REGİONLAR
Şamaxıda gəlirli sahə olan üzümçülük yeni inkişaf mərhələsini yaşayır
Şamaxı, 16 iyun, Adil Ağayev, AZƏRTAC
Bölgələrdə kənd təsərrüfatı işlərinin gedişi, bu sahənin inkişafı ilə əlaqədar mövcud ehtiyatların araşdırılması məqsədilə yaradılan işçi qrup iyunun 16-da günün ikinci yarısında Şamaxıya gəlib və burada sahibkarların, fermerlərin və mütəxəssislərin iştirakı ilə geniş müşavirə keçirilib.
AZƏRTAC xəbər verir ki, mütəxəssislərdən ibarət işçi qrup əvvəlcə rayonun Mədrəsə qəsəbəsi ərazisində 2008-ci ildə yaradılan “Mədrəsə Aqro” MMC-nin fəaliyyəti ilə tanış olub. MMC vaxtilə Şamaxıda iqtisadiyyatın əsasını təşkil edən üzümçülüklə məşğuldur. Burada hazırda 185 hektar məhsuldar, 150 hektar yeni üzüm bağları var və onların becərilməsi ilə 150 nəfər məşğuldur. İşçilər əsasən Mədrəsə qəsəbəsinin və Şamaxı şəhərinin sakinləridir. Bundan əlavə, mövsümü işlərə daha 150 işçi cəlb edilib. Mövcud çətinliklər və perspektivlər barədə fikir mübadiləsindən sonra işçi qrup müəssisənin qablaşdırma sexi və 10 min tonluq soyuducu kameranın fəaliyyəti ilə tanış olub.
Sonra qonaqlar Meysəri kəndi ərazisindəki “Şirvan şərabları” MMC-nin üzüm plantasiyalarına baxış keçiriblər.
Şamaxı şəhər İncəsənət Təhsili Mərkəzində keçirilən müşavirəni açan rayon icra hakimiyyətinin başçısı Asif Ağayev rayonda iqtisadiyyatın ayrı-ayrı sahələri, o cümlədən sovetlər birliyi dövründə 27 min hektar üzüm plantasiyaların olduğu Şamaxıda son vaxtlar bu sahənin inkişafı ilə əlaqədar görülən işlərdən danışıb və vurğulayıb ki, hazırda bağların sahəsi 1632 hektara çatır.
İcra başçısı qeyd edib ki, rayonda 112 min 500 hektar əkinəyararlı torpaq sahəsi mövcuddur. Ötən il 2150 hektar sahədə payızlıq əkin aparılıb. İri təsərrüfatların fəaliyyətinin daha səmərəli olduğunu qeyd edən icra hakimiyyətinin başçısı “Kürdəmir süd emalı” MMC-nin icarəyə götürdüyü 2723 hektar sahədə iri taxılçılıq təsərrüfatının yaradıldığı, qış otlaq sahələrində 2000 başlıq heyvandarlıq kompleksinin tikintisinin nəzərdə tutulduğunu bildirib. Habelə Sabir qəsəbəsi ərazisində “Gilan Holdinq” tərəfindən 1200 başlıq heyvandarlıq kompleksinin tikintisinə hazırlıq görüldüyünü diqqətə çatdırıb.
Müşavirədə işçi qrupun rəhbəri, Azərbaycan Prezidentinin iqtisadi islahatlar üzrə köməkçisi xidmətinin aqrar və sənaye məsələləri şöbəsinin müdiri Azər Əmiraslanov çıxış edərək dövlətimizin başçısının bölgələrdə kənd təsərrüfatının inkişafı istiqamətində qarşıya qoyduğu konkret vəzifələrdən, bu sahəyə göstərilən dövlət qayğısından danışıb. İşçi qrupunun fəaliyyət istiqamətlərini şərh edən şöbə müdiri bildirib ki, qrup tərəfindən indiyədək 30 rayonda kənd təsərrüfatının inkişaf perspektivləri araşdırılıb və bununla bağlı müşavirələr keçirilib. Hər yerdə aqrar sektorda canlanma nəzərə çarpır. Xüsusilə pambıqçılıq rayonlarında bu canlanma daha çox müşahidə edilir.
A.Əmiraslanov ölkədə aqrar sektorun inkişaf istiqamətlərindən, bu sahəyə göstərilən dövlət qayğısından danışaraq Şamaxıda taxılçılıq və heyvandarlıqla yanaşı, üzümçülüyün, arıçılığın, bağçılığın böyük perspektivlərindən bəhs edib və bu gəlirli sahələrdə görüləsi konkret işlərdən danışıb.
Sonra müşavirə diskussiya şəraitində davam etdirilib. Fermerlərin, sahibkarların sualları cavablandırılıb.
Müşavirədə rayonun 15 min hektar qış otlaq sahələrinin təyinatının dəyişdirilib əkin torpaqları kateqoriyasına keçirilməsi, bələdiyyənin ehtiyat fondunun əkinəyararlı torpaqlarının icarəyə verilməsi şərtlərinin sadələşdirilməsi, rayonda “Aqrolizinq” ASC-nin Qobustan regional nümayəndəliyinin Şamaxı bölməsində şum traktorlarının, kombaynların sayının artırılması, rayonda üzüm və süd məhsullarının emalı müəssisələrinin, yun qəbulu məntəqəsinin açılması və sair barədə təkliflər səsləndirilib. Verilən təkliflər araşdırılmaq üçün nəzarətə götürülüb.