ELM VƏ TƏHSİL
Səbail rayonunun orta məktəblərində yeni dərs ilinə başlanılmışdır
Bakı, 16 sentyabr (AZƏRTAC). Bilik günü ənənəvi olaraq Səbail rayonunun bütün orta təhsil müəssisələrində təntənəli şəkildə qeyd olunmuşdur. Yeni dərs ili ərəfəsində məktəblərdə böyük hazırlıq işləri aparılmış, ilk dərs günü 18 orta məktəbdə dərslərə başlanılmışdır.
Səbail Rayon İcra Hakimiyyətindən (RİH) AZƏRTAC-a verilən məlumata görə, 189 nömrəli orta məktəbdə hazırda 1.100 şagird təhsil alır, 150 müəllim onlara dərs deyir. Bilik günü münasibətilə keçirilən tədbirdə məktəbin direktoru, Əməkdar Müəllim Ceyran Quliyeva keçən tədris ilində kollektivin qazandığı uğurlar barədə məlumat vermişdir. Qeyd olunmuşdur ki, bu tədris ilində məktəbi bitirmiş 42 məzunun 32-si müxtəlif ali məktəblərə, o cümlədən 2 nəfər xarici ali məktəblərə daxil olmuşdur. Keçən dərs ili ərəfəsində əsaslı təmir olunmuş məktəb binasında müasir təhsil üçün hər cür şərait yaradılmış, məktəb lazımi avadanlıq və dərs vəsaitləri ilə tam təmin olunmuşdur.
C.Quliyeva yeni təhsil müəssisələrinin tikintisi və əsaslı təmir olunmasını, burada müasir standartlara uyğun şəraitin yaradılmasını ölkə rəhbərliyi tərəfindən Azərbaycan təhsilinə böyük diqqət və qayğı kimi qiymətləndirmiş və bu işlərə görə Prezident İlham Əliyevə məktəb kollektivi adından dərin təşəkkürünü bildirmişdir.
Dövlət Proqramına uyğun olaraq bu il şəhərin mərkəzindəki 190 nömrəli orta məktəbin idman və akt zalları yerləşən korpusu əsaslı təmir olunmuşdur. Məktəblə tanışlıq zamanı məktəbin direktoru, Əməkdar Müəllim Afət Bakıxanova qeyd etmişdir ki, korpusun damı mansard şəklində qurularaq bura dəmir örtük vurulmuş, elektrik, su və kanalizasiya xətləri yeniləşmiş, köməkçi otaqlar əsaslı təmir olunmuşdur. İdman zalı da əsaslı təmir olunaraq lazımi ləvazimatlar və avadanlıqla təchiz olunmuşdur.
A.Bakıxanova bildirmişdir ki, bu il məktəbi bitirmiş məzunlardan 52 nəfəri müxtəlif ali məktəblərə, o cümlədən 9-u xarici ölkələrin ali təhsil müəssisələrinə daxil olmuşdur. Məzunlardan 4 nəfəri qəbul imtahanlarında 600-dən çox bal toplamış, 2 məzunu “Qızıl medal”a layiq görülmüş, məktəbin müəllimi Nərgiz Məmmədova “Ən yaxşı müəllim” müsabiqəsinin qalibləri sırasında olmuşdur. O, təhsilə diqqət və qayğıya, məktəbdə yaradılan şəraitə görə Prezident İlham Əliyevə dərin təşəkkürünü bildirərək, pedaqoji kollektiv adından vətənimiz üçün savadlı və vətənpərvər nəslin yetişdirilməsi işində əllərindən gələni əsirgəməyəcəklərini vurğulamışdır.
Dövlət Proqramının icrasına uyğun olaraq bu ilin may ayında hazırda 980 şagirdin təhsil aldığı Məmməd Rahim adına 7 nömrəli tam orta məktəbin əsas binasının əsaslı təmirinə başlanılmışdır.
Dörd mərtəbəli binada 27 sinif, 2 kompyuter otağı, 3 laboratoriya, yardımçı otaqlar, bufet, sanitariya qovşaqları əsaslı təmir olunmuşdur. Məktəb binası yeni mebel, avadanlıq, dərs ləvazimatları ilə tam təmin olunmuşdur.
“Sahil bağı”nda qeyd olunan Bilik günü tədbirində çıxış edən məktəbin direktoru Gülnaz Mehdizadə burada aparılan təmir-abadlıq işləri barədə məlumat vermişdir. Qeyd etmişdir ki, ötən il məktəbin 3 məzunu “Qızıl medal”a layiq görülmüşdür. Bu il məktəbi bitirmiş 48 məzundan 30 nəfəri müxtəlif ali məktəblərə, o cümlədən 4-ü xarici ölkələrin ali təhsil müəssisələrinə daxil olmuşdur. Məzunlardan 3 nəfəri qəbul imtahanlarında 600-dən çox bal toplamışdır.
Məktəb bir sıra layihələrin, o cümlədən elektron məktəb, ingilis dilinin intensiv tədrisi, 61 ölkəni birləşdirən Beynəlxalq İnnovativ Məktəb və s. layihələrin iştirakçısıdır.
Gülnaz Mehdizadə böyük ənənələri olan məktəbdə təhsilə yaradılan şərait üçün ölkəmizin başçısı İlham Əliyevə dərin minnətdarlığını bildirmişdir.
Yeni dərs ilinin başlanmasına həsr olunan tədbirlərdə iştirak edən Səbail RİH-in başçısı Asif Əsgərov əsaslı təmirdən sonra istifadəyə verilmiş məktəblərin kollektivlərini təbrik etmiş, onlara təhsildə uğurlar arzulamışdır. A.Əsgərov ölkədə təhsil məsələləri ilə bağlı görülən işlərdən, Azərbaycan Respublikasının Prezidenti İlham Əliyev və ölkənin birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban Əliyeva tərəfindən təhsilə diqqət və qayğılarından danışmışdır. Bildirmişdir ki, rayonda təhsilin səviyyəsi və təhsil müəssisələrinin vəziyyətinə ciddi fikir verilir. Yay aylarında təhsil müəssisələrində əsaslı və cari təmir işləri aparılmış, məktəblər lazımi avadanlıq və vəsaitlərlə təmin olunmuşdur.
Natiq rayon məktəblilərinin keçən tədris ilində qazandıqları uğurlardan danışaraq demişdir ki, orta məktəbləri bitirmiş 1.458 nəfərdən 927-i tələbə adını qazanmış, abituriyentlərdən 121 nəfəri 500-dən yuxarı, 35 nəfəri 600-dən, 8 nəfəri isə 650-dən çox bal toplamışdır. Məzunlardan 88 nəfəri xarici ölkələrin ali məktəblərinə qəbul olunmuşdur. 19 məzun qızıl medala layiq görülmüşdür.
Prezident İlham Əliyevin “2012/2013-cü tədris ilində keçirilmiş “Ən yaxşı ümumtəhsil müəssisəsi” müsabiqəsinin qaliblərinin mükafatlandırılması haqqında” sərəncamına görə Səbail rayonu 6 nömrəli tam orta məktəb və 160 nömrəli Klassik Gimnaziya artıq ikinci dəfədir ki, qaliblər sırasında olmuşdur. Bu il keçirilən “Ən yaxşı müəllim” müsabiqəsinin qalibləri arasında isə rayonun 6 nəfər müəllimi də vardır.
Cari ilin yay aylarında “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”nın Əlavə Tədbirlər Planına əsasən 900 şagirdin təhsil aldığı 7 nömrəli pilot məktəbi və 1.900 şagirdin təhsil aldığı 163 nömrəli orta məktəbin binaları, 190 nömrəli orta məktəbin akt və idman zalı tam əsaslı təmir olunmuşdur. Məktəblər bütün lazımi avadanlıq və dərs vəsaiti ilə təchiz olunmuşdur. Həmçinin Bibiheybət qəsəbəsindəki 70 nömrəli uşaq bağçasının əsaslı təmiri və bağça üçün əlavə musiqi zalı və 3 otağının tikintisi başa çatdırılmışdır.
20-ci yaşayış sahəsində yerləşən “Turac” uşaq bağçasında möhkəmləndirmə işləri aparılmış, hazırda əsaslı təmir işləri davam etdirilir.
A.Əsgərov Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban xanım Əliyevanın ölkəmizdə təhsilin inkişafında əvəzsiz xidmətlərindən söz açmış, fondun dəstəyi ilə görülən işlər barədə məlumat vermişdir. Bildirmişdir ki, yay aylarında Heydər Əliyev Fondunun təşəbbüsü ilə Badamdar qəsəbəsindəki 136 nömrəli körpələr evi-uşaq bağçasında əsaslı təmir aparılmış və hazırda son tamamlama işləri gedir.
Ənənəvi Bilik günü tədbirləri rayonun digər məktəblərində də keçmiş, bu tədbirlərdə RİH-in məsul nümayəndələri, ağsaqqallar, veteranlar və rayon ictimaiyyətinin nümayəndələri iştirak etmişlər.