Bakı, 18 mart, AZƏRTAC

Azərbaycan Respublikasının Prezidenti, Müzəffər Ali Baş Komandan İlham Əliyevin mart ayının 15-də Füzuli və Xocavənd rayonlarına səfəri xalqımızın bayram əhval-ruhiyyəsini daha da yüksəltdi və hər birimizə qürur hissi yaşatdı. Azad edilmiş ərazilərdəki böyük quruculuq işləri və infrastruktur layihələrinin həyata keçirilməsi artıq Böyük Qayıdışın günbəgün yaxınlaşdığının bariz göstəricisidir. Səfər zamanı Prezident Füzuli-Hadrut avtomobil yolunun təməlini qoydu. Biz artıq Qarabağda belə təməlqoyma mərasimlərinin sayının artdığını müşahidə edirik. Vətən müharibəsindən 4 ay keçməsinə baxmayaraq, böyük quruculuq işləri aparılır. Təbii ki, yol infrastrukturunun qurulması azad edilmiş ərazilərin bərpası üçün çox önəmlidir. Artıq bir neçə yol layihəsi icra edilməkdədir. Füzulidən Şuşaya yol çəkilir, necə deyərlər, “Zəfər yolu” çəkilir. Eyni zamanda, Bərdə-Ağdam avtomobil, Horadiz-Zəngilan dəmir yolları çəkiləcək.

AZƏRTAC xəbər verir ki, bunu Milli Məclisin deputatı Tamam Cəfərova bildirib.

“Vətən müharibəsi XXI əsrin müharibəsidir”, - deyən T.Cəfərova qeyd edib ki, Azərbaycan Ordusu müharibədə Zəfər çaldı, düşməni əzəli torpaqlarımızdan qovdu, tarixi ədaləti bərpa etdi. Azərbaycan Ordusu yeddi rayonu, Şuşa şəhərini, Suqovuşan qəsəbəsini, Talış qəsəbəsini, keçmiş Hadrut rayonunu, keçmiş Martuni rayonunun böyük hissəsini azad edib. Beləliklə, Azərbaycan öz ərazi bütövlüyünü bərpa edərək tarixi nailiyyətlərə imza atdı.

Deputat deyib: “Hadrut qəsəbənin işğaldan azad olunması Vətən müharibəsində əldə olunan qələbədə böyük rol oynayıb. Belə ki, Hadrutun azad edilməsi böyük əhəmiyyət daşıyırdı. Çünki Cəbrayıl rayonundan sonra Hadrutun azad edilməsi hərbi əməliyyatlarımızın davam etdirilməsi üçün xüsusi əhəmiyyətə malik olan hadisə idi. Hadrut qəsəbəsinin azad edilməsi çox uğurlu hərbi əməliyyat nəticəsində mümkün olub. İlk növbədə, ətraf dağlar nəzarətə götürüldü. Hadrutun ətrafında yerləşən yüksəkliklər Azərbaycan Ordusu tərəfindən götürüləndən sonra faktiki olaraq nəzarət ordumuzun əlinə keçdi və qəsəbənin işğaldan azad edilməsi artıq qaçılmaz idi. Beləliklə, Azərbaycan Ordusu yüksək peşəkarlıqla, müharibə qaydalarına əməl edərək, strateji planlaşdırmanı düzgün icra edərək Cəbrayıldan sonra Hadrutu, ondan sonra Füzulini işğaldan azad etdi. Beləliklə də, Azərbaycan Ordusu əzəli, əbədi Azərbaycan torpağı olan Şuşa şəhərinə düşmənin gözləmədiyi istiqamətdən yaxınlaşmış oldu”.

T.Cəfərova vurğulayıb ki, Şuşa əməliyyatının uğurlu keçirilməsi üçün məhz Hadrutu azad etmək önəmli idi. Müzəffər Azərbaycan Ordusu dağlardan, dərələrdən, sıldırım qayalardan keçərək, o qayaları dırmaşaraq Şuşanı işğalçılardan azad etdi. Ona görə bütövlükdə 44 günlük şanlı müharibəmiz, bizim Zəfərimiz bu gün dünyanın aparıcı ali məktəblərində öyrənilir və artıq hərbi ekspertlər, mütəxəssislər, hətta bir çox ölkələrin siyasətçiləri bizim müharibədən bəhs edərək bildirirlər ki, bu, XXI əsrin müharibəsidir.

Azərbaycanın dünya hərb elminə öz strategiyası ilə yeniliklər gətirməklə yanaşı, XXI əsrdə dünyada və regionda siyasi münasibətlərin inkişaf etdirilməsi baxımından da yeni reallıqlar gətirdiyini deyən deputat qeyd edib: “30 ilə yaxın davam edən işğal dövründən sonra Azərbaycan öz tarixi torpaqlarında həyata keçirdiyi infrastruktur layihələri ilə regiona yeni bir nəfəs və eyni zamanda, yeni bir inkişaf dinamikası gətirir. İşğalçı Ermənistanın həyata keçirdiyi vandalizm siyasətindən sonra Azərbaycanın başlatdığı quruculuq siyasəti qonşu və dost dövlətlər üçün əməkdaşlıq baxımından yeni istiqamətlər və imkanlar yaradır.

Bu gün Azərbaycanın qarşısında duran ən vacib məsələ işğaldan azad olunan torpaqlarımızda quruculuq işlərinin həyata keçirilməsi, həmin ərazilərin də digər regionlarımız kimi çiçəklənməsidir. Əminik ki, Prezident İlham Əliyevin həyata keçirdiyi qətiyyətli siyasət və Azərbaycan xalqının birliyi, həmrəyliyi nəticəsində tezliklə qarşıya qoyulan hədəflər qət ediləcək. Azərbaycan Prezidentinin Azıx mağarasının qarşısında olarkən dediyi kimi, biz bütün zirvələri qət edəcəyik. Elə zirvə yoxdur ki, onu biz qət edə bilməyək. “Qarabağ Azərbaycandır!”.