Mayın 19-da Azərbaycan iqtisadi inkişaf naziri Fərhad Əliyev Səudiyyə Ərəbistanı xarici işlər nazirinin birinci müavini Nizar Mədəni ilə görüşmüşdür.

Nazir qonağa Azərbaycanın iqtisadi vəziyyəti haqqında məlumat verərək demişdir ki, xüsusilə son 7 ildə iqtisadiyyatın inkişafı, ümumi daxili məhsulun artımı təmin edilmiş, inflyasiyanın artmasına yol verilməmişdir.

Natiq Səudiyyə Ərəbistanı ilə əməkdaşlıq istiqamətlərindən danışarkən demişdir ki, siyasi əlaqələrimiz çox yüksək səviyyədədir, ölkələrimizi təmsil edən səfirlər bu sahədə fəal iş aparırlar. Təəssüf ki, iqtisadi əlaqələr barədə bunu demək olmaz. İqtisadi əlaqələrin inkişafı üçün yaradılmış müştərək komissiya çox iş görməlidir. Səudiyyə Ərəbistanı ilə mənəvi bağlılığımız da əlaqələrin canlandırılmasını tələb edir. Azərbaycan xarici sərmayədarlara münasibətdə “açıq qapı” siyasəti yeridir, Səudiyyə Ərəbistanı kimi dost ölkələrin iş adamları üçün isə qapımız taybatay açıqdır. Onlara hər cür şərait yaratmağa hazırıq. Xarici sərmayədarların fəaliyyəti üçün ölkəmizdə möhkəm hüquqi baza vardır və sərmayələr dövlət təminatı ilə qorunur. Bundan əlavə, ölkənizlə sərmayələrin qarşılıqlı qorunması barədə saziş imzalanmağa hazırlanır. Əminik ki, yaxin vaxtlarda bu saziş və ikiqat vergi, qarşılıqlı aviareyslərin açılması haqqında layihələr paraflanacaqdır. Biz Səudiyyə Ərəbistanından olan dostlarımızla həm neft, həm də qeyri-neft sahəsində qarşılıqlı faydalı əməkdaşlığa hazırıq. Əməkdaşlıq üçün sahələr çoxdur. Məsələn, neft, neft kimyası, neft maşınqayırması, turizm, yeyinti sənayesi və sair. Lakin hələlik onların içərisindən ən üstün olanını seçib, “bismillah” deyərək işə başlamalıyıq. Bu əməkdaşlığın inkişafına kömək edə biləcək qurumun yaranmasına xeyir-dua verərik. Elə bir saziş imzalaya bilərik ki, o həm iqtisadi, həm də sosial sahəni əhatə etsin.

Nazir məlumat vermişdir ki, müştərək komissiyanın ikinci iclası bu ilin oktyabrında olacaqdır.

Nizar Mədəni səmimi qəbul və ətraflı məlumat üçün təşəkkür edərək bildirmişdir ki, ilk dəfə Bakida 12 il əvvəl olub. Ötən müddət ərzində burada dostları sevindirən çox dəyişiklik baş verib. Sizin məlumatınız da məni sevindirdi. Qardaş Azərbaycan xalqina rifah dolu həyat arzulayıram. Məni inandırdınız ki, ölkənizdə əməkdaşlıq üçün heç bir maneə yoxdur. Biz Azərbaycana açıq ürəklə, əlaqələrimizi genişləndirmək niyyəti İlə gəlmişik. Sizdən əvvəl xarici işlər naziri ilə görüşmüş, fikir mübadiləsi aparmışıq. Mən ona dedim ki, Səudiyyə Ərəbistanı Azərbaycanla əlaqələrin inkişaf etdirilməsinə xüsusi fikir verir. Biz çalışmalıyıq ki, sizin adını çəkdiyiniz sazişlərin həyata keçirilməsi mexanizmini işləyək. Sazişlər işləməli, qarşılıqlı fayda gətirməlidir. Müştərək komissiyanın iki il əvvəl keçirilmiş birinci iclasında söylənən təklifləri reallaşdırmalıyıq.

Qonaq öz ölkəsinin neft strategiyası, son iki ildə aparılan özəlləşdirmə, xüsusi bölmənin gücləndirilməsi, struktur dəyişiklikləri, ayrı-ayrı sahələrin inkişafı üçün müxtəlif şuralar yaradılması haqqında məlumat vermiş, siyasi-iqtisadi sahədə zamanı qabaqlamaq əzmində olduqlarını vurğulamışdır.