Qərb Universitetində cəsur hərbçi ilə görüş
Bakı, 21 fevral, Elvira Məmmədova, AZƏRTAC
Fevralın 21-də Qərb Universitetində Xocalı faciəsinin 23-cü ildönümü ilə əlaqədar Azərbaycan hərbçisi, Qarabağ müharibəsinin iştirakçısı, “Azərbaycan Bayrağı” ordenli İbad Hüseynovla görüş keçirilib.
AZƏRTAC xəbər verir ki, görüşdə universitetin rektoru, dosent Zenfira Məmmədova həyatını Azərbaycanın ərazi bütövlüyü uğrunda mübarizəyə sərf etmiş İ.Hüseynovun Qarabağ savaşında əsl kəşfiyyatçı kimi dəfələrlə ermənilərə ağır zərbələr endirməsindən söz açıb.
Azərbaycan Milli Elmlər Akademiyasının A.A.Bakıxanov adına Tarix İnstitutu direktorunun müavini Cəbi Bəhramov Xocalı faciəsinin mahiyyətini açıqlayıb, hər zaman ürəyi Vətən eşqi ilə döyünən kəşfiyyatçı İbad Hüseynovun keçdiyi döyüş yoluna nəzər salaraq ulu öndər Heydər Əliyevin ona yüksək münasibətini, xalqın sevgisini diqqətə çatdırıb.
Cəsur kəşfiyyatçı İbad Hüseynov tələbələrə keçdiyi şərəfli döyüş yolundan, torpaqlarımızın bütövlüyü uğrunda hərbi əməliyyatlarda göstərdiyi şücaətlərdən danışıb, gəncləri vətənpərvərliyə, qəhrəmanlığa çağırıb.
Tədbirdə Xocalı faciəsini əks etdirən videoçarx nümayiş olunub.
Bölmənin digər xəbərləri
