ELM VƏ TƏHSİL
ÖLKƏMİZİN ALİ MƏKTƏBLƏRİNİN MAGİSTRATURASINA MBA VƏ TEMPUS-TACİS BEYNƏLXALQ PROQRAMLARI ÜZRƏ QƏBUL ELAN EDİLİR
Tələbə Qəbulu üzrə Dövlət Komissiyası (TQDK) yanvarın 11-dən 17-dək respublikamızın ali məktəblərinin magistraturasına MBA və TEMPUS-TACİS beynəlxalq proqramları üzrə qəbul elan edir.
TQDK-dan AZƏRTAC-a bildirmişlər ki, MBA proqramı üzrə 208 yer, TEMPUS-TACİS proqramı üzrə isə 4 yer ayrılmışdır. Magistraturaya qəbul olunmaq hüququna ali təhsil haqqında diplomu olan şəxslər malikdirlər.
Azərbaycan Texniki Universiteti, Dövlət İqtisad Universiteti, “Odlar Yurdu” Universiteti və Qafqaz Universitetində fəaliyyət göstərən MBA proqramı üzrə magistraturaya ixtisasından asılı olmayaraq bütün bakalavrlar sənəd verə bilərlər.
TEMPUS-TACİS proqramı üzrə Azərbaycan Texniki Universitetinin TM 120017 avtomobil və traktorların elektrik avadanlığı ixtisasına T 120000 şifrli ixtisas istiqamətini bitirən bakalavrlar, Azərbaycan Texniki Universitetinin İİM 020024 enerji menecmenti (elektroenergetikada) ixtisasına T 030000, T 120000 şifrli ixtisas istiqamətlərini bitirən bakalavrlar sənəd verə bilərlər.
Hər bir bakalavr müxtəlif ali məktəblərin 5-dək ixtisas kodunu seçə bilər. Seçilmiş ixtisaslar imtahanın məzmununu təyin edən eyni qəbul proqramına aid olmalıdır. İxtisasların ardıcıllığı bakalavrın özü tərəfindən müəyyənləşdirilir. Seçilmiş ixtisasların ərizə formasında göstərilən ardıcıllığı müsabiqə zamanı hüquqi əsas kimi nəzərə alınır və bakalavr topladığı ballara əsasən müsabiqədən keçdiyi ixtisasların birincisinə yerləşdirilir.
Sənədlərin qəbulu internet vasitəsilə iki mərhələdə aparılır:
Birinci mərhələdə bakalavr yanvarın 11-dən 17-dək “TQDK-nın ödəmə kartı”nı əldə edir (qiyməti 2 manat), kartın seriya nömrəsi (bakalavrın iş nömrəsi) və PİN kodundan istifadə etməklə TQDK-nın müvafiq internet səhifəsinə (tqdk.gov.az/erize-MBA/parol.aspx) daxil olur və oradakı “Bakalavrın elektron ərizəsi” formasını doldurur (“TQDK-nın ödəmə kartı”nı bu qurumun binasından əldə etmək olar).
İkinci mərhələdə Tələbə Qəbulu üzrə Dövlət Komissiyasında yaradılmış sənəd qəbulu komissiyasında (SQK) bakalavrın “elektron ərizə”si forması rəsmiləşdirilir.
Bakalavrlar “elektron ərizə”lərini rəsmiləşdirmək üçün yanvarın 11-dən 17-dək (şənbə və bazar günləri də daxil olmaqla) saat 9-dan 18-dək SQK-ya “TQDK-nın ödəmə kartı”nı və aşağıdakı sənədləri təqdim etməlidirlər: bakalavr təhsilini bitirmək haqqında diplomun əslini; məzunu olduqları təhsil müəssisəsindən bitirdikləri ixtisasın şifrini və onun aid olduğu istiqamətin şifrini, həmçinin, orta qiymət balını göstərən arayışı (5 və ya 100 ballıq şkalada); şəxsiyyət vəsiqəsini.
(Xarici ölkələrdə ali təhsil almış şəxslər Təhsil Nazirliyindən diplomlarının tanınmasını təsdiq edən, aldıqları ixtisasın və onun aid olduğu istiqamətin şifrini və orta qiymət balını göstərən arayış təqdim etməlidirlər).
SQK-da bakalavrın “elektron ərizə”sindəki məlumatların onun sənədlərinə uyğunluğu yoxlanıldıqdan sonra bakalavrın şəkli çəkilir və ərizənin son variantı iki nüsxədə çap olunur, hər iki tərəfin imzası və SQK-nın möhürü ilə təsdiq edilir. Təsdiq edilmiş ərizənin bir nüsxəsi bakalavra verilir. “Elektron ərizə” formasına daxil edilmiş məlumatlara ərizə təsdiqlənən anadək düzəlişlər edilə bilər. Ərizə təsdiqləndikdən sonra düzəlişlərin aparılmasına imkan verilmir.
Qəbul imtahanlarında bakalavrın məntiqi təfəkkürü, qəbul olunmaq istədiyi ixtisas və xarici dil üzrə bilik səviyyəsi test üsulu ilə yoxlanılır. Bakalavrlara məntiqi təfəkkürün yoxlanılması üzrə 50, xarici dil fənni üzrə 20 və ixtisas üzrə 30 test tapşırığı təqdim olunur.
İmtahan suallarının cavablandırılmasına 2 saat 30 dəqiqə vaxt ayrılır.
Ətraflı məlumatı “Magistr” jurnalının 6-cı nömrəsindən almaq olar.