Şəhidlərə həsr edilmiş sərgi
Sədərək, 15 yanvar (AZƏRTAC). AZƏRTAC xəbər verir ki, 20 Yanvar faciəsinin ildönümü ilə əlaqədar Sədərək Rayon Tarix-Diyarşünaslıq Muzeyində sərgi təşkil olunmuşdur. “20 Yanvar xalqımızın qan yaddaşıdır” guşəsində şəhidlərin fotoşəkilləri, onların şəxsi sənədləri, əşyaları, yazıçı-publisistlər Qulu Kəngərlinin “Qanlı şənbəyə gedən yol”, Hüseyn Həsənoğlunun “Dünyanın mənfur milləti: erməni”, Vaqif Məmmədovun “Erməni xəyanəti”, Vaqif Səmədov və Salar Aslanovun “Təki Vətən yaşasın” kitabları, şəhidlərə həsr olunmuş qəzet və jurnal nümunələri nümayiş etdirilir. “20 Yanvar uşaqların gözü ilə” guşəsində isə gənc, yeniyetmə rəssamların rəngkarlıq işləri də muzeyə gələnlərin diqqətini cəlb edir.
Sərgidə məktəbli rəssamların simvolik olaraq 20 rəngkarlıq işi nümayiş olunur. Rəsm əsərləri sərgiyə gələnləri bir daha o müdhiş günlərə qaytarır. Sədərək məktəbinin tarix müəllimi Zakir Zamanov qeyd etmişdir ki, 20 Yanvar hadisələri Azərbaycan xalqının tarixinə təkcə faciə kimi yox, eyni zamanda xalqımızın azadlıq və müstəqillik mübarizəsinin ən şanlı qəhrəmanlıq səhifəsi kimi həkk olunmuşdur.
Bölmənin digər xəbərləri
