikanın şəhər, rayon və kəndlərində 200-dən çox təhsil müəssisəsi üçün yeni tədris korpusları tikilib istifadəyə verilib. Hər il olduğu kimi, bu il də muxtar respublikanın paytaxtı daxil olmaqla, bütün bölgələrində geniş vüsət alan quruculuq və abadlıq işlərinin önündə təhsil müəssisələrinin tikintisi dayanır. Naxçıvan Muxtar Respublikası Təhsil Nazirliyinin mətbuat xidmətinin məlumatına əsasən, təkcə 2021-ci ildə 5 məktəb binası tikilərək və ya əsaslı şəkildə yenidən qurularaq istifadəyə verilib, hazırda 9 təhsil müəssisəsində binaların tikintisi və ya yenidən qurulması davam etdirilir.
Təhsil müəssisələrinin müasir tədris vəsaitləri və informasiya texnologiyaları ilə təminatına da xüsusi diqqət yetirilir. Muxtar respublikanın ümumtəhsil müəssisələrində sürətli internetə çıxışı olan 5700-dən artıq kompüter və 650-dən çox elektron lövhə quraşdırılıb, laboratoriya və fənn kabinələri şagirdlərin istifadəsinə verilib, kitabxanalar 3 milyona yaxın dərslik, 600 mindən çox latın qrafikası ilə nəşr olunmuş bədii ədəbiyyatla təmin olunub.
Naxçıvan Muxtar Respublikası Ali Məclisi Sədrinin “Naxçıvan Muxtar Respublikasının təhsil müəssisələrində elektron təhsilin təşkili ilə bağlı əlavə tədbirlər haqqında” 2014-cü il 20 iyun tarixli Sərəncamının icrası bütün təhsil müəssisələrində təhsilin keyfiyyətinin yaxşılaşmasına əhəmiyyətli dərəcədə təsir göstərib, yeni təlim üsullarının tətbiqinə əlverişli şərait yaradıb. Son illər məktəblərdə tədrisin müasirləşdirilməsi diqqətdə saxlanılıb, qabaqcıl tədris metodlarının, o cümlədən distant təhsilin və STEAM təhsil metodunun tətbiqinə başlanılıb. Bu istiqamətdə həyata keçirilən tədbirlər nəticəsində Azərbaycanın tarixi, mədəniyyəti ilə bağlı mövzuların tədrisi prosesində muzeylərlə, Azərbaycan Milli Elmlər Akademiyasının Naxçıvan Bölməsi ilə ümumtəhsil məktəbləri arasında interaktiv dərslər keçilir. Qısa müddət ərzində 53 təhsil müəssisəsində STEAM kabinəsi yaradılıb, STEAM təhsili ilə bağlı nəşrlər hazırlanıb. Hazırda 50 ümumtəhsil məktəbində STEAM kabinələrinin yaradılması istiqamətində iş aparılır. Ümumtəhsil müəssisələrində STEAM təhsil metodunun tətbiqi ilə yanaşı, şagirdlərin istedad və bacarıqlarının inkişafına, eləcə də onların elmi axtarışlara sövq edilməsinə yönəlmiş bir sıra layihələr də tətbiq olunur. Bu layihələrdən biri də 2019-2020-ci tədris ilindən tətbiq edilən “Sabahın tədqiqatçıları” layihəsidir. Layihə çərçivəsində Naxçıvan şəhərində yerləşən ümumtəhsil məktəblərindən xüsusi istedad və qabiliyyəti ilə fərqlənən şagirdlər Azərbaycan Milli Elmlər Akademiyası Naxçıvan Bölməsinin alimləri tərəfindən elmi himayəyə götürülür, şagirdlərlə birgə laboratoriyalarda tədqiqatlar aparılır, məruzə, tezis, referat və hesabatlar hazırlanır. Bunlarla yanaşı, sağlamlıq imkanları məhdud uşaqların cəmiyyətə və təhsilə inteqrasiyası diqqətdə saxlanılır, məhdud fiziki imkanlı uşaqlar üçün Naxçıvan Regional İnformasiya Mərkəzində Distant Tədris Mərkəzi, görmə və eşitmə qabiliyyəti məhdud uşaqlar üçün isə distant audio və elektron kitabxana yaradılıb.
Müəllim əməyinə yüksək qiymət verilir
Bilikli, yüksək intellektual səviyyəyə malik vətənpərvər gənclər yetişdirən müəllimlərin əməyi dövlətimiz tərəfindən daim qiymətləndirilib. Ümumilikdə, müstəqillik illərində 400-dən çox müəllim Azərbaycan Respublikasının “Əməkdar müəllimi” və Naxçıvan Muxtar Respublikasının “Əməkdar müəllimi” fəxri adlarına layiq görülüb, “Tərəqqi” medalı ilə təltif olunub. Muxtar respublikada müəllim əməyinin qiymətləndirilməsi ilə yanaşı, onların maddi rifah halının yüksəldilməsi də diqqətdə saxlanılır. Belə ki, Naxçıvan Muxtar Respublikası Ali Məclisi Sədrinin müvafiq sərəncamlarına əsasən diaqnostik qiymətləndirmədən keçən müəllimlərin əməkhaqqı artırılıb, cari ilin fevral ayında isə təhsil sahəsi ilə bağlı qanunvericilikdə edilmiş bir neçə dəyişikliklə ucqar kəndlərdə işləyən gənc kadrların əməkhaqlarına olunan əlavələr, xüsusi təhsilə cəlb olunanların valideynlərinə, təhsilini ali və orta ixtisas təhsili müəssisələrində davam etdirən valideynlərini itirmiş və ya valideyn himayəsindən məhrum olanlara ayrılan müavinətlər əhəmiyyətli şəkildə artırılıb.
Bu gün mütərəqqi təhsil metodlarının tətbiqi, müəllim əməyinə verilən yüksək qiymət, təhsil müəssisələrində yaradılan müasir tədris şəraiti müəllim əməyinin bəhrələrini daha da artırır, ali və orta ixtisas təhsili müəssisələrinə tələbə qəbulunda uğurlu nəticələr qazanılır. Bunun nəticəsidir ki, muxtar respublikada 2020-2021-ci tədris ilinin nəticələri də uğurlu olub, qəbul imtahanlarında yüksək nəticələr əldə edilib, tam orta təhsil bazasını bitirən məzunlardan 17-si “Qızıl”, 17-si “Gümüş” nişana, 41-i fərqlənmə attestatına, ümumi orta təhsil bazasını bitirənlərdən isə 121-i fərqlənmə attestatına layiq görülüb, şagirdlərdən 26-sı Respublika fənn olimpiadasının qalibi olub. Qəbul imtahanlarında iştirak edən 2695 məzundan 1932-si və ya 72 faizi ali və orta ixtisas təhsili müəssisələrinə qəbul olub. Məzunlardan 261-i imtahanlarda 500-700 bal arası nəticə göstərib. 2020-2021-ci tədris ilində 500 və daha artıq bal toplayan 261 məzundan 65-i müəllimlik ixtisasını seçib.
Muxtar respublikada üç ildə 726 gənc kadr işlə təmin olunub
Muxtar respublikada təhsil sahəsində keyfiyyət göstəricilərinin son illərdə yüksəlməsinə aparılan sistemli tədbirlər nəticəsində, xüsusilə müəllimlərin işə qəbulu prosesində obyektivliyi təmin etməklə nail olunub. Naxçıvan Muxtar Respublikası Nazirlər Kabinetinin 2018-ci il 14 aprel tarixli Qərarına uyğun olaraq, ümumilikdə, 2018-ci ildən bu günədək işə qəbulla bağlı 10 müsabiqə keçirilib, 726 gənc kadr işlə təmin olunub.
Muxtar respublikada müəllimlərin təkmilləşdirilməsi, eləcə də peşəkarlıq səviyyəsinin yoxlanılması istiqamətində də mühüm tədbirlər həyata keçirilib. Belə ki, Naxçıvan Muxtar Respublikası Nazirlər Kabinetinin 19 iyun 2020-ci il tarixli Qərarı ilə “Naxçıvan Muxtar Respublikasının dövlət ümumi təhsil müəssisələrində işləyən təhsilverənlərin sertifikatlaşdırma Qaydası” təsdiq edilib, qərara uyğun olaraq cari ilin yanvar-may aylarında təhsil müəssisələrində pedaqoji fəaliyyətlə məşğul olan təhsilverənlərin ödənişsiz sertifikasiyası keçirilib. Həmçinin son illərdə təhsil müəssisələrində şahmatın tədrisinin yaxşılaşdırılması məqsədilə Naxçıvan Muxtar Respublikası Təhsil Nazirliyi və Naxçıvan Muxtar Respublikası Şahmat Federasiyasının birgə təşkilatçılığı ilə şahmatı tədris edən 500-dən çox müəllimə də ödənişsiz sertifikasiya imtahanları təşkil olunub. Bunlarla yanaşı, müəllimlərin peşəkarlıq səviyyəsinin artırılması üçün konfranslar, təlim və seminarlar keçirilir. Təkcə ötən tədris ilində 1200-dən çox müəllim müxtəlif istiqamətlərdə təlimlərə cəlb edilib. Həyata keçirilən tədbirlər müəllimlər arasında sağlam rəqabəti və motivasiyanı gücləndirib, cari tədris ilində Azərbaycan Respublikası Təhsil Nazirliyi tərəfindən keçirilən təhsildə inkişaf və innovasiyalar üzrə V qrant müsabiqəsində muxtar respublika müəllimlərindən 4-ü qalib olub.
Naxçıvanda keyfiyyətli tədris mühitində öz sənətini sevən kifayət qədər peşəkar müəllim ordusu yetişib
Bu gün Naxçıvan Muxtar Respublikasında keyfiyyətli tədris mühitində öz sənətini sevən kifayət qədər peşəkar müəllim ordusu yetişib. Muxtar respublikada müəllim olmaq istəyənlərin sayının artması da elə məhz bu peşənin cəmiyyətdə nüfuzunun yüksəldilməsinə verilən dəyərdən qaynaqlanır. Naxçıvan Muxtar Respublikası Ali Məclisinin Sədri Vasif Talıbov deyib: “Müəllimlər gələcəyimiz olan gənclərin təhsil almasında, tərbiyə olunmasında xüsusi rol oynayır. Gələcəyimizin təməli müəllimlər tərəfindən qoyulur. Bu təməl nə qədər möhkəm qoyulsa, gələcəyimiz bir o qədər möhkəm qurulacaq, uğurlu olacaqdır”.
Peşə bayramlarını qeyd edən muxtar respublika müəllimləri bundan sonra da Ali Məclis Sədrinin tövsiyələrini əsas fəaliyyət istiqaməti kimi müəyyənləşdirəcək, təhsilin inkişafında yorulmadan çalışacaq, vətənpərvər və bilikli gənc nəsil yetişdirəcəklər.
AZƏRTAC-ın Naxçıvan bürosu