Sədaqət Qəhrəmanova: Azərbaycan qadınları bütün dövrlərdə dövlətçiliyimizin keşiyində şərəflə dayanıblar
Bakı, 7 mart, Səadət Hakıyeva, AZƏRTAC
Qadın çox sirli və güclü varlıqdır. Əsrlərboyu müxtəlif dövrlərdə fiziki cəhətdən zəif olan qadınlar müəyyən təzyiqlərlə üzləşiblər. Lakin qadınlar zaman-zaman savadı və təhsili sayəsində bu təzyiqlərdən xilas ola bilib. Azərbaycan qadınları hər zaman cəmiyyətin həyatında önəmli rol oynayıblar. Onlar öz atalarına, qardaşlarına, həyat yoldaşlarına çətin günlərdə dayaq olmağa çalışıblar. Hələ 1918-ci ildə Azərbaycanda qadına seçki hüququ verilməmişdən əvvəl qadınlarımızın maarifpərvər rolunu xüsusi qeyd etmək lazımdır. Cəmiyyətdə maarifpərvər qadınlarımızın olması təbii olaraq, ziyalı mühitin formalaşmasına da zəmin yaradıb.
Bu sözləri AZƏRTAC-a müsahibəsində Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova söyləyib.
Sədr müavini bildirib ki, qadının Azərbaycan cəmiyyətində rolu həmişə yüksək olub və onlara əsl qiyməti ziyalı, maarifpərvər insanlar verib. Belə şəxsiyyətlərdən müsəlman Şərqində ilk qızlar məktəbinin yaradıcısı Hacı Zeynalabdin Tağıyevin, böyük mütəfəkkir şair və yazıçı Hüseyn Cavidin və başqalarının adlarını çəkmək olar.
Azərbaycanda qadınların hüquqlarının qorunmasının, onların ictimai fəallığının təşkili məsələsinin xalqımızın ümummilli lideri Heydər Əliyevin hər zaman diqqət mərkəzində olduğunu qeyd edən Sədaqət Qəhrəmanova deyib: “Heydər Əliyevin hakimiyyətinin bütün dövrlərində qadınlara göstərilən diqqət və qayğının artdığının şahidi olmuşuq. Məhz onun hakimiyyəti illərində Azərbaycan qadınları cəmiyyətin həyatının müxtəlif sahələrində öz sözlərini deyə biliblər. Azərbaycan qadını da hər zaman Ümummilli Liderin siyasətini dəstəkləyib.
Məhz Ümummilli Liderin qadın siyasətinin nəticəsi idi ki, 1998-ci ildə Azərbaycanda qadınların hüquqlarını müdafiə etmək və bu sistemi mərkəzləşdirmək məqsədilə Qadın Problemləri üzrə Dövlət Komitəsi yaradıldı. 2006-cı ildə bu qurumun əsasında Ailə, Qadın və Uşaq Problemləri üzrə Dövlət Komitəsi fəaliyyət göstərməyə başladı. Qadına ailədən, uşaqdan kənarda fərdi yanaşmaq mümkün deyil. Ailənin, uşağın problemlərini həll etmədən qadın azadlığından danışmaq heç bir məntiqə sığmır. Cəmiyyətimizdə ailə institutunun yaradılması çox vacib idi”.
Ölkəmizdə gender bərabərliyinin diqqətdə saxlanıldığını deyən Komitə sədrinin müavini bildirib ki, cəmiyyətimiz qadın və kişidən ibarət olduğu üçün bu iki qanad bərabər inkişaf etməlidir və edir. Azərbaycan beynəlxalq təşkilatlara üzv olmaqla, müvafiq sənədlər qəbul edir, konvensiyalara qoşulur. Çünki beynəlxalq standartlar bunu tələb edir.
“Qadınlara, ilk növbədə, ailələri tərəfindən dəstək gəstərilməlidir. Bu, olmasa, o, özünü inkişaf etdirə bilməz”, - deyən Sədaqət Qəhrəmanova bu gün dövlətimiz tərəfindən də qadınlara xüsusi dəstəyin verildiyini vurğulayıb. Azərbaycan Respublikasının Prezidenti hər il olduğu kimi, bu il də ölkənin mədəniyyət, elm, təhsil və digər sahələrində xidmətləri olan qadınları təltif etdi. Qadınlarımız Prezident İlham Əliyevin və Birinci vitse-prezident Mehriban Əliyevanın dəstəyini, qayğısını hər zaman hiss edirlər. Qadınlarımız bütün dövrlərdə olduğu kimi, bu gün də dövlətçiliyimizin keşiyində şərəflə dayanırlar, tapşırılan işin, vəzifənin öhdəsindən layiqincə gəlirlər.
S.Qəhrəmanova qadınların hüquqlarının qorunmasında iki əsas amili xüsusi qeyd edib. Bildirib ki, qadınlara qarşı zorakılıq və qızların təhsildən yayınaraq erkən nikaha cəlb olunmaları çox ciddi və narahatlıq doğuran problemlərdir. Bu istiqamətdə işlər davam edir. “Məişət zorakılığının qarşısının alınması haqqında” Qanun qəbul edildikdən sonra dövlət qurumları öz profillərinə uyğun işlərini qururlar. Müvafiq tədbirlər həyata keçirilir. Məlumdur ki, məişət zorakılığı ilə bağlı qanunvericilikdə dəyişiklik edildi. Belə ki, oğlan və qızların ailə qurması üçün yaş həddi eyniləşdirildi və bu, 18 yaş həddi müəyyən edildi. Təəssüflər olsun ki, erkən nikah problemləri hələ də qalmaqdadır. 10 il bundan əvvəlki dövrlə müqayisə edəndə görürük ki, müsbətə doğru irəliləyiş var. Bu istiqamətdə maarifləndirmə işləri aparılır. Bütün icra hakimiyyətlərində monitorinq qrupları fəaliyyət göstərir. Monitorinq qrupları vaxtaşırı təhlillər aparır və nəticə barədə komitəyə hesabat təqdim edirlər. Həmin hesabatlar bizə hadisələri daha dəqiq araşdırmağa və müvafiq tədbirlər görməyə imkan verir.
Ölkəmizdə qadın sahibkarlığın inkişafı istiqamətində görülən işlərdən bəhs edən Komitə sədrinin müavini deyib: “Qadınların hüquqlarının qorunması, azadlıqlarının təmin edilməsi üçün onların iqtisadi asılılıqdan azad olmaları mühüm şərtdir. Qadın sahibkarlığının inkişaf etdirilməsinin nəticəsidir ki, 2011-ci ildən bu yana iki yüz altmış mindən çox qadın sahibkarlıq fəaliyyəti ilə məşğuldur. AQUPDK-nın Avropa İttifaqı, eləcə də BMT ilə birgə apardığı layihələr çərçivəsində ölkəmizdə qadın sahibkarlığı inkişaf edərək yeni mərhələyə qədəm qoyub. Ölkəmizdə doqquz Qadın Resurs Mərkəzinin yaradılması da bu uğurlardan biridir.
BMT-nin dəstəyi ilə həyata keçirilən maraqlı layihələrdən biri də kənd qadınının təşviqi və fəallığı proqramının həyata keçirilməsi idi. Komitənin məqsədi boşanmış, tənha qalmış qadınları maarifləndirməklə, onları sahibkarlıq fəaliyyətinə cəlb etmək idi. Dövlətimiz tərəfindən qadınların müdafiəsi üçün müəyyən miqdarda vəsait ayrılır ki, onlar özünüməşğulluq fəaliyyəti ilə məşğul olsunlar. Bu da ailə biznesinin yaranması əsasında maddi vəziyyətin yaxşılaşmasına, firavan həyatın təmin olunmasına şərait yaradır.
Sonda Azərbaycan qadınlarını 8 mart-Beynəlxalq Qadınlar Günü və qarşıdan gələn Novruz bayramı münasibətilə təbrik edir, onlara ailə xoşbəxtliyi, firavan günlər, qələbə sevinci arzulayıram”.
Bölmənin digər xəbərləri
