Bakı, 25 iyun, AZƏRTAC

Azərbaycan Ordusu 103 il bundan əvvəl iyunun 26-da Azərbaycan Xalq Cümhuriyyətinin qurucuları tərəfindən yaradılıb. O dövrdə Azərbaycan ordusu çətin sınaq qarşısında idi. Onun qarşısında Qarabağda və Zəngəzurda döyüşlərin getməsi, bundan əvvəl isə Bakının işğaldan azad olunması istiqamətində tədbirlərin həyata keçirilməsi kimi vacib vəzifələr dayanırdı. Lakin təəssüf ki, 1920-ci ildə Azərbaycan Xalq Cümhuriyyəti süquta uğradı. Bundan sonra uzun müddət ölkəmizin müstəqil ordusu olmadı. Bu da 1990-cı illərin əvvəllərində bəzi geosiyasi güclərin dəstəklədiyi Ermənistanın və dünya erməni diasporunun ölkəmizə qarşı ərazi iddiaları sürməsi və torpaqlarımızın işğalı ilə nəticələndi.

Bu fikirləri AZƏRTAC-a açıqlamasında Politoloq Zaur Məmmədov söyləyib.

Ordumuzun təşəkkülü prosesində ümummilli lider Heydər Əliyevin rolundan danışan Zaur Məmmədov diqqətə çatdırıb ki, Ulu Öndərin hakimiyyətə gəlməsindən sonra ölkədə ordu quruculuğu istiqamətində ciddi islahatlar aparıldı. Ordu sıfırdan qurulmağa başladı. Məqsəd isə torpaqlarımızı işğaldan azad etmək idi.

Ordumuzun müasir standartlara uyğun olaraq qurulması istiqamətində Prezident İlham Əliyevin apardığı islahatlardan danışan politoloq vurğulayıb ki, dövlətimizin başçısının ölkəyə rəhbərliyi dövründə Silahlı Qüvvələrimiz inkişafının ən yüksək zirvəsinə çatdı. Ordumuzun istər texniki təchizat, istərsə də fiziki güc baxımından inkişafı göz qabağındadır: “Prezident İlham Əliyev hakimiyyətə gələndən sonra Azərbaycan Ordusunun güclənməsi prosesi daha da sürətləndi. Dövlətimizin başçısı bu istiqamətdə çox ciddi nailiyyətlər əldə etdi. Biz İsrail, Türkiyə, Pakistan kimi ölkələrlə hərbi-texniki əməkdaşlığı gücləndirdik. Eyni zamanda, Rusiya və Belarusdan çox vacib, eləcə də modern silahları ordumuzun arsenalına daxil etməyi bacardıq. İnkişaf orduda bütün istiqamətlərdə davam etdirildi. Məqsəd təbii ki, zaman gəldikdə Azərbaycan torpaqlarını işğaldan azad etmək idi. Prezident İlham Əliyevin ölkədə müdafiə sənayesini yaratması da Ordumuzun potensialının artmasına böyük təkan verdi. Coğrafi cəhətdən kiçik ərazisi olan Azərbaycanın qarşısındakı hədəflər arasında gələcəkdə yeni, müasir silahları tərəf müqabillərimizlə müştərək şəkildə istehsal etmək idi. Nəticə etibarilə MDB məkanında azsaylı ölkələrdən olduq ki, özümüz müdafiə sənayesinə malik olduq. Azərbaycanda müasir texnika və silah istehsalına başlanıldı. Bu addımlar sayəsində Azərbaycan Ordusu dünyanın ən güclü 50 ordusu sırasına daxil oldu. Bu, əhalisi 10 milyon nəfər olan Azərbaycan üçün çox böyük nailiyyətdir. Bu nəticəni də əyani olaraq 44 günlük Vətən müharibəsində Prezident, Müzəffər Ali Baş Komandan İlham Əliyevin rəhbərliyi ilə bütün dünyaya göstərdik. Ordumuzun tətbiq etdiyi döyüş əməliyyatları ilə nəinki regional, eləcə də bütün dünyanın hərbi dərsliklərə, kitablara adını yazdıra bildi. Buna görə də müharibənin bitməsindən 7 ay ötsə də, bizim şanlı Qələbəmiz hələ də dillər əzbəridir”.

Politoloq vurğulayıb ki, 2020-ci ilin payızında baş verən 44 günlük əks-hücum əməliyyatları ilə Azərbaycan Ordusu dünyada yeni növ müharibənin əsasını qoydu. Bildiyiniz kimi, müharibə tarixlərində bir neçə dəfə çox böyük inqilablar baş verib. Məsələn, döyüşlərin taktikası, döyüş strategiyası, silahlardan istifadə edilməsi ilə bağlı inqilablar. Azərbaycanın yeni standartlara uyğun müharibə aparması BMT Təhlükəsizlik Şurasının əksər ölkələrinin milli təhlükəsizlik və hərbi sistemində dəyişiklik etməsinə gətirib çıxardı. Onlar gələcək strategiyalarında 44 günlük müharibəni daim nəzərə alacaqlar. Həmçinin Azərbaycan Ordusunun döyüş taktikası, istifadə etdiyi silahlar əksər ölkələr tərəfindən araşdırılır.

“Vətən müharibəsində Qələbəni şərtləndirən əsas amillərdən biri Prezident İlham Əliyevin ölkənin iqtisadi cəhətdən inkişafı idi ki, buna da nail olunmuşdu. Azərbaycan regional güc kimi artıq dünyada tanınır, ölkə daxilində həmrəylik, birlik və ruh yüksəkliyi, xalqda Qələbə əhval-ruhiyyəsi hökm sürürdü. Bu ruh yüksəkliyi ona gətirib çıxardı ki, döyüşlər zamanı Azərbaycan Ordusu təkcə ən müasir silahlardan istifadə etmədi, hətta bəzi əməliyyatlarda, xüsusilə Şuşa uğrunda gedən döyüşlərdə öz qətiyyəti, gücü ilə erməniləri məhv etdi. Bu tarixi Zəfər hərbçilərimizin vətənpərvərliyini , şücaətini göstərdi. Vətən müharibəsi təbii ki, çox böyük siyasi əhəmiyyətə malik idi. Bunun nəticəsidir ki, vətəndaşlarımızın Ordumuza inamı və sevgisi daha da gücləndi. Hərbçilərimizin rəşadəti, qarşılarına qoyulan döyüş tapşırıqlarını şərəflə, dəqiqliklə yerinə yetirməsi işğal altındakı torpaqlarımızın azad edilməsi ilə nəticələndi. Azərbaycan Ordusu düşmənə elə zərbə vurdu ki, çətin ki, bundan sonra hansısa dövlət Azərbaycanın ərazi bütövlüyünə göz dikməyə cürət etsin”, - deyə Z.Məmmədov qeyd edib.