Sumqayıt, 30 dekabr (AZƏRTAC). Qubadlı Rayon İcra Hakimiyyətinin təşkilatçılığı ilə Sumqayıt şəhərində yerləşən “Şəfa” mərasim evində 31 dekabr - Dünya Azərbaycanlılarının Həmrəylik Günü və Yeni il münasibətilə təntənəli tədbir keçirilmişdir. 

AZƏRTAC xəbər verir ki, rayon icra hakimiyyəti strukturlarının, ziyalıların, ictimaiyyət nümayəndələrinin, şəhid ailələrinin və müharibə əlillərinin, məktəblilərin qatıldıqları tədbirdə aztəminatlı ailələrdən olan uşaqlar da iştirak etmişlər.

Tədbirdə rayon icra hakimiyyətinin başçısı Malik İsaqov qubadlıları əlamətdar bayramlar münasibətilə təbrik edərək bildirmişdir ki, Azərbaycanın tarixinə uğurlu il kimi daxil olan 2012-ci ildə respublikamızın regional və qlobal əhəmiyyəti daha da artmış, xalqımızın sosial rifah halı xeyli yüksəlmişdir.

Malik İsaqov diqqətə çatdırmışdır ki, yola saldığımız ildə Azərbaycan ilk dəfə olaraq BMT Təhlükəsizlik Şurasında təmsil olunmaqla dünyanın siyasi olimpinə yüksəlmiş və qlobal güclərlə birlikdə planetimizdəki əsas çağırışlara cavab vermişdir.

Ötən il ölkəmizin bir sıra mötəbər beynəlxalq tədbirlərə uğurla ev sahibliyi etməsindən, Trans-Anadolu Qaz Kəmərinin (TANAP) reallaşdırılması ideyasını irəli sürməklə Avropanın enerji  coğrafiyasında yeniliyə imza atmasından bəhs edən rayon rəhbəri Dünya İqtisadi Forumunun iqtisadi reytinqində Azərbaycanın 144 dövlət arasında 46-cı yerdə qərarlaşmaqla 9 pillə irəliləməsini, MDB məkanında liderliyini möhkəmləndirməsini Prezident İlham Əliyevin apardığı iqtisadi siyasət kursunun uğuru kimi qiymətləndirmişdir. O, həmçinin bildirmişdir ki, “İdman ili” olan 2012-ci ildə Olimpiya yığmamız XXX London Yay Olimpiya Oyunlarını 10 medalla dünya ölkələri arasında 30-cu yerdə başa vurmaqla ölkəmizin idman dövləti statusunu daha da gücləndirmişdir.

Bildirilmişdir ki, birinci Avropa Yay Olimpiya Oyunlarının 2015-ci ildə məhz Azərbaycanda keçirilməsi ilə bağlı qərar ölkəmizin Avropa ailəsində yüksək nüfuz sahibi olmasını bir daha təsdiqləmişdir.

Ermənistan-Azərbaycan, Dağlıq Qarabağ münaqişəsinin həlli ilə bağlı ölkəmizin haqlı mövqeyinə olan beynəlxalq dəstək artmaqdadır, deyən icra hakimiyyətinin başçısı 2012-ci ilin minlərlə məcburi köçkün ailəsinin yaşayış şəraitinin yaxşılaşdırılması ilə də yadda qalmasından bəhs etmişdir.

Malik İsaqov demişdir ki, yola saldığımız ildə Qubadlı rayonunda da əhalinin mənzil-məişət problemlərinin həlli, idarə, müəssisə və təşkilatların maddi-texniki bazasının möhkəmləndirilməsi istiqamətində rayon icra hakimiyyəti tərəfindən həyata keçirilən tədbirlər davam etdirilmişdir. İl ərzində əhalinin məskunlaşdığı 40-a qədər obyektdə müvafiq təmir işləri aparılmış, 20-yə qədər ailənin məskunlaşdığı fərdi mənzillərdə zəruri təmir işlərinin aparılmasına köməklik edilmiş, 4000 kvadratmetrədək sahəyə asfalt çəkilmiş, 3 məktəbdə müasir istilik sistemi quraşdırılmışdır. Bu möhtəşəm mərasim evi də cari ildə əsaslı təmir olunaraq istifadəyə verilmişdir. Sonra o, yola saldığımız ilin rayon gənclərinin təhsil, idman, mədəniyyət sahəsində qazandıqları uğurlardan danışmışdır. Bildirmişdir ki, rayon məktəblərini bitirən məzunlardan 122 nəfəri, başqa sözlə, ali məktəblərə qəbul imtahanlarında iştirak edənlərin 46 faizi tələbə adını qazanmışdır. Rayonun təmsilçiləri mədəniyyət sahəsində keçirilən müsabiqə və festivallarda uğurla çıxış etmişlər. İdmançılarımız isə müxtəlif beynəlxalq və respublika səviyyəli idman yarışlarında 46 medal qazanmışlar.

“Xalqımız, eləcə də rayonumuzun əhalisi bütün bu uğurları ümummilli lider Heydər Əliyevin uzaqgörən və müdrik strategiyasından qaynaqlanan, Azərbaycanın Prezidenti İlham Əliyev tərəfindən bacarıq və qətiyyətlə, yeni tarixi şəraitə uyğun yaradıcılıqla həyata keçirilən daxili və xarici siyasətin nəticəsi kimi minnətdarlıqla dəyərləndirir”, - deyən icra hakimiyyətinin başçısı daha sonra bildirmişdir ki, torpaqlarımızın müdafiəsi uğrunda döyüşlərdə Qubadlı rayonundan yüzlərlə insan şəhid olmuşdur. Onların xatirəsi hər kəs üçün əzizdir. Bu gün də bir çox qubadlılar onlara tapşırılan sahələrdə müstəqil Azərbaycan naminə layiqincə çalışırlar.

Malik İsaqov torpaqlarımızın bütövlüyü uğrunda döyüşlərdə həlak olmuş Əliyev Mübariz Əbdül oğlunun Azərbaycan Respublikası Prezidentinin 2012-ci il tarixli Sərəncamı ilə ölümündən sonra “Azərbaycan Bayrağı” ordeni ilə təltif edildiyini bildirmiş və ordeni şəhidin anası Səkinə Əliyevaya təqdim etmişdir.

Uzun illər dövlət qulluğunda səmərəli fəaliyyət göstərmiş və 2012-ci ildə Azərbaycan Respublikası Prezidentinin Sərəncamı ilə təltif edilmiş Cəfərov Xanış Fərzalı oğluna “Tərəqqi” medalı təqdim olunmuşdur.

Tədbirdə çıxış edən ağsaqqallar əldə olunmuş bütün nailiyyətlərin fövqündə dövlət başçısının adının dayandığını və gələcək uğurların da mənbəyi məhz Prezident İlham Əliyevin yorulmaz, fədakar fəaliyyətinin nəticəsi olduğunu xüsusi ilə vurğulamışlar.

Geniş və maraqlı konsert proqramı ilə davam edən bayram tədbirində 2012-ci ildə uğurlar qazanmış gənclər də unudulmamışdır. Rayon rəhbərliyi tərəfindən 65 gəncə qiymətli hədiyyələr təqdim edilmişdir. Bayrama qatılan uşaqlara isə bayram hədiyyələri verilmişdir.

Tədbirdə Şaxta baba və Qar qızın iştirakı, yolka ətrafında uşaqların şən rəqsləri iştirakçıların əhval-ruhiyyəsini və gələcəyə inamını daha da artırmışdır.