REGİONLAR
Naxçıvan şəhərində payız-qış mövsümünə mütəşəkkil hazırlıq görülür
Naxçıvan, 2 sentyabr, AZƏRTAC
Naxçıvan Şəhər İcra Hakimiyyətində 2015-2016-cı ilin payız-qış mövsümünə hazırlıqla əlaqədar keçirilən yığıncaqda bu istiqamətdə görüləcək işlər barədə danışılıb.
AZƏRTAC xəbər verir ki, yığıncaqda Naxçıvan Şəhər İcra Hakimiyyətinin başçısı Vüqar Səfərov çıxış edib. Bildirilib ki, ənənəvi olaraq hər il Naxçıvan Muxtar Respublikası Ali Məclisində payız-qış mövsümünə hazırlıqla əlaqədar keçirilən müşavirədə qarşıya qoyulan tapşırıqların icrası istiqamətində vəzifələr müəyyənləşdirilir, aidiyyəti orqanların qış mövsümünə hazırlıqla bağlı gördüyü işlər haqqında məlumatları dinlənilir. Ötən ayın 28-də Naxçıvan Muxtar Respublikası Ali Məclisində 2015-2016-cı ilin payız-qış mövsümünə hazırlıq və qarşıda duran vəzifələrlə əlaqədar keçirilmiş müşavirədə Ali Məclisin Sədri aidiyyəti təşkilatlar qarşısında müxtəlif vəzifələr qoyub.
Yığıncaqda Naxçıvan Şəhər Elektrik Şəbəkəsinin direktoru İqrar Əliyevin, Qaz İstismarı İdarəsinin rəis əvəzi Orxan Rüstəmovun, İstilik Təsərrüfatı İdarəsinin rəisi Vəli Həsənovun, “Naxçıvan Su-Kanalizasiya” Açıq Səhmdar Cəmiyyətinin sədri Elxan Abdullayevin 2015-2016-cı ilin payız-qış mövsümünə hazırlıqla bağlı məlumatları dinlənilib.
Naxçıvan Şəhər İcra Hakimiyyətinin başçısı Vüqar Səfərov yığıncaqda məruzə ilə çıxış edərək bildirib ki, muxtar respublika sakinləri dayanıqlı elektrik enerjisi və təbii qazla təmin ediliblər. Buna görə də aidiyyəti orqanlar əhalinin və təsərrüfat subyektlərinin elektrik enerjisinə, təbii qaza və istiliyə olan tələbatının ödənilməsi, eləcə də digər infrastruktur sahələrinin qış mövsümündə normal fəaliyyət göstərməsi üçün hazırlıq işlərinə indidən xüsusi diqqət yetirir, lazımi mal-material ehtiyatı yaradılması diqqət mərkəzində saxlanılır.
Naxçıvan şəhərində fəaliyyət göstərən bir sıra idarə, müəssisə və təşkilatların qarşısında mühüm vəzifələr durduğunu yığıncaq iştirakçılarının diqqətinə çatdıran Vüqar Səfərov qeyd edib ki, Naxçıvan Şəhər Elektrik Şəbəkəsi qış mövsümünə hazırlıqla əlaqədar mövcud transformatorların və yarımstansiyaların texniki baxışdan keçirilməsini sentyabr ayı ərzində təmin etməli, istismara yararsız, standartlara uyğun gəlməyən, bir çox hallarda qəzalara səbəb olan elektrik avadanlıq və xətlərinin yenilənməsini diqqət mərkəzində saxlamalı, Naxçıvan şəhərində yerüstü elektrik xətlərinin yeraltı kabellərlə əvəz olunması və smartkart tipli sayğacların quraşdırılması davam etdirilməli, enerji israfçılığına yol verilməməlidir.
Naxçıvan Şəhər Qaz İstismarı İdarəsinin qarşısında duran vəzifələrdən də danışan icra hakimiyyətinin başçısı vurğulayıb ki, qaz təchizatı sistemində texniki baxış tədbirləri qısa müddətdə həyata keçirilməli, nöqsanlar vaxtında aşkar edilərək aradan qaldırılmalı, istismara yararsız vəziyyətə düşmüş qaz xətlərinin və avadanlıqlarının yenilənməsinə nəzarət artırılmalı, sayğacdankənar istifadə hallarının qarşısının alınması üçün tədbirlər görülməlidir.
Yığıncaqda 2015-2016-cı ilin payız-qış mövsümünü mütəşəkkil başa vurmaq üçün ətraflı fikir mübadiləsi aparılıb, qarşıya qoyulan vəzifələrin yerinə yetirilməsinin zəruriliyi vurğulanıb.