İQTİSADİYYAT
Naxçıvan MR “Taxıl Məmulatları Sənaye Kompleksi” Məhdud Məsuliyyətli Cəmiyyətində yeni un dəyirmanı istifadəyə verilmişdir
Naxçıvan, 16 aprel (AZƏRTAC). Naxçıvan şəhərində “Taxıl Məmulatları Sənaye Kompleksi” Məhdud Məsuliyyətli Cəmiyyətinin yeni un dəyirmanının açılışı olmuşdur.
Açılış mərasimində çıxış edən müəssisənin direktoru Elşən Mirzəyev demişdir ki, regionların sosial-iqtisadi inkişafı dövlət proqramına uyğun olaraq muxtar respublikada irimiqyaslı layihələr reallaşdırılmış, geniş quruculuq tədbirləri həyata keçirilmiş, yeni infrastruktur sahələri yaradılmışdır.
Naxçıvan Muxtar Respublikası Ali Məclisinin sədri Vasif Talıbov demişdir: Bu gün ölkələr qarşısında duran mühüm məsələlərdən biri ərzaq təhlükəsizliyinin təmin olunmasıdır. Azərbaycanda ərzaq təhlükəsizliyinin təmin olunması üçün tədbirlər görülür, dövlət başçısı bu sahə üzrə müvafiq fərman və sərəncamlar imzalayır, qərarlar qəbul edir. Bunun nəticəsidir ki, ölkəmizdə əsas ərzaq məhsullarına olan tələbat yerli istehsal hesabına ödənilir. Əsas ərzaq məhsulları içərisində buğdanın xüsusi yeri vardır. Azərbaycan Respublikası Prezidentinin müvafiq sərəncamı ilə buğda əkini ilə məşğul olanlara subsidiyalar verilir, onlara dövlət qayğısı göstərilir, yeni buğda sortlarının alınıb ölkəmizə gətirilməsi təmin edilir. Muxtar Respublikada taxıla olan illik tələbat təqribən 150 min tona yaxındır. Onun 100 min tonu özümüzdə istehsal edilir, qalan hissəsi isə başqa ölkələrdən idxal olunur. Növbəti illərdə qarşıda duran mühüm vəzifələrdən biri ondan ibarətdir ki, muxtar respublikada taxıla olan tələbat tamamilə yerli istehsal hesabına ödənilsin. Ona görə də taxıl əkini sahələri artırılır. Əgər 2009-2010-cu illərdə 29069 hektar sahədə taxıl əkilmişdirsə, 2010-2011-ci əkin ilində taxıl əkini 30 min hektara çatdırılmışdır. Taxıl istehsalçılarına 2 milyon 840 min manata yaxın kredit verilmiş, muxtar respublikamızda 100 min tondan çox məhsul istehsal olunmuşdur.
Natiq qeyd etmişdir ki, taxıl əkib-becərmək işin bir tərəfidirsə, ondan un istehsal etmək isə digər tərəfidir. Ona görə də müasir un dəyirmanları olmalıdır ki, keyfiyyətli məhsul istehsal edilsin. Sovetlər birliyi dövründə muxtar respublikada bir neçə dəyirman fəaliyyət göstərsə də, ötən əsrin 90-cı illərinin əvvəlindəki dağıdıcılıq prosesi nəticəsində onlar da sıradan çıxmışdır. Ancaq qısa müddət ərzində muxtar respublikanın bütün rayonlarında dəyirmanlar qurulub əhalinin istifadəsinə verilmişdir. Hazırda bölgədə 13 elektrik, 1 su dəyirmanı fəaliyyət göstərir. Bu gün isə illik istehsal gücü 73 min ton olan yeni dəyirman istifadəyə verilir. Keyfiyyətli un istehsal etmək üçün dəyirmanlarda texnoloji proseslərə ciddi diqqət yetirilməlidir. Muxtar respublikada fəaliyyət göstərən bütün dəyirmanlarda laboratoriyalar qurulmuşdur. Əlaqədar nazirliklər, təşkilatlar keyfiyyətli un istehsal olunması üçün dəyirmanların iş prinsipinə düzgün əməl etmələrinə diqqəti artırmalıdırlar.
Ali Məclisin sədri müəssisənin keyfiyyətli un istehsal edəcəyinə əminliyini bildirmiş, kollektivə uğurlar arzulamışdır.
Vasif Talıbov idarəetmə düyməsini basaraq dəyirmanı işə salmış, istehsal prosesini izləmişdir.
Məlumat verilmişdir ki, 505 kvadratmetr ərazini əhatə edən dəyirmanın gündəlik istehsal gücü 200 tondur. Müəssisədə Türkiyə Respublikasının “Uğur” firmasının istehsalı olan müasir texnoloji avadanlıq quraşdırılmışdır. Dəyirmanda üyüdülən buğdadan 78 faiz un, 22 faiz kəpək alınır. Yeni dəyirman muxtar respublikada maldarlığın və quşçuluğun kəpəklə təmin olunmasına imkan verəcəkdir.
######