İQTİSADİYYAT
Şirvan şəhərində bu ilin doqquz ayında sosial-iqtisadi inkişaf sahəsində uğurlu nəticələr qazanılmışdır
Şirvan, 1 noyabr (AZƏRTAC). Şirvan Şəhər İcra Hakimiyyətində 2011-ci ilin doqquz ayının sosial-iqtisadi inkişafının yekunları və qarşıda duran vəzifələr müzakirə edilmişdir.
AZƏRTAC xəbər verir ki, toplantıda çıxış edən şəhər icra hakimiyyətinin başçısı Mərdan Camalov oktyabrın 24-də Prezident İlham Əliyevin sədrliyi ilə Nazirlər Kabinetinin 2011-ci ilin doqquz ayının sosial-iqtisadi inkişafının yekunlarına həsr olunmuş iclasında dövlətimizin başçısının nitqindən irəli gələn və qarşıda duran vəzifələrdən danışmışdır.
Şəhər icra hakimiyyəti başçısının sosial-iqtisadi məsələlər üzrə müavini Elman Abbasov məruzə ilə çıxış etmişdir. Bildirmişdir ki, hesabat dövründə iqtisadiyyatın əsas sahələri üzrə istehsal edilmiş məhsul və xidmətlərin məbləği 267 milyon manat olmuşdur. Bu, ötən ilin müvafiq dövrü ilə müqayisədə 21 faiz çoxdur.
Cari ilin doqquz ayında şəhərdə 295 min ton neft, 13 milyon kubmetr təbii qaz və 1,9 milyard kilovat-saat elektrik enerjisi istehsal edilmişdir.
Hesabat dövründə müəssisələr tərəfindən 13 milyon manatlıq tikinti-quraşdırma işləri görülmüşdür. Bu, ötən ilin müvafiq dövrünə nisbətən 2 dəfə çoxdur.
Sənayedə çalışan işçilərin orta aylıq əməkhaqqı ötən ilə nisbətən 7,9 faiz artaraq 528 manat olmuşdur.
Bu dövrdə əhaliyə göstərilən pullu xidmətlərin məbləği 2 faiz artaraq 21 milyon manat təşkil etmişdir.
Doqquz ayda şəhər məşğulluq mərkəzinə müraciət edən 1202 nəfər iş axtarandan 886 nəfəri işlə təmin edilmiş, 86 nəfərə isə işsizlik müavinəti verilmişdir.
Əhalinin məşğulluğunun təmin edilməsi məqsədilə keçirilən “əmək yarmarkası”nda 164 nəfər münasib işlə təmin edilmişdir.
Qeyd olunmuşdur ki, bu ilin doqquz ayında Müdafiə Sənayesi Nazirliyinin tabeliyində olan “Telemexanika” və “Araz” zavodlarında müəyyən işlər görülmüşdür. Telemexanika zavodunda plan tapşırıqları 100,2 faiz yerinə yetirilmişdir. “Araz” zavodunda da dövlət sifarişi üzrə məhsul istehsalı davam etdirilir.
Şəhərdə abadlıq-quruculuq işləri də uğurla davam etdirilmişdir.
Doqquz ayda şəhərdə 12 nümunəvi məhəllə salınmış, 5 məhəllədə xeyir-şər mərasimləri üçün binalar tikilmişdir.
Səhiyyə Nazirliyi tərəfindən şəhər mərkəzi xəstəxanasının binası, qəbul, anesteziologiya, urologiya və terapiya şöbələri əsaslı təmir olunmuşdur.
Hazırda şəhərdəki 1 nömrəli uşaq bağçası və körpələr evində, 12 nömrəli orta məktəbin binasında əsaslı təmir işləri aparılır. Dünya Bankının ayırdığı vəsait hesabına 16 nömrəli orta məktəbdə əsaslı təmir və yenidənqurma işləri davam etdirilir. Bayramlı qəsəbəsində 3 nömrəli məktəb üçün 480 yerlik yeni binanın tikintisinə başlanılmışdır.
Yığıncaqda çıxış edənlər bu ilin doqquz ayında şəhərdə sosial-iqtisadi inkişaf sahəsində qazanılmış uğurlardan, əldə edilmiş nailiyyətlərdən danışmış, mövcud problemlərlə bağlı təkliflərini bildirmişlər.