Bakı, 24 iyun, Ceyhun Rüstəmov, AZƏRTAC

Məlum olduğu kimi, “Azərbaycan Dəmir Yolları” QSC bir müddət öncə Bakı-Xırdalan-Sumqayıt dəmir yolunun əsaslı surətdə yenidən qurulmasına başlayıb. Artıq işlərin bir hissəsi görülüb. Sumqayıt ilə Bakı arasında sərnişin sıxlığını əhəmiyyətli dərəcədə azaldacaq bu layihə və digər işlərlə bağlı AZƏRTAC-ın suallarını QSC-nin mətbuat katibliyinin rəisi Nadir Əzməmmədov cavablandırıb.

- Bakı-Xırdalan-Sumqayıt dəmir yolunun əsaslı təmirində işlər necə gedir?

- Bakı-Xırdalan-Sumqayıt sərnişin sahəsində 63 kilometr uzunluğunda dəmir yolunun əsaslı təmirinə bu il martın 3-dən start verilib və bu günədək 52 kilometr yol əsaslı təmir olunub. Hazırda təmir işləri davam etdirilir. Əsaslı təmir işlərini İnfrastruktur Departamentinin iştirakı ilə “Dəmiryolservis” MMC-nin müəssisələri həyata keçirir.

Layihə çərçivəsində Sumqayıt baş stansiyasına daxil olmadan Sumqayıt stansiyasına hərəkət etmək üçün 1,65 kilometr uzunluğunda yeni birləşdirici yolun tikintisi də nəzərdə tutulur. Əsaslı təmir işləri başa çatdıqdan sonra elektrik qatarlarının Bakı sərnişin stansiyasından Sumqayıt sərnişin stansiyasına qədər getməsinə 40 dəqiqə vaxt sərf olunacaq. Bu da sərnişinlərin avtomobil yollarında üzləşdiyi əlavə vaxt itkisinin qarşısını alacaq.

- Əsaslı təmir çərçivəsində Sumqayıt sərnişin stansiyası da yenilənməlidir?

- Bəli, Sumqayıt sərnişin stansiyasında da yenidənqurma işləri aparılacaq. Artıq sərnişinlərin təhlükəsizliyini təmin etmək üçün iki platforma və yeraltı keçid qurulub. Burada məskunlaşan məcburi köçkünlərin köçürülməsi bu yaxınlarda həyata keçiriləcək. Ondan sonra stansiyada rekonstruksiya və abadlıq işləri aparılacaq.

- Yeni qatarlar nə zaman bu xətdə fəaliyyətə başlayacaq və onların üstünlükləri nədədir?

- Konkret olaraq vaxt müəyyənləşməyib. İşlər yüksək sürətlə davam etdirilir. Yeni qatarların üstünlüklərinə gəlincə, KİSS markalı elektrik qatarları “Stadler Rail Group” şirkətinin “Stadler Minsk” zavodunda istehsal olunub və qatarların biri mayın 30-da, digəri isə mayın 31-də ölkəmizə gətirilib. Hər biri 4 vaqondan ibarət olan elektrik qatarlarında sərnişinlərin yüksək keyfiyyətli ictimai nəqliyyata artan tələbatını ödəmək üçün hər cür şərait var. Qatarın ümumi sərnişin tutumu 919 nəfər, oturacaqların sayı 396 ədəddir ki, bunun da 84-ü biznes-sinfinə aiddir. Sərnişinlər bu qatarlarda WiFi-dən də istifadə edə biləcəklər.

- Bu xətlə Bakıdan Sumqayıta gedib-gəlmək neçəyə başa gələcək?

- Bununla bağlı Tarif (qiymət) Şurasına müraciət olunması üçün hazırlıq işləri görülür. Tarif Şurasının qərarından sonra gediş haqqı müəyyən olunacaq.

- “Stadler” Gəncə vaqon istehsalı zavodunun yaradılması hansı mərhələdədir, orada hansı tipli vaqonlar istehsal olunacaq?

- Xatırladım ki, İsveçrənin “Stadler Rail Group” şirkəti ilə Azərbaycanın “Railway İnternational Distribution” Məhdud Məsuliyyətli Cəmiyyəti arasında Gəncədə vaqon istehsalı üzrə birgə müəssisənin yaradılması haqqında müqavilə imzalanıb. Müqavilənin şərtlərinə əsasən, Azərbaycanın Gəncə şəhərində ilkin olaraq ildə 60 vaqon istehsal gücünə malik zavod inşa ediləcək. Bu zavod İsveçrə istehsalı olan ən son texnoloji avadanlıqla təchiz olunacaq. Beləliklə, 2014-cü il oktyabrın 18-də “Stadler” Gəncə vaqon istehsalı zavodunun təməli qoyulub və bu mərasimdə Azərbaycan Prezidenti İlham Əliyev də iştirak edib.

Zavodun tikintisində və fəaliyyətində ekoloji standartlara cavab verən ən müasir texnologiya tətbiq ediləcək. Zavodun 2016-cı ildə fəaliyyətə başlaması nəzərdə tutulur. Bu zavodun fəaliyyətə başlaması ilə Azərbaycan Dəmir Yolunun sərnişin vaqonu parkında yeni bir mərhələ başlayacaq.

Bu baxımdan Gəncədə vaqon istehsalı zavodunun fəaliyyətə başlaması sərnişin vaqonu parkını tam yeniləməyə imkan yaradacaq. Bu zavodda oturacaq və yataq tipli vaqonların istehsalı nəzərdə tutulur.

- Bakı sərnişin stansiyasında da əsaslı yenidənqurma işləri aparılır. Yenidənqurmadan sonra burada sərnişinlərə hansı şərait yaradılacaq?

- Son illər aparılan uğurlu siyasət nəticəsində Azərbaycan Respublikasında yüksək inkişafa nail olunub, həyata keçirilən islahatlar və genişmiqyaslı infrastruktur layihələri sosial-iqtisadi həyatın davamlı inkişafı üçün şərait yaradıb. Bu da, paytaxtımıza xarici ölkələrdən gələn vətəndaşların günbəgün artmasına səbəb olub.

Paytaxtımızın giriş qapısı sayılan Bakı sərnişin dəmir yolu vağzalının yüksək səviyyədə, müasir dövrün tələblərinə cavab verməsi üçün burada yenidənqurma işlərinin görülməsinə ehtiyac yaranmışdı. Bu məqsədlə 2015-ci ilin mart ayında Bakı sərnişin vağzalında yenidənqurma işlərinə start verilib. Vağzalın əsas binasının fasadı memarlıq üslubunun saxlanması şərtilə yenidən qurulur, vağzal binasının daxilində tam yenidənqurma işləri aparılır. Bilet kassaları, saxlama kameraları, sərnişin platformaları müasir üslubda əsaslı təmir olunacaq, eskalatorlar yenilənəcək.

- Bakı-Tbilisi-Qars dəmir yolununun inşasında işlər necə gedir?

- “Azərbaycan Dəmir Yolları” QSC müxtəlif beynəlxalq layihələrin fəal iştirakçısı olmaqla, onların həyata keçirilməsinə ciddi yanaşır. Bu yöndə, XXI əsrin əsas tikintilərindən olan və təkcə üç xalqı və üç ölkəni deyil, həmçinin onlarla xalq və ölkə arasında körpü rolunu oynayacaq Bakı-Tbilisi-Qars yeni dəmir yolu xətti bağlantısının reallaşması istiqamətində işlər sürətlə davam edir. Layihəni iqtisadi və siyasi cəhətdən əhəmiyyətli edən Azərbaycan, Gürcüstan və Türkiyə arasında dəmir yolu nəqliyyatı ilə yük və sərnişin daşımalarının asanlaşdırılması, Mərkəzi və Şərqi Asiyadan Avropaya və əks istiqamətdə nəqliyyat dəhlizi rolunu oynamasıdır. İlkin mərhələdə Bakı-Tbilisi-Qars yeni dəmir yolu xətti ilə yük dövriyyəsinin 5 milyon ton, sonradan isə 15 milyon tona çatdırılması planlaşdırılır.

Hazırda Bakı-Tbilisi-Qars yeni dəmir yolu xəttinin nəzərdə tutulan vaxtda istismara verilməsi üçün işlər davam etdirilir. Bakı-Tbilisi-Qars dəmir yolu xətti bağlantısının 2015-ci ildə istismara verilməsi planlaşdırılır. Bu yol tam istifadəyə veriləndən sonra yük və sərnişin daşınması həyata keçiriləcək. Bunun üçün yeni vaqonların alınması da gündəmdədir. “Azərbaycan Dəmir Yolları” QSC ilə İsveçrənin “Stadler Rail Group” şirkəti arasında gələcəkdə Bakı-Tbilisi-Qars marşrutu üzrə sərnişin daşınmasını həyata keçirmək üçün 30 yeni sərnişin vaqonunun alınması haqqında müqavilə imzalanıb.